ئایا مام جه‌لال ئمزا له‌بان له‌سێداره‌داین تاوانباره‌یل كه‌يس كوردفه‌یلى ئه‌كا؟

شفق نيوز

وه‌ڕوى كووچوه‌پیكردن زووره‌ملى و ماڵویرانى بوینه‌وه‌، ئیمه‌ له‌یرا نیه‌توایم باس بار مه‌ینه‌تى ئى چین زوڵملیكریاگه‌ بكه‌یم، وه‌لى بیلا چشت كه‌میگ  له‌باوه‌تیان باس بكه‌یم و ڕووشنایى بخه‌یمنه‌ بان ره‌فتار و شیواز مامڵه‌كردن فه‌یلیه‌یل وه‌ك هاووڵاتى و ئاده‌میزاد.

كورده‌یل فه‌یلى وه‌دریژایى ژیانیان له‌عراق زه‌ره‌د وه‌كه‌س نه‌ڕه‌سانن و ئاره‌زوو ژیان خوه‌ش و به‌خته‌وه‌رى ئه‌را گشت چینه‌یل كوومه‌ڵگا كردیان، زیاتریان له‌چین ده‌وڵه‌مه‌نه‌یل و بازرگانه‌یل بوین و قورسایى بازاڕ عراق وه‌ده‌سیان بوى و وه‌ل هویچ حزب خیانتكاریگ ده‌س نه‌یاشتن و سه‌نگ  خوه‌یان له‌ده‌س نه‌یان و وژدان خوه‌یان نه‌فرووشتن له‌وه‌ر خاتر به‌رژه‌وندیه‌یلیان. وه‌لى ئه‌و حزبه‌یله‌ ك جویر ئۆپۆزسیۆن داواى هه‌ق ملله‌ت كردیان فره‌جار له‌كورده‌یل فه‌یلى ده‌سمیه‌ت وه‌رگرتیان وه‌ حوكم ئه‌وه‌ك كۆنترۆڵ بازار له‌ده‌سیان بوى، وه‌تایبه‌ت له‌وه‌خت جموجویل ڕزگاریخواز كورد ده‌س باڵایگ داشتن له‌هاوكارى و قوربانیداین. وه‌لى ئه‌وه‌ بوى له‌و ناز ونعمه‌ته‌ بڕیان، ته‌نیا له‌وه‌ر ئه‌وه‌ك كورد بوین و چه‌ك به‌عس نه‌كردنه‌ شان و ته‌نانه‌ت حاڵ و ماڵیان كردنه‌ قوربان خاك و نیشتمان و ژیان سه‌ربه‌رزانه‌ى ملله‌ت خوه‌یان. وه‌ل ئه‌وه‌یشا وه‌ باوه‌ڕ ته‌واویگه‌وه‌ هه‌رچه‌نى له‌خاك كوردستانه‌وه‌ دویر بوین وه‌لى په‌یوه‌ندى بته‌ویگ وه‌ شووڕش كورده‌وه‌ داشتن له‌وه‌خت خه‌بات چه‌كدارى جویر هه‌ر كوردیگ  دڵسووز.

په‌یام كورده‌یل فه‌یلى ساڵه‌یل دویر و دریژیگه‌ پشتگووش خریاو نه‌ڕه‌سیه‌ كنار چاره‌سه‌ر، وه‌لى ئیسه‌ ئه‌را گشت كه‌سیگ  ئاشكرا بوى ك ته‌نیا چینیگ له‌ى وڵاته‌ زه‌ره‌دمه‌ن یه‌كم بوى و هیمان قه‌ور ڕوڵه‌یلیان نادیاره‌و هه‌قه‌یلیان تائیسه‌ ناوریاسه‌وه‌ كام چین و مه‌ردمانیگه‌؟ به‌ڵى! هویچ گومانیگ  له‌تى نیه‌ كورده‌یل فه‌یلى باج گه‌وراى كوشتن و له‌ناوبردن وه‌جه‌م و زندانى و ماڵویرانى دان و ئه‌نفال كورد له‌ئه‌وانه‌وه‌ ده‌س وه‌پى كرد، تا ڕووژ 29 ته‌شرین دویم 2010 ك زیاتر له‌چل ساڵه‌ وه‌ده‌س حوكم ناڕه‌واو دكتاتۆریه‌ته‌وه‌ ناڵنن ، چوینكه‌ ئى ڕووژه‌ ئه‌را كورده‌یل فه‌یلى وه‌ڕووژیگ  تاریخى دریه‌یگه‌ قه‌ڵه‌م ك دادگاى باڵاى تاوانه‌یل هه‌ق و ناهه‌ق له‌یه‌ك جیاوه‌ كرد و كه‌م له‌فره‌ى تاوانباره‌یل هه‌واڵه‌ى سزاى عادڵانه‌ كرد، وه‌لى له‌یرا پرسیاریگ  په‌یا بووگ، ك ئایا ئیجاره‌ سه‌رۆك كۆمار عراق ڕیزدار مام جه‌لال تاڵه‌بانى ئمزا له‌بان له‌سێداره‌داین تاوانباره‌یل كاره‌سات كورده‌یل فه‌یلى ئه‌كا؟ چوینكه‌ مام جه‌لال وه‌ گووره‌ى ئه‌وه‌ك كه‌سایه‌تییگ سیاسى و ئۆپۆزسیۆن بوى و فره‌یگ  له‌ كه‌سایه‌تیه‌یل كورد فه‌یلى هاو سه‌نگه‌ر و هاو خه‌بات بوین وه‌لیا له‌ڕووژه‌یل سیه‌ى پڕ له‌نائومیدى، خاس زانیگ  مه‌ینه‌تى و به‌دبه‌ختى كورده‌یل فه‌یلى چه‌نیگ  بوى و چوین وه‌بان لوغما خاو خیزانیان په‌ڕاننه‌وه‌و كوڕه‌یل جایه‌ڵ جوانیان زندانى و زنگ  وه‌چاڵ كردن، خاس زانیگ ك ئه‌وان له‌جه‌وه‌ڵ نه‌وین ، وه‌لى وه‌باوه‌ڕ له‌ده‌یشت كوردستانیش پیشمه‌رگه‌ بوین، وه‌ل ئه‌وه‌یشا هه‌رچه‌ن فیشتریان سه‌ر وه‌ریكخریاگه‌یل سیاسى مه‌زه‌وى نه‌وین، وه‌لى هه‌میشه‌ هه‌قخواز و ئاشتیخواز بوین، هیمانیش كه‌س وكار شه‌هیده‌یل فه‌یلى ئى پرسیاره‌ له‌لایان په‌نگه‌و خواردگه‌ ك تاوان قوربانیه‌یلیان چه‌ بوى؟ ته‌نیا ئویشیمن چوین ئیوه‌ كورد بوین !!! ئومیده‌واریم دڵ مام جه‌لال وه‌رجه‌ قه‌ڵه‌مه‌گه‌ى ئمزاى هه‌ق بكا.