كه‌میگ چه‌ود بنویقن و چه‌ن كه‌سیگ بخه‌ هویرد

شفق نيوز

و له‌هه‌مان وه‌خت وه‌پشت خوه‌یانا چن. ئه‌یه‌ گه‌مه‌یگ وه‌رده‌وام بى پلانه‌، ك وه‌رده‌وام جویلیه‌یم وه‌بى وسیان تا دویا هه‌ناسه‌ى ژیانمان. ئیمه‌ ئه‌رك خوه‌مان له‌ى ژیانه‌ دیمنه‌سه‌وه‌، ك هه‌میشه‌ له‌گشت گامیگمان سه‌ركه‌فتگ نیمن وه‌رانوه‌ر گشت چشتیگ و گشت كه‌سیگ، وه‌لى جى داخه‌ ئیمه‌ى ئاده‌میزاد ئه‌وه‌ له‌ده‌سدایمنه‌ ك بتویه‌نیم وه‌ل خود خوه‌مانا ئه‌را ماوه‌یگ  ووه‌ته‌نیا بویمن. ئیمه‌ هویچ وه‌ختى له‌ى چه‌رخه‌ وه‌ته‌نیا نیمن و ئاده‌میزادیش هویچ وه‌ختى له‌وه‌یش خاستر مه‌زه‌نه‌ نیه‌وگ، ك شه‌وه‌كیان هه‌ڵسیگ  و ته‌له‌فزیۆنه‌گه‌ یا كۆمپیته‌ره‌گه‌ یا هه‌ر وه‌سیله‌یگ تر واز ئه‌كاو شه‌ویش وه‌رجه‌ ئه‌وه‌ك بخه‌فیگ دویا چشتیگ ك ئه‌نجامى به‌یگ كوشاننه‌وه‌ى ئه‌و هووكاره‌یله‌سه‌. له‌و ناونییشه‌ هویچ بوار یا مه‌جالیگ وه‌خوه‌ى نیه‌یگ  ئه‌را ئه‌وه‌ك وه‌ل خود خوه‌یا وه‌ته‌نیا بووگ.

ژنه‌یلیش گووش له‌ گوورانیه‌یل گرن و مناڵه‌یلیش له‌وه‌رده‌م كۆمپیته‌ر یا وازیه‌یل ئه‌لكترۆنى و پیاوه‌یلیش خه‌ریك هه‌واڵه‌یل ناو ته‌له‌فزیۆنن، كه‌سیش له‌لیان هه‌وه‌جه‌ وه‌ قسه‌كردن و ته‌ماشاكردن ئه‌واكه‌ى تر نه‌یرن. ئاده‌میزاد كۆنترۆڵ ته‌كنۆلۆژیا نه‌كردگه‌، به‌ڵكوو گشت چشتیگ كۆنترۆڵ ئاده‌میزاد كردگه‌.

كه‌ره‌سه‌و سه‌ركه‌فتن بوینه‌ به‌شیگ گه‌وراى ژیانمان و فره‌یش زه‌حمه‌ته‌ بتویه‌نیم واز له‌لیان باریم. له‌ى وه‌زعیشه‌ مه‌حاڵه‌ ئاده‌میزاد بواریگ ئه‌ڕاى هه‌ڵكه‌فیگ ئه‌را ئه‌وه‌ك وه‌ته‌نیا بووگ وه‌ل خود خوه‌یا. یه‌یش جویر ئه‌وه‌سه‌ ك ئاده‌میزاد ده‌سیگى له‌خوه‌ى جیاوه‌ بكاو بویشیگ : ئه‌یه‌ ده‌س من نیه‌و گووش وه‌پى نیه‌م، به‌ڵكوو چه‌وه‌ڕى ئه‌وه‌ كه‌م له‌جیاى ئه‌و ده‌سمه‌ ده‌سیگ تر دروس بووگ ئه‌ڕام، ئنجا هه‌رچه‌نى له‌هویره‌و بچید، وه‌لى هه‌ر وجوود خوه‌د دیرید. ئاده‌میزاد هه‌وه‌جه‌ وه‌ وچانیگ دیرى، هه‌ناسه‌یگ قویل، لاكردنه‌وه‌یگ له‌لى، ئه‌را ئه‌وه‌ك هیز وتوانایگ په‌یا بكاو روحیشى ئارامییگ وه‌خوه‌یه‌وه‌ بوینیگ ، تا ئاده‌میزاد بتویه‌نیگ هه‌لیگ وه‌ربگریگ له‌وه‌ر خاتر ئه‌وه‌ك له‌ خود خوه‌ى نزیكه‌و بووگ.

