كورد له‌ ئاینده‌ى خوه‌رهه‌ڵات ناوڕاس

شفق نيوز

ئه‌را ئه‌و رویداگه‌یله‌ ك له‌ خوه‌رهه‌ڵات ناوڕاس رویده‌ن، وه‌ل ئه‌وه‌یشا دیاره‌ رووژ وه‌رووژ دژایه‌تى مه‌ردم خوه‌رئاوا له‌ وه‌رانوه‌ر عه‌ره‌ب و موسڵمان هه‌ڵویستیگ وه‌رده‌وامه‌، ك یه‌یش دویر نیه‌ بووده‌ مایه‌ى سه‌خته‌وبوین په‌یوه‌ندیه‌یل ستراتیجى و ئابوورى و سیاسى، بیجگه‌ ئه‌وه‌یش ده‌وڵه‌ته‌یل خوه‌رئاوا مه‌حاڵه‌ زاڵ بوونه‌ بان ئازادى راده‌رخستن ملله‌ته‌یلیان له‌ وه‌رانوه‌ر ده‌وڵه‌ت و ملله‌ته‌یل موسڵمان، ك یه‌یش له‌یوا كردگه‌ هه‌میشه‌ سووكایه‌تى وه‌ باوه‌ڕ و دین ئسلام بكریه‌ید له‌و وڵاته‌یل خوه‌رئاواییه‌ جوور ئه‌وه‌ك له‌ى دویاخره‌ رویداو فیلم سووكایه‌تیكردن وه‌ په‌یامبه‌مبه‌ر ئسلام(س. خ)ده‌ركریاو دژایه‌تى فره‌یگ له‌لى كه‌فته‌وه‌و قه‌درو حورمه‌تیگ نه‌گیریا له‌ ملله‌ت موسڵمان و هه‌ڵبه‌ته‌ یه‌یش كار یه‌كه‌مجار نیه‌و هه‌میشه‌ له‌لایه‌ن وڵاته‌یل یه‌كگرتگ و خوه‌رئاوا ئى جووره‌ كرده‌وه‌یلیگ دژ دین ئسلام و عه‌ره‌ب وه‌تایبه‌ت هه‌ر وه‌رده‌وامه‌.

 

بیجگه‌ ئه‌وه‌یش كیشه‌ى ناوخود عه‌ره‌ب و له‌وڵاته‌یل عره‌بى له‌ دژایه‌تیكردن یه‌كترى له‌ئاست مه‌زه‌وى و چینایه‌تى و نه‌ته‌وایه‌تى، یه‌یش به‌ڵگه‌یگ تر وه‌رده‌وامى كیشمه‌كیش بى كووتاى ناوچه‌گه‌س ك ئاینده‌ى سه‌ختیگ له‌لى كه‌فیده‌وه‌و ناسه‌قامگیرى ئاشكرایگ له‌ زوورم وڵاته‌یل وه‌هار عه‌ره‌بى نیشانه‌ى سه‌ره‌تاى گرژه‌وبوین ژیان هاوبه‌ش و یه‌كسانى و جیاوازیه‌، ك هه‌رچه‌نى ناوى نریاگه‌ نه‌خشه‌ڕى ك وه‌ماناى ئاڵشتكاركردن رژیمه‌یل سته‌مكارى و دیكتاتۆریه‌ته‌ ئه‌را رژیمه‌یلیگ دیموكراسى و پڕ ئازادى، وه‌لى  گشت ئى رویداگه‌یلیشه‌ له‌ به‌رژه‌وه‌ندى وڵاته‌یل خوه‌رئاواو ئه‌مریكاس ك هه‌ر له‌ زویه‌و نه‌خشه‌ ئه‌را له‌ناوبردن ئارامى و ئاسووده‌یى ئى ناوچه‌ دانانه‌و ئامانج له‌لى ئه‌وه‌سه‌ كه‌مه‌ كه‌مه‌ كلتوور ته‌بایى و گونجیان ناونى پیكهاته‌و ره‌گه‌زه‌یل جوراوجوور له‌كه‌دار بكه‌ن و خوه‌یانیش له‌ دویره‌و ته‌ماشا بكه‌ن.

 

ده‌یه‌ها ساڵیشه‌ عه‌ره‌ب به‌شیگ له‌ خاك فلستین له‌ده‌سداگه‌و هیمان نه‌تویه‌نستگه‌ وژه‌یگ له‌لى ئازاد بكا، یه‌یش ماناى ئه‌وه‌سه‌ ك پشتگیریكردن عه‌ره‌ب له‌ یه‌كترى ته‌نیا ره‌سانن یا ئعلامه‌و له‌وه‌رانوه‌ر ده‌وڵه‌ت ئسرائیل كز و بیده‌سڵاتن.

