پانسه‌د مليون دۆلار= په‌نج مليون يه‌تيم

شفق نيوز

هاتن و وه‌پاكردن كۆنفرانس لويتكه‌ی وڵاتان عه‌ره‌وی نزيك وه‌ پانسه‌د مليون دۆلار خه‌رج ئاماده‌كاری هاتن وان كرياس تا ئه‌ی گه‌ورا عه‌ره‌وه‌يل قه‌درداره‌ وه‌ راحه‌تی بان ئه‌را ئه‌ی كۆنفرانسه‌و دوياييش ديمن ك وان وه‌ فره‌ مه‌مه‌ر و هووه‌و ناتن و ئه‌ی هه‌مگه‌ دۆلار به‌سه‌زووانه‌ وه‌ وێڵ خه‌رج كريا و چيه‌ بای فه‌نا!.

ئينگه له‌ی وه‌خته‌ ك عراق هێمان ها له‌ حاڵێگ بايه‌د ئاوه‌دانه‌و بوود و تا بن قوڕگ ها له‌ ناو قه‌يران، به‌دبه‌ختی و هه‌ژاری ئه‌ی جووره‌ پويلێگ ئه‌را بايه‌د خه‌رج بوود!؟.

ئه‌وه‌گ دوينيه‌يد يه‌سه‌ ك دويای يه‌گ رژيم به‌عس ڕميا و پروسه‌ێگ تازه‌ له‌ی وڵاته‌ وه‌ ناو دمۆكراسی ده‌سكرده‌پێ، تا ئينگه‌ شه‌فاف بوينێگ يا ڕه‌سين وه‌ هانای مه‌ردم فه‌قير له‌ ناو ده‌سڵاتداره‌يل نيه‌وينيه‌د و هه‌ركه‌س ئه‌را خوه‌ی ڕانێد.

وه‌ ئه‌ساس راپۆرتێگ رووژنامه‌وانی بی بی سی له‌ عراق به‌رزه‌وكردن و له‌ شوونا چێنيگ ئه‌رای كردوين، ئينگه‌ له‌ عراق نزيكه‌ی په‌نج مليون مناڵ يه‌تيم هه‌س ك وه‌ مه‌مه‌ر شه‌ڕه‌يلێگ له‌ ناوعراق بویه‌ يه‌تيم بوينه.

پرس ها له‌يره‌، ئايا يانه‌گ وه‌ سه‌ر عراق حكوومه‌ت كه‌ن، له‌ جی قسيه‌كردن و كۆنفرانس گرتن و داوه‌ت كردن وڵاته‌يل عه‌ره‌و ك بڕێگ له‌ ليان هه‌ خوه‌يان چوو خڕده‌رن له‌ ناو عراق، چ هه‌وه‌جه‌ێگ وه‌ پێ هه‌س؟.

ئمجا وه‌ختێگ له‌ ليان پرسيد؟ ئويشن توايم، ده‌س بڕێگ له‌ ليان له‌ عراق كوڵه‌و بكه‌يم!؟. خوو، يه‌ نامه‌نتقيترين جوواوه‌ يا خاستره‌ك بو‌يشيمن ده‌مپاچگانی نيه ك وه‌ مه‌ردم كه‌ن‌، ئه‌را؟ وه‌ی مه‌مه‌ره‌گ، ئه‌گه‌ر باس له‌ ئاسايش بكه‌يد و بتوايد عراق ئه‌منه‌و بكه‌يد و ده‌س كه‌سه‌يل تره‌ك له‌ ناوێ كوڵه‌و بكه‌يد، بايه‌د له‌ گام يه‌كم ئه‌ی مه‌ردم  فه‌قيره‌ تێر بكه‌يد و دی ده‌يشتايی وچووڵی نه‌يليد تا ئه‌و ئايه‌مه‌يل ناو جه‌مگا، وه‌ره‌و ئه‌و ڕێه‌ نه‌چن ك جيوه‌جيكه‌ر سياسه‌ته‌يل ده‌يشت يا وڵاته‌يل تره‌ك بوون. ئمجا دويای وه‌يش، خوو برايل وه‌ر‌پرس و تكنۆكرات كه‌مخه‌م، ئويه‌ ئه‌گه‌ر له‌ ژان و ده‌ره‌د مه‌ردم ئاگا بوين و له‌ سه‌ياره‌يل جام ڕه‌ش خوه‌دان سه‌رێگ بكيشينه‌و ده‌يشت ئه‌و وه‌خته‌ خاس زانين ك هه‌ له‌ی به‌غداده‌ چ خه‌وه‌ره‌ و كاره‌گه‌ خاس تيه‌يده‌ ده‌سدان، دی ناخوازێد فره‌يش دويره‌و‌ بكه‌فين هه‌ له‌ ناو ڕێگ ئه‌را ناوچه‌ی سه‌ونز چين بزانن شه‌قام و ده‌رو بان پايته‌خت وڵاته‌گه‌دان چوينه؟. گه‌ورايل سه‌ربه‌رز ك ديێن ئويه‌ كار حه‌زره‌ت فيله‌، له‌ پله‌ی بانگ نيشتنه‌و ‌بان ‌و خوار خوه‌يان نيه‌وينن، هێمان عراق و مه‌ردمێ له‌ ژێر به‌ند هه‌فت(نه‌فت له‌ ورايوه‌ر خواردن) ده‌ر نه‌چيه‌. تازه‌ يه،‌ يه‌ی لای. له‌ لای تره‌كيشه‌و، عراق هێمان وێرانه‌يگه‌و له‌ ده‌س فره‌ چێشت ناڵنێد ك له‌ سه‌ر گێشتيانه‌و، فه‌قيری‌ و بيكاريه‌. ئمجا يه‌ی مه‌سه‌ڵێگ ديريمن ك ئويشێگ: وه‌ شوتور وه‌تن چه‌د وه‌ هه‌ره‌سه‌ ك يه‌ده‌ وه‌ مه‌ره‌سه‌؟.

وه‌ ئه‌ی هه‌مگه‌ به‌دبه‌ختێه‌گ ها له‌ عراق، ئه‌را ئی قه‌ره‌ پويل وه‌ وێڵ خه‌رج بكريه‌يد و له‌ لای تره‌كه‌و، مه‌ردم هه‌زاران به‌دبه‌ختی  دێرن؟.

ئه‌را مه‌ردم  به‌دبه‌خت عراق، له‌ نه‌وين كاره‌با و ئاو خواردن و فره‌ چێشته‌يل تره‌ك ك فره‌ سه‌ره‌تايين بناڵن و وه‌رپرسه‌يليان، ئه‌را خوه‌شی خوه‌يان، بی وه‌گ ژان مه‌ردمه‌گه‌یان بزانن، پويل ئه‌ی مه‌ردمه‌ تاڵان و پاڵان بكه‌ن تا وه‌ل چه‌ن كه‌سا له‌ وڵاته‌يل تره‌ك بنيشن و خوه‌شيان بوود. يه‌ له‌ لای هه‌ر كه‌سێگ كه‌مێگ دڵێ بسزێد، چوی قويتا بيريه‌يد؟...

 

شۆڕش شاواز