كام جیاوازی؟

شفق نيوز

وه‌لی ئه‌وه‌ك دوينريا له‌ی عراق دويای سه‌دامه‌ جوور ئه‌وه‌ك خوازريا ده‌رنه‌چی، به‌ڵكوو له‌ چه‌ن لايه‌نيگه‌و ئه‌تويه‌نيم بويشيم خراوتر بوی. ئه‌را نموونه‌: سه‌دام وه‌گشت دڕنده‌يی و فاشيه‌ت خوه‌يه‌و رووژيگ له‌ رووژان ك له‌ جه‌نگيش بوی كارت بودجه‌و مووچه‌ی دژ كورد ناورده‌ كار، وه‌لی ته‌ماشای ئی حكوومه‌ت تازه‌ی عراقه‌ بكه‌ ك ئه‌را ماوه‌ی ١٠ مانگه‌ بودجه‌ وه‌گووره‌ی ده‌ستوور عراقی بايه‌س بوی ١٧% كلبكرياتاد ئه‌را هه‌رێم كوردستان، كلينه‌كرد و وه‌ل ئه‌وه‌يشا وه‌ بڕياريگ ديكتاتۆرانه‌ و ملهوڕانه‌ی نوری مالكی سه‌رۆك وه‌زيره‌يل وه‌رين عراق ئه‌ويش بڕياگه‌ ك بويه‌سه‌ مايه‌ی په‌يابوين بار ئابووری خراويگ ئه‌را مه‌ردم كوردستان.

هه‌رچه‌نی خه‌ڵك كوردستان فريه‌ وه‌ سه‌بره‌و روی وه‌ڕوی ئه‌و كارت فشاره‌ بوينه‌سه‌وه‌و سه‌ربه‌رزانه‌ له‌وه‌رانوه‌ری وسياگه‌، وه‌لی وه‌ل ئه‌وه‌يشا ئی بڕياره‌ تاڕاديه‌گ كاريگه‌ری ناسه‌ بان ژيان مه‌ردم و جموجويل بازاڕ.

ئمجا حكوومه‌ت عراقی هه‌ر وه‌و كار ناڕه‌وايشه‌و نه‌وسيا، به‌ڵكوو هه‌وڵ پريگيش ئه‌ياد ئه‌را ئه‌وه‌ك ريگری له‌ هه‌رێم بكا ك نه‌فت وڵات خوه‌ی له‌ بازاڕه‌يل جه‌هان بفرووشيد ك هه‌رچه‌نی ده‌ستوور عراقيش ئه‌و مووڵه‌ته‌ وه‌پی نه‌ياگه‌، ك ئه‌وه‌سه‌ دوينيم رووژانه‌ ها له‌هه‌وڵ ئه‌وه‌ فشار بخاده‌ بان وڵات و كومپانيايه‌يل تا نه‌فت كوردستان نه‌سينن و بايكۆتی بكه‌ن.

بفه‌رما ئيسه‌يش داعش روی شه‌ڕه‌نگيزی كرده‌سه‌ كوردستان و پێشمه‌رگه‌ی كوردستانيش ئه‌را وه‌رگری له‌ خاك و سه‌روه‌ری خوه‌ی بايه‌س بوی حكوومه‌ت عراق بيجگه‌ ئه‌وه‌ك بايه‌سه‌ خوه‌ی چه‌ك و جبه‌خانه‌ ئه‌را پێشمه‌رگه‌ دابين بكا، وه‌لی دوينيد ڕی وه‌ وڵاته‌يل ده‌ره‌كييش نايه‌يد چه‌ك ره‌وانه‌ی كوردستان بكه‌ن و بڕه‌سيده‌ ده‌س پێشمه‌رگه‌، يه‌يش بيجگه‌ ئه‌وه‌ك چه‌نه‌ها ساڵه‌ بودجه‌ی پێشمه‌رگه‌ گير داگه‌و خوه‌ی ئه‌خواده‌ی.

له‌ڕاسی گومان فريه‌يگ ئه‌كريه‌يد ك حكوومه‌ت عراقی وه‌ مه‌رامه‌و شار موسڵ ئه‌را ترۆريسته‌يل داعش چووڵ كردويد و ئه‌و هه‌مگه‌ چه‌كه‌يل پيشكه‌فتگه‌ ك وه‌ملياره‌ها دۆلار مه‌زه‌نه‌ ئه‌كريه‌يد ئه‌ويش وه‌ مه‌رام ئه‌را ئه‌وان وه‌جی هيشتويد ئه‌را ئه‌وه‌ك له‌يه‌ودويا داعش دژ كورد باريده‌ی كار ك ئيسه‌ له‌ جه‌نگه‌يل ئه‌يه‌ريده‌يانه‌ كار.

هه‌نای ئاده‌ميزاد نوڕيده‌ ئی ره‌فتاره‌يل سه‌ران حكوومه‌ت عراقيه‌ ده‌رهه‌ق هه‌رێم كوردستان ناتويه‌نيد جياوازی ته‌ماميگ وه‌ل ره‌فتاره‌يل داعش بوينيده‌و بيجگه‌ ئه‌وه‌ك حكوومه‌ت عراقی تا ئيسه‌ جه‌نگ چه‌كداری دژمان ئاشكرا نه‌كردگه‌.

ئه‌وه‌سه‌ له‌ دويا ئاشكراكردنيگ حه‌يده‌ر عبادی ك له‌يوا زانستيم جياوازه‌ له‌ مالكی وه‌ئاشكرا ئويشيد(من نه‌ قه‌وڵ بودجه‌و مووچه‌ دامه‌و نه‌يش بودجه‌و كووچه‌يش ره‌وانه‌ ئه‌كه‌م، بفه‌رمان .. دی كام جياوازی؟

سه‌لام عه‌بدوڵڵا

ج . أ