تاوان من نیه‌ هه‌م كوردم و هه‌م شیعه

شفق نيوز

ناو كورد خوار له‌ ژێرناو فه‌يلی يا كه‌ڵهو‌ڕ يا له‌ك يا ... ك بازێگ له‌ برايل كوردمان وه‌ باوه‌ڕه‌يل ئايينی تره‌كه‌و، ناو شيعه‌ نانه‌سه‌ سه‌رمان و وه‌رده‌وام تاوانباريم وه‌ يه‌گ ئيمه‌ شيعه‌يم و ده‌س وه‌ل لايه‌نه‌يل شيعه‌يا ديريمن و هه‌ست ملليمان كزه‌!؟.، توام له‌ مه‌قام ديفاعێگ چه‌ن كه‌ليمه بارمه‌ روی كاغه‌ز و ئه‌ی جووره‌ تاوانبارێگ نه‌ته‌نيا قه‌بووڵی نيه‌كه‌م، به‌ڵكو وه‌و كه‌سانه‌گ  ئيمه‌ی كورد شيعه‌ تاوانبار كه‌ن بويشم، ئه‌ی شيعه‌‌ بوين ئيمه‌ نوا له‌ كورد بوين ئيمه‌ نه‌گرتيه‌ و له‌ ئه‌و كه‌سانه‌گ ده‌م له‌ كورد بوين ده‌ن فره‌ كورد تره‌كيم. ئه‌را نمونه‌يش بويه‌، توام له‌ شه‌هيد سه‌ركرده‌ له‌يلا قاسم بارمه‌ زووان ك چوين هێمان ته‌مام لايه‌نه‌يل حزبی كورد له‌ چوارپارچه‌ی كوردسان، وه‌ ژنێگ قاره‌مان ناو له‌ لی به‌ن و وه‌ شانازيه‌و هه‌ركاميان ناو له‌ لی تيه‌رن و يه‌كم ژن شه‌هيد پيشمه‌رگه‌س ك وه‌رجله‌ هه‌ر ژنێگ كورد وه‌ باوه‌رێ ئايينی جياوه‌و گيان خوه‌ی له‌ ڕی كوردسان به‌خشا. توام له‌و كه‌سانه‌ ئه‌ی پرسه‌ بكه‌م ئايا ئيمه‌گ شيعه‌يم و په‌يڕه‌و عه‌لی و ئيمام حوسه‌ينيم، ئايا ئه‌ی دو كه‌س ده‌يشت له‌ باوه‌ره‌يل و مه‌زه‌وه‌يل ئيسلامی ناسن؟ ئايا په‌يام حوسه‌ين ك ئينه‌گ هه‌له‌ مه‌كته‌ب كۆمۆنيزم بگره‌ تا باوه‌ڕيل ئايينی تره‌ك له‌ دونيا، ته‌نيا وه‌ وه‌ خاتر يه‌ی جومله‌ی حوسه‌ين ك وه‌ يه‌زيد و له‌شكه‌ريه‌يلێ ئويشێ:(ئه‌گه‌ر دين نه‌يرين، كه‌م كه‌مه‌گه‌ی ئازاده‌ پێياو بوون، چ ڕه‌سانيه و په‌يامی ئه‌را ئازادی چه‌ بويه‌ و چوين ئه‌ی قسيه‌ی حوسه‌ينه‌ شێيه‌و كه‌ن)!؟. ئايا ئيمه‌گ دگان گرتيه‌مه‌سه‌ خوه‌ماناو وه‌ راهه‌تی خوه‌مان چوين باوگ و باپير ئه‌ی برايله‌ خوه‌مان ته‌سليم قه‌وم سامی نه‌كريدمن و باوگ و باپيره‌يلمان له‌ پووسێگ تازه‌ ديفاع له‌ فه‌رهه‌نگی كردن ك ئينگه‌ ئويه‌ خوه‌دان وه‌ خاوه‌نێ زانين و ئيمه‌ له‌ لی بێگانه‌ زانينن ئه‌را بايه‌د له‌يوا تاوانبارمان بكه‌ين و وه‌ ره‌وشێگ تازه‌ ك خواست دوژمنان كورده‌، وه‌ شه‌ن كردن چێشته‌يلێگ ك هويچ وجوود ده‌ره‌كی نه‌يرن، تواين داوان پاكمان وه‌ ناپاك نيشان به‌ين!؟ ئايا ئه‌ی كاره‌گ كريه‌يد چ قازانجێگ ها له‌ ناوێ بێجگه‌ له‌وه‌گ كارێگه‌ ك دوژمنان كورد نيه‌توينن بكه‌نه‌ی، له‌ روی نه‌زانييه‌و بازێگ له‌ برايل ك خوه‌يان وه‌ كورد زانن، دێرن شه‌ن ئه‌را دوژمن كه‌ن و له‌ جياڵی دروس كردن هه‌ست مللی و گرنگی دان وه‌ كورد بوين و هس كورد بوين، وه‌ راهه‌تی فره‌ێگه‌و، وه‌يشه‌ نه‌ وه‌ ڕه‌وانگه‌ی واز و نه‌ته‌وه‌يی وه‌ نه‌ناسين تايبه‌تێگ له‌ سه‌ر كورد شيعه‌ و بێ وه‌گ بزانن دێرن ئاو كه‌نه‌ ئاسياو كی، باسه‌يلێ تيه‌رنه‌و وه‌ر ك هويچ جێ به‌ره‌ژوه‌ندی كورد وه‌ ته‌مام لايه‌نه‌يل سياسی له‌ ناوێ نێيه‌و ته‌نيا له‌ی جياوازی خسنه‌، بووێگ گه‌ن تيه‌يد و ئه‌وه‌يشه‌ چ وه‌ زانا بوين بووت و چ وه‌ نه‌زانينن هێڵيگه‌ وه‌ره‌و دوژمنان و خوازين له‌ خواسته‌يل دوژمنه‌ ك له‌يوا ديرێد له‌ لايه‌ن كه‌سێگ و يا لايه‌نێگ سياسی زه‌قه‌ بووت و بڵوزه‌ گرێد. م له‌يره‌ توام يه‌ بويشم ئه‌و برايله‌گ ئيمه‌ی كورد وه‌ يه‌ تاوانبار كه‌ن ك شيعه‌يم و له‌ كورد بوين ئيمه‌ گومان دێرن و وه‌رده‌وام تاوانبارمان كه‌ن، خاس بچن له‌ سه‌ر ئايين خوه‌يان هويره‌و بكه‌ن و ئمجا كه‌مێگيش تاريخ بخوه‌نن تا بزانن كورد بوين مانای چه‌س وه‌ له‌ روی هڵم زگه‌و قسيه‌ی له‌يوا وه‌ ئيمه‌ نه‌كن و جار تره‌كيش ئه‌ی قسيه‌ وه‌ زووان نارن، چوين ئه‌گه‌ر بتوايم بكه‌فيمه‌ ناو باسه‌يل ئايينی ك من شيعه‌م و تو كاكه‌ييد يا ئه‌ڵهه‌قيد و ... ئه‌ی باسه‌يليشه‌ بازگه‌و بكه‌يم، بێجگه‌ له‌وه‌گ قازانجێگ له‌ لی وه‌ر نيه‌گيرمن، به‌ڵكو بووده‌ مه‌مه‌ر يه‌گ بچيم وه‌ره‌و ئه‌و هێڵه‌گ دوژمن توايد. ئينگه‌ بايه‌د هه‌م وريا بويمن و هه‌م هۆشيار وه‌ نه‌يليمن ئه‌ی جووره‌ باسه‌يلی بايه‌ده‌ وه‌رو، ئيجازه‌يش وه‌ هويچ كه‌سێگ نه‌يمن ك ئه‌ی جووره‌ وه‌تنه‌يل چ وه‌ جوور شه‌خسی و چ وه‌ جوور لايه‌ن سياسی يا ئايينی بارێده‌ زووان و له‌ جێ ئه‌ی جوور وه‌تنه‌يل له‌ سه‌ر نه‌ته‌وه‌يی بوين كورد وه‌ ته‌مام پێكهاته‌يليه‌و باس بكه‌يم و هه‌ڵوێستيگ نه‌ته‌وه‌يی داشتوويمن نه‌گ ...!؟.