له‌ ناونى مسر و هه‌رێم كوردستان

شفق نيوز

 

بیگومان ئاكامه‌یلیشى گشت ناوچه‌گه‌ گریده‌و، ئنجا ئاكامه‌یل نه‌خوازریاگ ئه‌و كاره‌ساته‌ ك گشت لایه‌نه‌یل له‌لى وه‌رپرسن، ئه‌را مسر وه‌شیوه‌یگه‌ ك گشت لایه‌نه‌یل كیشه‌و قه‌یرانه‌گه‌ له‌لى زه‌ره‌دمه‌ن بوون و خودكیشانه‌وه‌ بووده‌ به‌شیان، وه‌لى دویاى چه‌؟ دویاى ئه‌وه‌ك كار له‌كار ترازیا.

دیاره‌ ئخوانه‌یلیش په‌شیمانن، چوینكه‌ مامڵه‌ى دروس وه‌ل ده‌رفه‌ته‌یل قوناغه‌گه‌ نه‌كردن و نه‌تویه‌نستن بڕه‌سنه‌ له‌یه‌كڕه‌سینه‌وه‌ وه‌ل نه‌یاره‌یلیان و زه‌ره‌د له‌نیمه‌ گله‌و بیاتان فره‌ خاستر بوى له‌ى چاره‌نویس نادیاره‌ ك رویكرده‌سه‌ مسر و خوه‌یانیش وه‌گشتى. ئنجا ئه‌ڵڵاجه‌وى ها له‌ورا ك ئیمه‌ له‌ هه‌رێم كوردستان فیشتر له‌ راده‌ مه‌ردمانیگ خوه‌یان خه‌ریك وه‌پیه‌و كردنه‌ ك وه‌شیوه‌یگ ناهاوسه‌نگ مامڵه‌ وه‌لیا كه‌ن.

بیجگه‌ ئه‌و قه‌یران سیاسیه‌ ك نزیكه‌ى سێ ساڵه‌ روى كرده‌سه‌ پرووسه‌ى سیاسى، وه‌ل ئه‌وه‌یشا دوینیم ده‌زگایه‌یل ره‌سانن و بڕیگ له‌ حزب و لایه‌نه‌یل كوردستانیش وه‌ شیوه‌یگ مامڵه‌ وه‌ل قه‌یرانه‌یل مسر كه‌ن جوور ئه‌وه‌ك هه‌رێم كوردستان هویچ قه‌یرانیگ نه‌یاشتوودو بتویه‌نید قه‌یرانه‌یل ده‌ره‌كییش چاره‌سه‌ر بكا.

ئه‌وه‌سه‌ چوینیه‌تى جیوازكردن رویداگه‌یل و شیه‌وكردن هووكار و ئاكامه‌یل وه‌ شیوه‌یگ سووزدارانه‌و تا ڕاده‌یگ ناباوه‌تیانه‌و دویر له‌گیان پیشه‌یى ئه‌نجام دریه‌یدو كردنه‌سه‌ى به‌شیگ له‌ كیشمه‌یكش ئایدۆلۆجى و سیاسى و دعایه‌ى زوى وه‌خت هه‌ڵوژاردن.

یه‌یش بى ئاگا له‌وه‌ك ئه‌گه‌ر هات و ئه‌و رویداگ و گویڕانكاریه‌یل ناوچه‌گه‌ وه‌ى جووره‌ نادروس و نه‌خوازریاگ بچووده‌ رییه‌وه‌و هیزه‌یل سیاسى كوردستانیش ئه‌یه‌ مامڵه‌و ستراتیجیه‌تیان بوود، ئه‌وه‌ بیگومان هویچ گه‌ره‌نتییگ نیه‌مینید ئه‌را مقه‌یه‌تیكردن ئه‌و ئاست سه‌قامگیرى و ئاوه‌دانیه‌ ك ئیسه‌ هاوریاسه‌ ده‌س له‌ هه‌رێم كوردستان.

د . هادى عه‌لى

ج . أ