هامشوو ئه‌را بازاڕ قيامه‌ت

شفق نيوز

له‌يرا ئه‌خوازيم بزانيم مه‌سه‌له‌ی كه‌م هامشووكردن ناونی قه‌وم و خيش و ناونی دووس و ماڵه‌ براده‌ر و ره‌فيق و ناسيار ئه‌راچه‌ له‌ رووژگار ئمڕوو ره‌سيه‌سه‌ بنبه‌س و كزی يه‌كجاره‌كی و هووكار ئی كزی و كه‌مته‌رخه‌ميه‌ چه‌س؟ ئايا له‌ ته‌مه‌ڵی پياوه‌، يا ژن ومناڵ هووكار مه‌يلسه‌ردی و بڕانن ئی به‌ن هامشووه‌سه؟ ئايا وجوود كه‌ره‌سه‌ی ته‌كنۆلۆجی جوور ته‌له‌فزيۆن و سه‌ته‌لايت و خه‌ت ئه‌نته‌رنێت و په‌يوه‌نديكردن وه‌ مۆبايل گورز كوشنده‌ له‌ هه‌نگڵ هامشووكردن وه‌شانگه‌ يا كار و شه‌كه‌تی و بژيوی ژيان باڵ كيشاسه‌ بان ئی مه‌سه‌له‌ی هامشووه‌؟ كام له‌يانه‌ ڕی وه‌پيد نايه‌يد سه‌ردان كه‌س وكارد بكه‌يد؟ ئايا ئی ديارده‌ی په‌سه‌ن و ره‌سه‌نه‌ ئه‌را جوور جاران باوی نه‌مه‌ند؟، ئايا عه‌يب و شه‌رمه‌‌ كه‌سيگ وه‌لای كه‌مه‌و له‌ هه‌فته‌ی جاريگ وه‌ ديدار كه‌سيگی شاده‌و بدێ؟ ئايا شه‌ونشينی و ده‌مه‌ته‌قه‌ی خوه‌ش شه‌وار زمسان و دانيشتن پای "سرويزه‌ی سه‌ماوه‌ر و چای دشله‌مه‌ی هێل ودارچينی له‌ناو" كه‌فته‌ سڵپدان بيكه‌ڵك؟ مه‌سه‌له‌ چه‌س؟ دونيا گويڕياگه‌ يا مه‌ردم؟ ئه‌ی ماڵيگش له‌ خيش خه‌ڵوه‌ت بوود تام خوه‌شی له‌تی چه‌س؟ ئه‌ی خيزانيگيش وه‌ دريژايی ژيانيان ئازيه‌تی هامشووكردن بگرن چوين دڵيان ره‌ق نادێ و حه‌سره‌ت ناكيشن؟ ئه‌ی گه‌ورايگ بويچگيگ نه‌كاده‌ سه‌ر شان و شه‌وكه‌تی چه‌ بوود؟ گه‌ورايگ ئه‌گه‌ر قويخايی له‌لی خوڕی و هه‌ر چه‌وه‌ڕی ئه‌وه‌ كرد مه‌ردم بان وه‌ره‌و پی و ته‌كان له‌خوه‌ی نه‌يه‌يد ئه‌يه‌ چ گه‌وراييگ وه‌پی ئويشن؟ دووسيگ ئه‌گه‌ر خوه‌ی وه‌ دووسد و دڵسووزد بزانيد چوين بايه‌سه كه‌مته‌رخه‌م بوود له‌ هه‌واڵ و ديدارد؟ كه‌سيگ ئه‌گه‌ر يه‌ك وه‌ يه‌ك وه‌لدا بكاو چه‌وه‌ڕی ئه‌وه‌ بكا ت بچيد تا ئه‌ويش سه‌رداند بكا ئه‌يه‌ چ تام و له‌زه‌تيگ داشتوود؟

ئمجا ماڵيگيش ئه‌گه‌ر وه‌ به‌ره‌كه‌ت هامشوو رووشنه‌و نه‌دێ چ ره‌نگيگ تارمايه‌گه‌ی لاوه‌يدو نوير بخاده‌ پاسار و ديوار و روخساری؟ ماڵيگ ئه‌گه‌ر فريشته‌ پاك و بيگه‌رده‌گان له‌تی بيه‌نه‌ شه‌قه‌ی باڵ و قه‌ڵه‌ميان سواو جه‌منشينی له‌تی نه‌نويسيد چ ئه‌مانه‌ت و زه‌مانه‌تيگه‌ ئه‌را رووژ و بازاڕ قيامه‌تد؟

ئه‌ی به‌نه‌ی خودا هويره‌و بكه‌و بزان ك ئی دونيا وه‌ هامشوو خوه‌شه‌، ئه‌گه‌ر ئه‌و گه‌نه‌ ت خاس به‌، ئه‌گه‌ر ئه‌و بی مه‌يله‌ ت هووكار مه‌يلكيشانی به‌، ئه‌گه‌ر ئه‌و ته‌مه‌ڵ و خه‌مسه‌رده‌ ت گورجيه‌و كه‌، ئه‌گه‌ر ئه‌و لويتی به‌رزه‌، ت ساده‌و ئاسايی به‌، ئه‌گه‌ر ئه‌و گوناكار و بی به‌زه‌ييه‌ ت ده‌روه‌چه‌ی خه‌ير وه‌پی نيشان بيه‌و رينمايی بكه‌، ئه‌گه‌ر ئه‌و كه‌مئه‌ندام و ده‌رده‌دار و نه‌خوه‌شه‌ ت بچوو له‌ دره‌دی كه‌مه‌و بكه‌، ئه‌گه‌ر ئه‌و سه‌ردان و هامشوود وه‌پی خوه‌شه‌ ت نه‌وه‌ هووكار بڕينی، چوينكه‌ هامشوو ئه‌را بازاڕ قيامه‌تد پاسه‌پۆرت ڕی سه‌رفرازيده‌و جوانی و خوه‌شی ئی دونيايش ئه‌وه‌سه‌ وژداند له‌تی ساق و سه‌رفراز و سه‌قامگير بوود و به‌ن به‌زه‌ييد چه‌رمگ و جريوه‌دار و بته‌و بوود.

جه‌ماڵ ئه‌ركه‌وازی