كورد و گامه‌يل سه‌روه‌خوه‌يى

عه‌بدوڵڵا جه‌عفه‌ر كوفلى

شه‌فه‌ق نيوز/ هه‌وڵه‌يل فراوان ئه‌دێ و سه‌ردانه‌يليش زياى ئه‌كه‌ن جوور جموجويل مرووژه‌و مه‌گه‌س هه‌نگ و هه‌ركه‌سيگ له‌ رووڵه‌يل نه‌ته‌وه‌يل كورد كار له‌بان كيشه‌يل خوه‌ى ئه‌كاو گام جدى نريه‌ێد وه‌خاتر وه‌ده‌سهاوردن موحيبه‌ت كومه‌ڵگاى ناوده‌وڵه‌تى وه‌و ئومێده‌ بڕه‌سنه‌ ئه‌زه‌ره‌ته‌يليان و ئامانجه‌يل نه‌خشه‌داريان وه‌ دريژايى سه‌ده‌يگ له‌ خه‌بات وه‌رده‌وام، چوينكه‌ بيبه‌ش كريان له‌ ده‌سكه‌فته‌يل به‌رژه‌وه‌ندى ناوده‌وڵه‌تى، ئمجا له‌ رووژه‌يل گوزه‌يشته‌ كۆنفرانسيگ له‌ زانكۆى ئه‌مريكى له‌ دهۆك ساز كريا له‌باره‌ى سه‌روه‌خوه‌يى كوردستان ك ئه‌را ماوه‌ى دو رووژ وه‌رده‌وام بوى و باڵوێزه‌يل وه‌رين و نوێنه‌ره‌يل ناوده‌وڵه‌تى و گه‌ورا وه‌رپرسه‌يل حكومى و حزبى و مامۆستاو ئه‌كاديمى و لايه‌نگره‌يل كيشه‌ى ملله‌ت كورديش له‌تى به‌شدارى كردن و هه‌ر كه‌سيگ له‌ليان قه‌وڵ خوه‌ى وت و ئاشكراى هه‌ڵويست كرد ئه‌را وه‌رگرتن مافه‌يل ئى ملله‌ته‌ له‌ بنيات قه‌واره‌يگ سه‌روه‌خوه‌ى، وه‌لێ وه‌ ديد و شيواز جياجياو گشت به‌شداربويه‌يليش جه‌خت له‌وه‌ كردن ك سه‌روه‌خوه‌يى مافيگ ياسايى و شه‌رعيه‌و ئى بارودوخه‌گه‌ گونجياگه‌ ئه‌را ئعلانكردنى وه‌تايبه‌ت له‌ كوردستان باشوور، چوينكه‌ ده‌وڵه‌ت عراقى تواناى مقه‌يه‌تيكردن ئى پيكهاته‌ نه‌يرێد له‌ ملله‌ته‌گه‌ى، به‌ڵكوو وه‌چه‌واشه‌وه‌ ده‌وڵه‌ت عراقى ترس له‌لاى تاك كوردستانى كاڵيه‌و له‌ چه‌نه‌ها قوناغ مايه‌ى هه‌ڕه‌شه‌ى واقعى بويه‌ له‌بانى وه‌شيواز جياجيا له‌وه‌ر خاتر كپه‌وكردنى و نه‌هيشتنى له‌ وجوود، وه‌و خاتريشه‌ گامه‌يل كورد وه‌ره‌و سه‌روه‌خوه‌يى له‌ى خاڵه‌يله‌ خوه‌ى ديونێده‌و:

