جه‌نگ‮ ‬چارەنويس

شفق نيوز

جی ئاماژه‌ وه‌پيكردنه‌ ك هوير ناسيۆناليستی توركی و عه‌ره‌بی و عه‌جه‌می وه‌ فكره‌يگ ره‌گه‌زپه‌رستانه‌ی فريه‌ سته‌مكارانه‌ كه‌فتنه‌ په‌لامارداين كورد و كوردستان و گشت زوڵميگ وه‌رانوه‌ر كورد و ناسنامه‌گه‌ی ئه‌نجام دان، ته‌نيا تاوان كورديش ئه‌وه‌ بوی ك له‌ وه‌رگريكردن بی وينه‌ بويه‌و فريه‌ وه‌ ئازايانه‌ وه‌رگری له‌ مه‌ندنه‌وه‌ی خوه‌ی و كه‌رامه‌ت و ناسنامه‌ نه‌ته‌وه‌ييه‌گه‌ی كردگه‌و تا ئمڕوويش كورد وه‌رده‌وامه‌ له‌ هه‌وڵ و خه‌بات و گشت توانايگی ئه‌يه‌ريده‌ كار ئه‌را وه‌رگری له‌ خاكه‌گه‌ی و كه‌رامه‌ت خوه‌ی.

بيگومان له‌وه‌ختيگ ك ئويشيم جه‌نگيگ چاره‌نويسساز له‌ڕاسی ئی وه‌رگريه‌ ك كورد ئه‌كاده‌ی له‌ خوه‌ی و خاكه‌گه‌ی ئه‌يه‌ مه‌سه‌له‌يگ چاره‌نويسسازه‌، دوشمنه‌يل و ترۆريسته‌يل له‌ ماوه‌ی ئی چه‌ن مانگ دوياخره‌ گشت هه‌وڵيگ خستنه‌ كار ئه‌را داگيركردن كوردستان و بوينه‌ هه‌ڕه‌شه‌ی گه‌ورايگ له‌بان خاك و ملله‌ته‌گه‌مان و ئه‌و هه‌وڵه‌يل دوشمنكارانه‌يشه‌ ئه‌را بان خاك كوردستان ئاماژه‌س ئه‌را ئه‌و ئه‌جيندای سياسيه‌ ك ديرنه‌ی و ئه‌خوازن جيوه‌جی بكه‌ن.

ئه‌وان له‌يوا زانستن ك كوردستان تيكه‌ی ئاسانيگه‌و ئه‌تويه‌نن وه‌ ئاسانی قويتيه‌و بيه‌ن، وه‌لی پێشه‌رمه‌رگه‌يل قاره‌مان كوردستان له‌ جواودانه‌وه‌ی بی وينه‌يگ شان وه‌شان ته‌ياره‌يل جه‌نگی هاوپه‌يمانه‌يل توينستن شكست گه‌ورا وه‌و ئامانج و مه‌رام پيس ديكتاتۆريه‌ت و ترۆريسته‌يل داعشه‌ بارن و رووژ له‌دويای رووژ زه‌ره‌د گه‌ورا وه‌پيان بڕه‌سنن و مقه‌يه‌تی خاك كوردستان له‌ هه‌ڕه‌شه‌ی ئه‌و ئه‌قليه‌ت دڕنده‌ بكه‌ن.

ئمڕوو كورد بايه‌سه‌ وه‌گشت هيز و توانايگه‌و مقه‌يه‌تی له‌ مه‌رزه‌ جوگرافيه‌گه‌ی خوه‌ی بكا، چوينكه‌ مقه‌يه‌تيكردن مه‌رز راسكانی هه‌رێم كوردستان چه‌نه‌ها گام تر نزيكمانه‌و ئه‌كا له‌ سه‌وه‌رخوه‌يی، هه‌ر وه‌و خاتريشه‌ ئويشيم جه‌نگيگ چاره‌نويسسازه‌و له‌ی قوناغه‌ گشت زه‌مينه‌يگ وجوود ديريد ئه‌را ره‌سين وه‌و ئامانج پيرووزه‌، ئمجا وه‌رجه‌ گشت چشتيگ ئيمه‌ بايه‌سه‌ دوير له‌ به‌رژه‌وه‌ندی وه‌رته‌نگ حزبی گام بنه‌يم و به‌رژه‌وه‌نديه‌يل باڵای نه‌ته‌وه‌گه‌مان له‌وه‌رچه‌و بگريم و يه‌كده‌نگ بويمن و گشتمان وه‌يه‌كه‌و روی وه‌ڕوی ئی رويداگ سياسی تازه‌ بويمنه‌وه‌و رييش وه‌ هويچ گرووپ و كه‌س و لايه‌نيگ نه‌يه‌يم له‌ هه‌ر پارتيگ سياسی ك بوونه‌ هووكار ئه‌را جيوه‌جيكردن ئه‌جيندای ده‌وڵه‌ته‌يل هه‌رێمی و بايه‌سه‌ به‌ره‌ی كوردايه‌تيمان بته‌و بكه‌يم له‌ دژ گشت هه‌ڕه‌شه‌يل ده‌ره‌كی و ناوخوه‌يی.

چاره‌نويس كورد له‌ سه‌ركه‌فتن ئی جه‌نگه‌ وه‌ ته‌مامی دياری ئه‌كريه‌يد و ئه‌دێده‌ هووكار سه‌ركه‌فتن كورديش له‌گشت بواريگ و يه‌يش ئه‌چێده‌و ئه‌را بنه‌مای يه‌كڕزی و ته‌بايی و يه‌كگرتگی هه‌ڵويست سياسی لايه‌نه‌يل سياسی كوردستان.

دوياخريش بايه‌سه‌ ئمڕوو له‌ گشت وه‌ختيگ فيشتر هه‌وڵ بيه‌يم ئه‌را ره‌سين ده‌سمان له‌بان گشت نيشتمانه‌گه‌مان، يه‌يش وه‌ ئه‌وه‌ ئه‌كريه‌يد ك بايه‌سه‌ واز له‌ به‌رژه‌وه‌نديه‌يل حزبيمان باريم و بنه‌مای كوردايه‌تی بته‌و بكه‌يم و هه‌ر يه‌يش سه‌ركه‌فتن كورد له‌ ئاينده‌و له‌بان گشت ئاسته‌يل ناوده‌وڵه‌تی و هه‌رێمايه‌تی و ناوخوه‌يی مسۆگه‌ر ئه‌كا.

سگڤان هالو

ج . أ