هویچ گفتوگوویگ بى فه‌لسه‌فه‌ نیه‌ له‌ناونى ملله‌ته‌یل عراق

شفق نيوز

وه‌پیا په‌ڕیگه‌وه‌، بایه‌سه‌ له‌ بانمان بوار یا مه‌جالیگ  واز بكه‌یم ئه‌را گفتوگوو فكرى له‌ناونى ملله‌ته‌یل عراق هه‌ر له‌ كوردیه‌وه‌ بگر تا ڕه‌سیگه‌ عه‌ره‌ب و توركمان و ئاشوورى و كلدان و ئه‌رمه‌نیش، وه‌ل ئه‌وه‌یشا داوه‌ت فكرمه‌نه‌یل بكه‌یم ئه‌را خستنه‌ڕوى ڕاى ئازاد، ك باوه‌ڕ دیریم گشت هه‌وڵیگ  ئه‌را جموجویلداین ئه‌قڵ هه‌ر بایه‌سه‌ سه‌ختتر بووگ له‌ هه‌ر هه‌وڵیگ ئه‌را جموجویلداین لاشه‌یل، ئمجا جیاوازى ڕاى كار خراویگ نیه‌، به‌ڵكوو خراو ئه‌وه‌سه‌ ئه‌و ڕاو ئه‌ڕاى چوینه‌ له‌بان بنه‌ماى نه‌فامى و تونڕه‌وى بووگ.

بیگومان له‌بان ڕى گفتوگوو فكرى راسه‌قینه‌، كوومه‌ڵگایه‌یل رووشنهویر و هوشیار په‌یا بووگ ئه‌ڕامان و دروشم یا شعاریشى وازبوین و په‌یوه‌ندى ئه‌قڵیه‌ له‌بان گشت ئه‌زموونه‌یل زنگ. ئمجا خاستر ئه‌وه‌سه‌ وه‌كارهاوردن وشه‌ى فه‌لسه‌فه‌ وه‌ خراوى ناریه‌یگه‌ كار و نه‌خریه‌یگه‌ چوارچیوه‌ى زانسته‌وه‌، چوینكه‌ فه‌لسه‌فه‌ جویر ئه‌وه‌ك باس له‌لى كه‌ن ئه‌وه‌نه‌ وشك نیه‌، به‌ڵكوو شیه‌وكردن باوه‌ته‌یل وشك یا موعه‌قه‌ده‌، وه‌ل ئه‌وه‌یشا هه‌ق ده‌یمنه‌ هاووڵاتى ك یه‌كه‌مجار هسكردن وه‌ ئازادى نیه‌و هه‌ق ها له‌بان هیزه‌وه‌، له‌ هه‌مان وه‌خت دگانیش وه‌ ئه‌وه‌یا نه‌یم ك په‌یوه‌ندیه‌یل ئنسانى بایه‌سه‌ له‌بان بنه‌ماى وه‌خشین و له‌یه‌كڕه‌سینه‌وه‌ بووگ، نه‌ك له‌بان كیشمه‌كیش و ناكووكى.

فه‌لسه‌فه‌ى ئمڕوو ئه‌وه‌سه‌ ك نه‌خش كاریگه‌ریگ داشتووگ له‌ كوومه‌ڵگاى ئیسه‌مان و هه‌ر یه‌كیگ له‌ئیمه‌یش ك پله‌و پایه‌ى هه‌رچه‌نى بووگ له‌ كوومه‌ڵگا هه‌ر بایه‌سه‌ بفامیگ  ك هاووڵاتییگه‌ ئازاد و ئه‌و ئازادیه‌گه‌یشى مه‌عناى ئه‌وه‌ نیه‌ گووشه‌گیر بووگ ئه‌را خوه‌ى و په‌یوه‌ندى ناونى خوه‌ى و كه‌سه‌یل تر بچه‌كنیگ، به‌ڵكوو مه‌عناى ئه‌وه‌سه‌ گفتوگوو داشتووگ وه‌ل كه‌سه‌یل تر له‌ ڕوڵه‌یل كوومه‌ڵگاى عراقى و جى وه‌جیكردن زیاتر له‌ هووكاره‌یل ره‌سینه‌وه‌ له‌ناونى خوه‌ى و مه‌ردمان تر.

ئیمه‌ له‌ كوومه‌ڵگاى ئیسه‌ى عراقى زیاتر هه‌وه‌جه‌ وه‌ ئه‌قڵانیه‌ت ره‌سه‌ن دیریم، چوینكه‌ هه‌ر له‌زویه‌وه‌ كیشمه‌كیش سووزدارى و چینایه‌تى و لایه‌نه‌یل وژدانى زاڵ بویه‌سه‌ ده‌روینمان و بویه‌ جموجویلده‌ر ئه‌را گشت فكره‌و كرده‌وه‌یلمان.

ئه‌و فره‌یى یا(التعددیه‌)ك ئیمه‌ له‌شوونى گه‌ردیم، بنه‌ڕه‌ت گفتوگووه‌. یه‌یش مه‌عناى قه‌بوولكردن یه‌كتریه‌ وه‌شیوه‌یگ جیاجیا له‌ تایبه‌تمه‌ندى و له‌هه‌مان وه‌خت یه‌كسانن له‌لایه‌ن هه‌ق و ئازادیه‌یله‌وه‌. وه‌ل ئه‌وه‌یشا چوینكه‌ فه‌لسه‌فه‌ قسه‌كردن ئاده‌میزاده‌ وه‌ل ئاده‌میزاد و گفتوگوو هاووڵاتى ئازاده‌ وه‌ل هاوشیوه‌یلیا، دى نه‌بایه‌د رووح فه‌لسه‌فى بچووگه‌ پووس تونڕه‌وى و دوشمنایه‌تى و سته‌مكارى له‌ڕاى، به‌ڵكوو بایه‌سه‌ هاوپه‌یمان ئازادى و قه‌درو حورمه‌ت وه‌رانوه‌ر بووگ.