ئه‌وه‌ك ئاده‌میزاد ئیسه‌ ڕه‌خه‌و به‌یگ، ئه‌وه‌سه‌ له‌ خود خوه‌ى نزیكه‌و بووگ و خوه‌ى بوینیگه‌وه‌، نیه‌توایگ خوه‌ى بوینیگ . ئاماده‌س بنوڕیگه‌ گشت كه‌سیگه‌وه‌ ته‌نیا خود خوه‌ى نه‌وینیگ . بیگومان چوارده‌ورمان گشتى قانوون و ده‌ستوور و داب ونه‌ریت و ئه‌رك و بڕیار و ڕكابه‌ریه‌، ك ئاده‌میزاد وه‌ زه‌حمه‌ت تویه‌نیگ (من) یا خوه‌ى له‌تى بوینیگه‌وه‌. ئه‌گه‌ر جاریگیش ریككه‌فتیگ ئه‌راى بایگه‌ نواوه‌ ئه‌را ئه‌وه‌ك(من) بوینیگه‌وه‌، ئه‌وه‌ گشت هه‌وڵیگ ئه‌دا ئه‌را ئه‌وه‌ك وه‌بى گرنگى له‌هویر خوه‌ى بوه‌یگه‌ى و ڕه‌د بووگ وه‌لایا. یه‌یش ئه‌و سه‌عاته‌یل ترسناكه‌نه‌ ك ئاده‌میزاد له‌تیان فره‌ كزه‌، نه‌ لاشه‌و نه‌یش هس له‌تى گووش له‌ فكر نیه‌گرن، قوله‌یلى له‌رزیگ و دونیا له‌وه‌رچه‌وى تیه‌ریك بووگ و زوورانبازى ئه‌كا ئه‌را هه‌ناسه‌یگ، ئنجا ئه‌و سه‌عاته‌(هس) دویر له‌(فكر) كۆنترۆڵ گشت چشتیگ ئه‌كا.

ئى جووره‌ كۆنترۆڵكردن هسه‌ وه‌ك دیواریگ ئاسنینه‌، ك نیه‌یلیگ هویچ چشتیگ نه‌ ئه‌ڕا ناو نه‌یش ئه‌را ده‌یشت بچووگ. گشت دیواریگ ئاسنینیش سارد و سه‌خته‌و هویچ مه‌جالیگ له‌تى نیه‌ ئه‌را ئه‌وه‌ك گوڵیگ له‌تى سه‌وز بكاو هویچ ژیانیگ له‌تى نیه‌وینیده‌وه‌، ئنجا ئایا له‌و وه‌خته‌ ڕوح وه‌بى هه‌ناسه‌داینیگ تویه‌نیگ بژیه‌یگ؟

ئاده‌میزاد ئه‌را ئه‌وه‌ك بتویه‌نیگ بژیه‌یگ و زاڵ بووگ له‌بان ئه‌و دیواره‌یله‌، بایه‌سه‌ دیدو نوڕستن خوه‌ى ئاڵشت بكا، چوینكه‌ ئه‌وه‌نه‌ له‌ ده‌روینمان ڕیشگ قویلیگ كوتاگه‌ له‌یوا له‌ ئاده‌میزاد كه‌ن له‌ده‌س فره‌ چشت بهه‌یوایگ ك نیه‌ناسیگه‌ى و له‌ خود خوه‌یان بهه‌یوان. ئنجا هه‌ر وه‌ختى تویه‌نستیم ئه‌و قاپه‌یه‌یله‌ له‌خوه‌مان واز بكه‌یم ئه‌را ئه‌وه‌ك خوه‌مان بناسیم، دى ئه‌و وه‌خته‌ تویه‌نیم بویشیم: ئیسه‌ ژیانمان ده‌س وه‌پى ئه‌كا.