عراق ئمڕوو و كورده‌يل فه‌يلى

شفق نيوز

ئه‌را گشت فيليه‌يل

ئه‌را قوروانيه‌يل

ئه‌را ئه‌و داڵگه‌يله‌ ك چه‌وه‌يليان له‌ گيرستن چه‌رمگه‌و بوى

سڵام له‌ گشتدان

ئه‌را ته‌مامكردن باوه‌ت بلاوكرياگ وه‌رينم باس له‌ تازترين تاوانيگ ده‌رهه‌ق فه‌يليه‌يل و شه‌هيده‌يل فه‌يلى بزان ك هيمان ديوار زيندانه‌يل هاواره‌يل جايه‌ڵ جوانه‌يل بيسه‌روشوونمان دواره‌ ئه‌كه‌ن، ته‌نانه‌ت تائيسه‌يش فريشته‌يل وه‌لمانا كه‌فتنه‌سه‌ په‌يكردن ته‌رم شه‌هيده‌يلمان، هيمان تائيسه‌ گشت تاوانه‌يل و ئه‌سر چه‌و داڵگه‌يل و حه‌سره‌ته‌يليان هه‌ر جوور خوه‌يه‌، يه‌يش دوياى ئه‌و هه‌مگه‌ قوربانيه‌يل ك پيشكه‌شى وه‌ى وڵاته‌ كرديم، حكومه‌ت گشت مه‌ينه‌تيه‌يليگ له‌ليمان زياى كرد ته‌نانه‌ت حه‌سره‌ت نه‌مرى شه‌هيده‌يلمانيش!!

ئمجا دوياى 10 ساڵ له‌ هه‌وڵ فريه‌يگ ئه‌را دامه‌زرانن په‌يكه‌ر شه‌هيده‌يل كورد كورد فه‌يلى، ئه‌و ته‌نيا يادگاريه‌ ك باس له‌ مه‌ويسى و مه‌ينه‌تيه‌لمان ئه‌كاو ديداريگ وه‌ل نه‌خشه‌ساز و جيوه‌جيكاره‌گه‌ى كردم وه‌رجه‌ چه‌ن ساڵێگ ك زويتر له‌اوه‌ت وه‌رين وه‌ ته‌مامى باسى سازكردنى كردمه‌و دوياى ده‌ ساڵ له‌ مه‌ينه‌تى، حكومه‌ت ئيسه‌ بڕيار دا ئه‌و په‌يكه‌ر كورده‌يل فه‌يليه‌ بخاده‌ زبڵدان و به‌ڵكوو ميزخانه‌ى سه‌كرانه‌يل!!

يه‌يش وه‌بى ئه‌وه‌گ كه‌سيگ بزانێد، وه‌بى وازكردن و وه‌بى ئاماده‌بوين، له‌ ناوڕاس دو جاده‌ ك بويه‌سه‌ زبڵدان و شوون ميزكردن سه‌كرانه‌يل له‌ جاده‌يگ لاوه‌كى پيس، ك شۆفڵ هات و بڕيگ زبڵ و پاشماوه‌و پيسى هه‌ڵگرت و بڕيگ خشت وكوچگ ئه‌رزانقيمه‌ت دانان و ئه‌و په‌يكه‌ر مێژوويى كورده‌يل فه‌يلييشه‌ لاوريا!! يه‌يش جوور ئه‌وه‌گ رووڵه‌يلمان وه‌ تيه‌ريكى كوشيا، ئمجا ئه‌يه‌سه‌ به‌عس تازه‌ ك ته‌نيا يادگاريه‌يلمان له‌ تيه‌ريكى له‌ناو به‌ێد و ئى حكوومه‌ته‌ ئه‌و ته‌نيا مه‌يدانيشه‌ ئه‌رامان نه‌يشته‌و ك يادگارييگ شه‌هيد فه‌يلى له‌تى بنه‌يم.

دى نازانيم و چوين و ئه‌ڕاچه‌ ئى كرده‌وه‌ ئه‌نجام درياگه‌، وه‌لێ تاوانه‌ ئه‌جام درياگه‌و ئى ره‌سميشه‌ شايه‌تيده‌ره‌، منيش بانگه‌واز گشت كه‌سيگ ناكه‌م، به‌ڵكوو ئويشم: ئه‌ى ئه‌وانه‌گ ك تووزيگ غيره‌ت له‌لايان مه‌ندگه‌، ئه‌وه‌سه‌ مێژوودان و قوروانيدان و شه‌هيده‌يلدان خريا ناو زبڵدانن ئايا ئيوه‌ فكردان چه‌س؟!!

عسام ئه‌كره‌م فه‌يلى