 

كورد له‌ى ئاڵشتكاریه‌ وه‌ گووره‌ى شیه‌وكردن و له‌یه‌كه‌وداین بار ناوچه‌گه‌، نزیكه‌ له‌ ده‌سڵات سه‌روه‌خوه‌یى، توركیا ئه‌گه‌ر تا دویه‌كه‌ دژ هه‌رێمیگ كوردى بوى، وه‌لى ئمڕوو له‌وه‌ر به‌رژه‌وه‌ندى ستراتیجى خوه‌ى ناچاره‌ دگان وه‌ هه‌ق ملله‌ت كورد بنه‌ید له‌ هه‌رێم كوردستان و هه‌وڵ و ته‌قلاى له‌وه‌رانوه‌ر خستن كورد گرفت گه‌ورایگ بوى له‌وه‌رده‌مى و دویاجاریش ناچاره‌ وه‌ چاره‌نویس رازى بوود.

 

وه‌لى له‌یرا تا چ راده‌یگ كورد تویه‌نید خوه‌ى له‌ژیر فشار عه‌ره‌بى و ده‌وڵه‌ته‌یل هاوسا ده‌ربكاو هه‌قه‌یل سه‌روه‌خوه‌یى خوه‌ى باریده‌ ده‌س؟ ئایا ئه‌رك كورد له‌وه‌رانوه‌ر كیشه‌ى نه‌ته‌وایه‌تى و نه‌خشه‌یل سیاسى چه‌س؟ ئایا كورد ره‌سیده‌ مه‌رام خوه‌ى و پشتگیرى له‌لى كریه‌ید؟

 

جواو ئى پرسیاره‌یله‌ گشتى له‌ هویر و باوه‌ڕ ده‌وڵه‌ته‌یل گه‌وراهیز و خود سه‌ركرده‌یل كورد و نه‌یاره‌یلى جه‌مه‌و بویه‌و چه‌وه‌ڕى زایه‌ڵه‌ى ده‌نگ ئه‌و سه‌روه‌خوه‌ییه‌ كه‌ن كه‌ى ئاشكرا بكریه‌ید، هه‌ر له‌وه‌ر ئه‌وه‌یش ئه‌رك كورد وه‌تایبه‌ت له‌ى قوناغه‌و قوناغه‌یل ئاینده‌ بیجگه‌ یه‌كگرتن ناوخوه‌یى و له‌وه‌رچه‌وگرتن به‌رژه‌وه‌ندى باڵا وه‌ل ئه‌وه‌یشا هه‌وڵ و ته‌قلاى دبلۆماسیه‌ت و سیاسه‌ت و ره‌فتاركردن كورد وه‌ل وڵاته‌یل ده‌وروه‌ر گرینگترین نه‌خشه‌یگه‌ ئه‌را ده‌سه‌وه‌ركردن ئاینده‌.

 

ئیمه‌ ئه‌گه‌ر ته‌ماشاى ده‌س ده‌وڵه‌ته‌یل داگیركه‌ر بكه‌یم، ئه‌وان هه‌میشه‌ توان ژیرده‌سه‌ى ئه‌وان بویمن و گشت ده‌سڵاتیگمان وه‌ فه‌رمان ئه‌وان بوود، بیگومان وه‌ى جووریشه‌ مه‌حاڵه‌ بتویه‌نیم ئاینده‌ى سیاسى و جوگرافى و ئابوورى و كوومه‌ڵایه‌تیمان وه‌ره‌و چاره‌نویس بنه‌ڕه‌تى بووه‌یم. چاره‌نویس كورد له‌ ئاینده‌ى خوه‌رهه‌ڵات ناوڕاس ئاشكراو دیاره‌، چوینكه‌ مه‌سه‌له‌ى دامه‌زرانن ده‌وڵه‌ت كوردى بویه‌سه‌ جى باس فكرمه‌ن و سیاسى و ده‌وڵه‌ته‌یل هه‌رێمى و ناوچه‌گه‌، ك گشت ئه‌یه‌یش له‌ به‌رژه‌وه‌ندى كورده‌ وه‌ره‌و سه‌روه‌خوه‌یى، وه‌لى وه‌ مه‌رجیگ حزب و لایه‌نه‌یل كورد گشت جیاوازییگ بخنه‌ كنارو هویر له‌ به‌رژه‌وه‌ندى باڵاى ملله‌ت بكه‌ن.

 

جه‌ماڵ ئه‌ركه‌وازى