ئه‌نجامداین كار ڕووژنامه‌نویسى

شفق نيوز

بیگومان ئه‌و ده‌ستوور و قانوونه‌یل كاركردنیشه‌ دیارى ئه‌و چوارچیوه‌ى گشتیه‌ ئه‌كا ك خاوه‌ن كاره‌گه‌ له‌ڕیگه‌یه‌وه‌ ئه‌نجامده‌ر بووگ ئامانجه‌گه‌ى خوه‌ى وه‌پى تیه‌ریگه‌ دى، كار رووژنامه‌گه‌رییش وه‌ك پیشه‌یگ سه‌رچه‌وه‌ى هه‌واڵ و زانیاریه‌ ئه‌را ئه‌وانه‌ك له‌و ڕویه‌وه‌ كه‌نه‌ى سه‌رچه‌وه‌ ئه‌را خوه‌یان، ك ئمڕوو زوورم مه‌ردم ئه‌را ئه‌و مه‌به‌سه‌ پشت وه‌ سه‌رچه‌وه‌یل رووژنامه‌گه‌رى به‌سن، هه‌ر له‌وه‌ر ئه‌وه‌یش بایه‌سه‌ رووژنامه‌نویسه‌یلیش په‌یوه‌س بوون وه‌ بڕیگ قانوون و چشته‌یل پیشه‌یى و كاره‌یلیانه‌وه‌ ك له‌ڕوى مه‌شق و ئه‌نجامداینه‌وه‌ له‌بان بنه‌ماى ئه‌خلاقى و رووژنامه‌گه‌رى تاریف كریاگه‌.

ئه‌وه‌ك زیاتر له‌وه‌رانوه‌ر مه‌یدانه‌ رووژنامه‌گه‌ریه‌گه‌ى كومه‌ڵگا كیشمه‌كیش فره‌یگ له‌بانى كریه‌یگ پیك ناتگه‌ له‌ چوینیه‌تى ئه‌و قانوونه‌یله‌، به‌ڵكوو قسه‌و باسه‌یل زیاتر كه‌فته‌سه‌ بان پابه‌ندى رووژنامه‌نویسه‌یل و كه‌ناڵه‌یل مه‌یدان رووژنامه‌گه‌رى وه‌و قانوون و ده‌ستوور رووژنامه‌گه‌ریه‌وه‌ ك چوارچیوه‌ى كاره‌ رووژنامه‌گه‌ریه‌گه‌ پیكهاوردگه‌. ئنجا له‌ى ڕویه‌وه‌ هه‌میشه‌ ئه‌و پرسیاره‌ له‌وه‌رانوه‌ر ره‌فتار رووژنامه‌نویسى بڕیگ له‌ كومه‌ڵگایه‌یل وجوود دیریگ  ك ئایا رووژنامه‌نویسه‌یلیان تا چه‌نیگ  وه‌ جوانى مامڵه‌ وه‌ل ئى مه‌یدان ژیارى یا حزاریه‌ كه‌ن ك ئه‌ویش گرده‌وكردن و ڕه‌سانن هه‌واڵ و زانیاریه‌ ئه‌را مه‌ردم؟

بیگومان مه‌سه‌له‌ى رووژنامه‌نویسه‌یل و ئه‌نجام نه‌داین كار رووژنامه‌گه‌رى له‌ چوارچیوه‌ پیشه‌یه‌گه‌ى خوه‌ى لایه‌ن زاتى و باوه‌ت خوه‌ى دیریگ و بڕیگ هووكار هه‌س ك ده‌ور دیرن له‌ دروسكردنى، ك به‌ش فره‌یگى له‌ده‌یشت ئیراده‌ى رووژنامه‌نویسه‌یله‌وه‌ دروس بویه‌و كه‌فته‌سه‌ ده‌یشت هه‌ڵكه‌فت سیاسى و كومه‌ڵایه‌تى و ئابوورى كومه‌ڵگا، دویاخریش لایه‌ن زاتى و هووكار ناوخوه‌یى مه‌یدانه‌گه‌یش ك له‌لایگه‌وه‌ كه‌سایه‌تى رووژنامه‌نویس دروسى ئه‌كاو له‌لایگ تریشه‌وه‌ كاریگه‌رى باوه‌ته‌گه‌یش ئه‌ڕاى دروس ئه‌كا، باره‌ رووژنامه‌گه‌ریه‌گه‌ خه‌یگه‌ ژیر پرسیار و رووژنامه‌نویسیش له‌چوارچیوه‌ پیشه‌یه‌گه‌ى خوه‌ى دویر گریگ .

روونامه‌نویس كه‌سیگه‌ وه‌ك كه‌سه‌یل تر دڵى خالى نیه‌ له‌ هس و سووز و بنه‌ڕه‌ت فكرى و ئایدۆلۆژى، گشت ئه‌یانه‌ چشته‌یل خراویگ نین و چشته‌یل خواستیگن، ئنجا ئه‌وه‌ك ڕوى خراویگ وه‌و حاڵه‌ته‌یل ئنسانى و سیاسى و ئایدۆلۆژیه‌ رووژنامه‌نویسه‌ ده‌یگ ، ئه‌ویش تاویانه‌وه‌ى رووژنامه‌نویسه‌گه‌س له‌ناو ئه‌و حاڵه‌ته‌یله‌ وه‌و شیوه‌ ك مه‌سه‌له‌یل  ئایدۆلۆژى و سیاسى شوون بنه‌مایه‌یل ئه‌خلاقى رووژنامه‌گه‌رى و مه‌سه‌له‌ى كاروه‌پیكریاگه‌گه‌ى بگریگه‌وه‌و په‌یامه‌گه‌ى له‌ ره‌سانن ئامانجه‌یل تایبه‌ت و ئنتماى سیاسیه‌گه‌ى خود خوه‌ى كوڵه‌و بكا. ئنجا گرنگترین ئه‌و بنه‌مایه‌یله‌ ك كار رووژنامه‌گه‌رى له‌بانیان دامه‌زریاگه‌ و موور كاره‌گه‌(كار رووژنامه‌نویسى)نیشان ده‌یگ پیكهاتنه‌ له‌(وه‌رپرسیاریه‌تى، سه‌روه‌خوه‌یى و بیلایه‌نى، مقه‌یه‌تیكردن له‌ هه‌ق مه‌ردم، راسگوویى له‌ ره‌سانن هه‌واڵ و زانیارى).