عراق وڵات‮ ‬بى ناونیشان

شفق نيوز

جی داخه‌ فريه‌ وه‌پی نه‌چی ريشه‌و قين مه‌زه‌وی سنی و شيعی تازه‌وه‌ بوی، يه‌يش له‌يوا كرد ده‌سوه‌رداين تاقمه‌يل تونڕه‌و هه‌ردوگلا گه‌شه‌ بكه‌ن و كار ره‌ساننه‌ ئه‌و ئاكامه‌ ك ژيان هاوبه‌ش كردنه‌ نيمچه‌ مه‌حاڵ.

لايه‌ن كوردی له‌ به‌غداو كوردستان هه‌رچشتی له‌ده‌سی هات كرده‌ی تا مه‌سه‌له‌گه‌ نه‌ڕه‌سيده‌ بنبه‌س، هه‌ر وه‌و خاتريشه‌ چه‌نه‌ها جار هه‌وڵ ئه‌وه‌دا سياسه‌ت وه‌خشين پياده‌ بكه‌ن و نه‌ف له‌ ئه‌زموون كورد وه‌ربگرن، وه‌لی جاريگتر بيهووده‌ بوی و بار له‌يوايگ دروس بوی ئه‌وانه‌ك هاتنه‌ بان ته‌خت سه‌روه‌زيری وه‌تايبه‌ت ساڵه‌يل نوری مالكی دوباره‌ ده‌ستوور و نرخ ئازادی وديموكراسی نه‌يلن و دويای دويره‌وخستن سنی عه‌ره‌ب ده‌س كردنه‌ راوناين مه‌سيحيه‌يل و له‌ زێد باوگ و باپيره‌يليان شار وه‌ده‌ريان كردن، ئمجا يه‌قه‌ی كورد گرتن و تواسيان كه‌رامه‌ت نيشتمانيمان زه‌فت و داگير بكه‌ن.           

دی وه‌و جووره‌ قه‌واره‌يگ خاس نه‌مه‌ند ك ناوی عراق ناسنامه‌ی بوود، ئمجا ئه‌ڵڵاجه‌وی ها له‌ورا وه‌ل ئه‌و هه‌مگه‌ شكه‌سته‌يله‌، مالكی هه‌ولێر تاوانبار كرد! هه‌ر وه‌و خاتريشه‌ مالكی وته‌سه‌ يه‌كيگ له‌ وه‌رپرسه‌يل باڵای ئه‌مريكا كورد هووكار ئه‌و كاولكاريه‌ بويه‌ ك هاته‌ بان سوپای عراق، كابرای وه‌رپرس ئه‌مريكييش وته‌سه‌ مالكی"وه‌ڕاسی ئيچنه‌ نوكته‌يگ شايسته‌ی خه‌نستنه‌"!.

عراق ئيسه‌ بی ناونيشانه‌و كه‌م نيين ئه‌و سياسه‌تمه‌دار و شاره‌زايه‌يل ئی بواره‌ ك وه‌ ده‌وڵه‌ت شكه‌ست تاريفی ئه‌كه‌ن، تاريفی وه‌ وڵاتيگ پڕ كه‌ناته‌كاری و سوپايگ هه‌ڵوه‌رياگ و ئابوورييگ داته‌پياگ ئه‌كه‌ن و رووژانه‌يش ژنه‌فيم له‌ وڵاته‌يل عه‌ره‌بی ك نازانن ئه‌را ئی بار ئيسه‌ی عراقه‌ چه‌ بويشن و چوين ده‌روازه‌يگ چاره‌سه‌ر بويننه‌و ك مالكی و داروده‌سه‌گه‌ی هووكار دروسكردن ئی قه‌يرانه‌ بوينه‌و مه‌ترسی ئه‌وه‌يش هه‌س ئه‌وانيش بگريده‌و.

كورد له‌ی ناونيه‌ سه‌ربه‌رزانه‌ وه‌رگری له‌ خوه‌ی ئه‌كاو گشت هاوساو ده‌وڵه‌ته‌يل دووس عراق ئاگادارن له‌وه‌ك تاوان ئی رويداگه‌يل عراقه‌ دوير تا نزيگ هه‌ولێر ناگيرده‌وه‌و ته‌نيا هه‌ر سياسه‌ته‌يل نه‌خوازرياگ به‌غداو خود مالكی خوه‌ی له‌لی تاوانبارن.

شازاد ئه‌نوه‌ر

ج . أ