دانيشتن و گفتگوو له‌وه‌ر جيوه‌جيكردن ريككه‌فتنه‌يل وه‌ جوانى و ئارامى نه‌ك وه‌ تون وتيژى، وه‌ل ئه‌وه‌يشا چاره‌سه‌ر كيشه‌يل و قه‌يرانه‌يل رووشنايى ئه‌وه‌خشێد وه‌شيوه‌ى دانيشتنيگ و له‌بان گشت ئاسته‌يل، چوينكه‌ تون وتيژى ته‌نيا تون وتيژى و خوسه‌و كينه‌ت له‌لى ئه‌كه‌فێده‌و، هه‌ر وه‌و خاتريشه‌ شيواز سه‌ركه‌فتك له‌ جيوه‌جيكردن ده‌سكه‌فته‌يل ته‌نيا دانيشتنه‌ چ له‌ناوخود يا ده‌ورگرد هه‌رێمى وه‌ل ئاشكراكردن دێد ستراتيجيه‌ت سه‌ركردايه‌تى كوردستانى، ئمجا داواكردن سه‌روه‌خوه‌يى ماناى هه‌ڕه‌شه‌ و ده‌سوه‌شانن نيه‌ له‌ به‌رژه‌وه‌نديه‌يل، به‌ڵكوو مه‌سه‌له‌ى هاوسايى و ئاڵشت وئوڵشت به‌رژه‌وه‌نديه‌يله‌ وه‌ل وازكردن قاپى گفتگوو وه‌ل هيزه‌يل سياسى ناوخوه‌يى له‌وه‌ر ره‌سين ئه‌را چاره‌سه‌ر كيشه‌يل سياسى و دارايى ك ملله‌ت وه‌ده‌سيه‌و ناڵنن و ره‌سيه‌سه‌ راده‌ى دڵته‌نگى و له‌هه‌مان وه‌خت مه‌سه‌له‌ى ته‌نازول له‌بان ئى ماف ره‌وا له‌ سه‌روه‌خوه‌يى.

 

كاراكردن خه‌ت دبلۆماسى و فراوانكردن بازنه‌ى په‌يوه‌نديه‌يل ناوده‌وڵه‌تى وه‌ل ده‌وڵه‌ته‌يل هه‌رێمى، وه‌ل ئه‌وه‌يشا دويره‌وگرتنيش به‌رهه‌م نايه‌رێد، وه‌تايبه‌ت ده‌وڵه‌يل گه‌وراهيز و هه‌ميشه‌ ئه‌ندام له‌ ئه‌نجومه‌ن ئاسايش وه‌ل فيشتركردن په‌يوه‌نديه‌يل وه‌ل ريكخرياگه‌يل ناوده‌وڵه‌تى و په‌يوه‌س وه‌ بوار مافه‌يل ئاده‌ميزاد و پيشكه‌شكردن پشتگيرى ئه‌را كووچ وه‌پيكرياگه‌يل و كووچبه‌ره‌يل و گرده‌وكردن گشت كورده‌يل كووچبه‌ر ئه‌را ئه‌مريكاو ئۆرپا و كه‌نه‌داو ئوستراليا و پشتگيريكردنيان له‌بان بنه‌ماى نه‌ته‌وه‌يى نه‌ك حزبى يا تايفى و دامه‌زرانن لۆبى له‌ جاليه‌ى كورد تا بدێده‌ وه‌ره‌قه‌ى فشار له‌بان بڕيار ناوده‌وڵه‌تى و تواناى كاريگه‌رى داشتوود له‌بان راى گشتى جه‌هانى ئه‌را خواست پشتگيرى ئى نه‌ته‌وه‌ له‌ سه‌روه‌خوه‌ييه‌گه‌ى.

 

ته‌وزيفكردن گشت رويداگه‌يليگ ك هاته‌سه‌ تويش هه‌رێم له‌ حكومه‌ت و ملله‌ت، جوور روى وه‌ڕوى بوينه‌وه‌ى ريكخرياگ داعش ك گه‌وراترين هه‌ڕه‌شه‌ پيكهاوردگه‌ ئه‌را ئاسايش جه‌هانى و پێشمه‌رگه‌يش ته‌نيا هيزيگه‌ ك جه‌نگ وه‌ليانا ئه‌كا، وه‌ل شماره‌ى فريه‌ى په‌نابه‌ره‌يل و كووچبه‌ره‌يل وه‌ جووريگ ك هه‌رێم بويه‌سه‌ ماوايگ ئه‌رايان و وه‌ل وجوود غورفه‌ى فه‌رمانده‌يى هاوپه‌يمان ناوده‌وڵه‌تى ك جه‌نگ داعش ئه‌كا له‌ هه‌ولێر و بيجگه‌ ئه‌وه‌يش مه‌شقكاره‌يل و راوێژكاره‌يل سه‌ربازى وه‌ل پێشمه‌رگه‌ له‌ به‌ره‌يل جه‌نگ و ته‌وزيفكردن گشت ئه‌و مه‌سه‌له‌يله‌ وه‌شيوه‌يگ سياسى و دراوردنى له‌ چوارچيوه‌ى ئنسانى و هه‌وڵ گفتگوو سياسى وه‌ل كومه‌ڵگاى ناوده‌وڵه‌تى و باسكردن كيشه‌ى كورد له‌ مه‌يدانه‌گه‌ له‌ ده‌روازه‌ى سياسيه‌و وه‌ تاميگ پڕ ديد ئنسانى و دوير له‌ سووزدارى.

