نه‌يليد ناخوه‌شيه‌يل ژيان شكه‌ست وه‌پيد بارن!!

شفق نيوز

هه‌ميشه‌ هه‌وڵ ئه‌وه‌ بيه‌ بته‌و بويدو روی وه‌ڕوی كيشه‌يل بوو، خودايش ها وه‌ل ئه‌و كه‌سه‌يله‌ ك ئارام گرن، دی تنيش بيئوميد مه‌و له‌وه‌ختيگ تيريگ له‌ نزيكترين كه‌سده‌و ڕوی له‌ دڵد ئه‌كا، چوينگه‌ دوينيد تيره‌گه‌ ده‌رچوود و ژيان ئه‌راد ئه‌يه‌يده‌و.

گشت ئه‌زره‌ته‌يلد وه‌ ناكه‌سيگه‌و گريه‌ مه‌يه‌، گه‌شت ژياند ئه‌را ته‌نيا كه‌سيگ ته‌رخان مه‌كه‌، وه‌و مانا ك ژياند بيلا ته‌نيا ئه‌را كه‌سيگ نه‌ود، له‌يوا مه‌زان كووتايی چشته‌يل كووتايی ژيانه‌، ژيان هه‌ر ئه‌وه‌ نيه‌ ك چه‌ويل ت دوينيده‌ی.

چه‌وه‌ڕی خوه‌شه‌ويسی كه‌س مه‌كه‌، هه‌ميشه‌ چه‌وه‌ڕی رووشناييگ بكه‌ تا خانگه‌يل تيه‌ريكد ئه‌راد رووشنه‌و بكاو ئوميد وه‌پيد بووه‌خشيد، له‌يوا مه‌كه‌ ئه‌زره‌ته‌يلد داگيرد بكه‌ن، هه‌وڵ بيه‌ چشته‌يل و كيشه‌يلد سه‌ره‌تای ئاره‌زوو تازه‌يگ بوود، هه‌ميشه‌ چه‌وه‌ڕی رووژ تازه‌و سوويگ تازه‌ بكه‌.

فريه‌جار له‌ناو خه‌م و ناخوه‌شيه‌يل نقوم بويم، ئه‌ويش وه‌ جووريگ هووكاره‌ی بويم ك له‌ هويرمان چوود ژيان پڕه‌ له‌و چشته‌يله‌ ك دڵخوه‌شمان ئه‌كاو ئه‌گه‌ريش وه‌ره‌و روی ئه‌و چشته‌يله‌ بچيم شايه‌ت تيه‌ريكيه‌يل بوونه‌ رووشنايی، ئمجا بگه‌رده‌ شوون دڵيگ رووشنايی وه‌پيد بيه‌يدو له‌يوا مه‌كه‌ دڵد بووده‌ به‌نه‌ی خه‌م و تيه‌ريكی.

ئه‌گه‌ر زمسان قاپی ماڵه‌گه‌د به‌ساو ئابڵوقه‌ی دا، نگه‌ران مه‌و، چه‌وه‌ڕی هاتن وه‌هار بكه‌، ده‌روه‌چه‌يلد واز بكه‌و هه‌وای پاك هه‌ڵمژ و ته‌ماشای دوير بكه‌ تا چه‌ود بكه‌فيده‌ باڵنده‌يل ك چوين گله‌وخوه‌ن و خوه‌ر ئه‌ڵايدو ژيان تازه‌يگ و وه‌هار ده‌س وه‌پی ئه‌كا، هه‌ر وه‌و خاتريشه‌ خوه‌د هان بيه‌ تا هس قويليگ داشتويد و يه‌ك چركه‌يش وه‌ خه‌م و ناخوه‌شی مه‌وه‌ سه‌ر.

گه‌شت ئه‌را بياوان مه‌كه‌ن، چوينكه‌ بياوان بيجگه‌ له‌ وشكی هويچ تر له‌تی نيه‌، هوير له‌ دويه‌كه‌و چه‌و چشته‌يله‌ ك له‌ده‌سی دايده‌ مه‌كه‌، وه‌ختی گه‌ڵا ئه‌كه‌فيده‌ بان زه‌وی دوباره‌ ناچێده‌و ئه‌را قه‌ی داره‌گه‌ی، وه‌لی وه‌ل هاتن وه‌هار دوباره‌ گه‌ڵای تازه‌ ده‌رئه‌كا، ته‌ماشای ئه‌و گه‌ڵايه‌يله‌ بكه‌ ك دراه‌يل وشكه‌وبوی پووشن و سه‌وزايی ئه‌رای ئه‌يه‌رنه‌و.

ئه‌گه‌ر دويه‌كه‌د له‌ده‌س دايد نگه‌ران مه‌و، چوينكه‌ ئمڕوو ديرد و له‌ده‌سد نه‌چيه‌، خه‌م ئه‌را دويه‌كه‌ مه‌خوه‌، چوينكه‌ دی نايه‌يده‌و، په‌شيمانيشه‌و مه‌و له‌ ئمڕوو چوينكه‌ گوزه‌ر ئه‌كا، ئمجا دوينيد جارجاريگ ئه‌وه‌نه‌ چيمنه‌ ناو خه‌مه‌و خه‌ميش ئه‌دێده‌ به‌شيگ له‌ ئيمه‌، دی هه‌ر چشتيگ نه‌دوينيد دڵد خوه‌ش بكا هه‌وڵ بيه‌ خوه‌د دڵ خوه‌د خوه‌ش بكه‌يد.

شيبا كه‌ره‌م عه‌بدوڵڵا

ج . أ