 

نه‌فوه‌رگرتن له‌ئه‌زموون ده‌وڵه‌ته‌يل تازه‌ دامه‌زرياگ جوور ته‌يموور خوه‌رهه‌ڵاتى و باشوور سودان و بۆسنه‌و خوه‌نينه‌وه‌ى بارودوخ وه‌رده‌وام له‌و ده‌وڵه‌ته‌يله‌و ئاشكراكردن خاڵه‌يل وه‌هيز و خاڵه‌يل كز، يه‌يش وه‌ له‌وه‌رچه‌وگرتن واقع هه‌رێم كوردستان و بار ده‌ورگردى.

 

يه‌كێتى ڕزه‌يل ناوخوه‌يى له‌ناونى ملله‌ت و هيزه‌يل سياسى و پشت به‌ساننى له‌ بنه‌ڕه‌ته‌و ئه‌را ده‌سوه‌پيكردن وه‌ره‌و ئعلانكردن سه‌روه‌خوه‌يى و بڵا,كردنه‌وه‌ى هوشيارى رووشنهويرى له‌ناونى هاووڵاتيه‌يل وه‌ئه‌وه‌گ سه‌روه‌خوه‌يى زه‌مانه‌ته‌ ئه‌را مافه‌يل، چوينكه‌ پشتگيرى ناوده‌وڵه‌تى هه‌رچوينيگ بدێ ئه‌را سه‌روه‌خوه‌يى وه‌ل نه‌وين وجوود بار گونجياگيگ ئه‌را ئه‌و مه‌سه‌له‌ له‌ڕوى ناوخۆييه‌و به‌رهه‌م نايه‌رێد، ئمجا جياوازى له‌ فكر ماناى دژايه‌تى نيه‌، به‌ڵكوو جورايه‌تيه‌ له‌ ديد و نوڕستن ك ئه‌دێده‌ مايه‌ى بته‌وكردن كومه‌ڵگاى كوردستانى جوور ديواريگ قايم.

 

داين بڕيار، گشت بڕياريگيش هه‌ڵگر به‌شيگه‌ له‌ تيه‌ريكى و به‌شيگيش له‌ رووشنايى و هه‌وه‌جه‌ وه‌ قوربانى و جورئه‌ت ديرێد و له‌ زوورم قوناغه‌يليش مه‌سه‌له‌ى ترس له‌و بڕياره‌يله‌ بويه‌ ك نه‌تويه‌نێد بڕه‌سێده‌ ئامانج، هه‌ر وه‌و خاتريشه‌ ئويشيم: ژيان ده‌رفه‌ته‌و بڕيار سه‌ركردايه‌تى سياسى ك وه‌هيز مه‌ردم كوردستانى پشتگير ئه‌دێ بايه‌سه‌ حه‌كيمانه‌ بدێ وه‌تايبه‌ت له‌ ئعلانكردن سه‌روه‌خوه‌يى، ئه‌ويش له‌وه‌ر ئه‌وه‌گ ده‌رسه‌يل پڕ ژان وه‌رين دوباره‌وه‌ نه‌ون.

 

دوياخريش ئومێد فريه‌يگ ديرێم ك وه‌ له‌وه‌رگرتن ئى گامه‌يله‌ نزيكه‌و بويمن له‌ سه‌عات يه‌كلاكردنه‌وه‌و خاڵ چه‌وه‌ڕيكرياگ وه‌ دريژايى ماوه‌ى گوزه‌يشت تا ئى ملله‌ته‌ خوه‌شاڵ بدێ وه‌ قه‌واره‌ى سه‌روه‌خوه‌يى و رۆڵ خوه‌ى بوينێد له‌ بنياتناين ژيار ئنسانى جوور ئه‌وساو له‌ هه‌مان وه‌خت هه‌وڵه‌يل سه‌ركردايه‌تى سياسى كوردستانييش پيرووز و به‌رهه‌مداره‌ وه‌تايبه‌ت رۆڵ سه‌رۆك مه‌سعود بارزانى، وه‌لێ چه‌وه‌ڕى فيشتر و فيشتر ئه‌كريه‌ێد.

عه‌بدوڵڵا جه‌عفه‌ر كوفلى