ئایا ده‌سه‌ى ڕه‌سانن، په‌ره‌وه‌پیداین و پشتگیرى كرد له‌ ڕه‌سانن ئازاد عیراق؟

شفق نيوز

په‌یوه‌ندیه‌یل وه‌ به‌رزه‌وكردن كه‌راى زنجیره‌ پله‌ى  فرێكوانسى یا (ته‌یف ته‌ره‌دودى) وه‌ ئه‌سه‌ر ڕه‌جعى، وه‌شیوه‌یگ ك ڕه‌سیه‌سه‌ سه‌دان میلیۆن دینار و یه‌یشه‌ بویه‌ مایه‌ى شیوایشیو له‌ كار ئى ڕادیۆه‌یله‌ و شایه‌ت له‌ ئاینده‌ى نزیكیگ بووده‌ مایه‌ى به‌سانن بڕیگیان.

بوشرا ئه‌مین به‌ڕێوه‌به‌ر ڕادیۆى مه‌حه‌به‌ له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌وه‌ ئویشى:" ئى بڕیاره‌ له‌و وه‌خته‌ هاتیه‌ ك ده‌سه‌ى ڕه‌سانن و په‌یوه‌ندیه‌یل هویچ دیداریگ وه‌لمانا ساز نه‌یایه‌ و گووش نه‌یاسه‌ شكات و را و ئه‌راى چوینمان، و خوه‌یشى هه‌میشه‌ له‌بان ئه‌وه‌ جه‌خت كه‌ید ك كاركردنى له‌سه‌ر بنه‌مایه‌یل و بنه‌ڕه‌ته‌یل دیموكراتیه‌، و ئیمه‌یش چه‌وه‌ڕى ئه‌وه‌ كردیایمن ك ده‌سه‌گه‌ رامان بسه‌نیاد له‌ى مه‌سه‌له‌ یا له‌ هه‌ر مه‌سه‌له‌یگ تر ك په‌یوه‌ندى وه‌ بارووه‌زع ڕادیۆه‌یل عیراقیه‌و دیرى، و ئه‌ڵاجه‌ویترین چشتیش له‌ى بڕیاره‌ ئه‌وه‌سه‌ ك وه‌ (ئه‌سه‌ر ڕه‌جعى) جیوه‌جیكریه‌ید و نیه‌زانیمن پشت وه‌ چ بنه‌ڕه‌ت قانوونییگ به‌سایه‌ له‌ وه‌رگردن ئیجووره‌ بڕیاریگ، شایه‌د ڕادیۆه‌یل گه‌ورا بتویه‌نن 300 ملیۆن دینار بیه‌ن ك هویچ نیه‌ له‌ لایانه‌و ، وه‌لى ئه‌ى ئه‌و ڕادیۆه‌یل بویچگ و ڕادیۆه‌یل كوومه‌ڵگاییه‌ چه‌ ك سه‌رچاوه‌یل داراییان فره‌ كه‌مه‌؟.

بوشرا ئه‌مین ئه‌وه‌یشه‌ پرسى:"من له‌ ده‌سه‌ى ڕه‌سانن و په‌یوه‌ندیه‌یل پرسم: ئایا ئه‌یه‌ هه‌نگامیگ دڵئه‌نقه‌زه‌ ئه‌را دژایه‌تى كردن ڕادیۆه‌یل بویچگ و مه‌جبووركردنیان ك واز بارن و بى ده‌نگه‌و بوون تا ڕایان نه‌ڕه‌سننه‌ هاووڵاتیه‌یل؟ پرسیاریگه‌ ئومیدوارم ده‌سه‌گه‌ جوواوى بیه‌ید؟!

جه‌واد كازم به‌رێوه‌به‌ر ڕادیۆ شه‌فه‌ق ئاماژه‌ وه‌چه‌ن مه‌ترسى یا ته‌حه‌دایگ دا ك ڕوى وه‌ڕوى رادیۆه‌یل ناوخۆیى بوود و وت:"له‌ى باوه‌ته‌ چوار مه‌ترسى یا ته‌حه‌دا هه‌س، یه‌كم مه‌ترسى تیرۆر و لایه‌ن ئاسایشیه‌ و رادیۆ له‌و داموده‌زگایه‌یل ڕه‌ساننه‌سه‌ ك كریاسه‌ ئامانج گرووپه‌یل چه‌كدار و تیرۆر، وه‌لى ئیسه‌ وه‌ختى نووڕیمنه‌ باره‌گاى ڕادیۆه‌یل وه‌ك باره‌گایگ ڕه‌سانن و ڕووشنهویرى دیار نیه‌ده‌ن، به‌ڵكو میننه‌ باره‌گایه‌یل ئاسایشییگ ك چوارده‌وریان وه‌ كۆنكه‌ریت و سیمه‌یل دڕكدار دریاس و پڕن له‌ پاسه‌وانه‌یل چه‌كدار، و یه‌یشه‌ دیارده‌یگ ژیارى یا حه‌زارى نیه‌؛ بایه‌ته‌ باره‌گاى ڕادیۆه‌یل واز و دیار بوون هه‌روه‌ك ئه‌وباقى ده‌زگایه‌یل ڕووشنهویرى جوور كتابخانه‌یل گشتى و شوونه‌یل ڕووشنهویرى گشتى تره‌ك".

زیاتریش وت:" دویم مه‌ترسى هاوكارى نه‌كردن و پشتگیرى نه‌كردن له‌و ڕادیۆه‌یله‌ ك سه‌ر وه‌ ڕیكخریایه‌یل كوومه‌ڵگاى شارسانیین له‌ لایه‌ن ده‌وڵه‌ت ك له‌ گشت ده‌وڵه‌ته‌یل پیشكه‌فتى ڕوى ده‌ید ك بایه‌خ ده‌نه‌ كاروبار ڕووشنهویرى، به‌ڵكو له‌وه‌ زیاتریش ته‌گه‌ره‌ و نواگر ڕاسكانى په‌یا كه‌ید ئه‌را ئه‌و ڕادیۆه‌یله‌ و چوو نه‌یده‌ ناو چه‌رخ داهێنان ڕووشنهویرى و په‌كخستن نه‌خش و ده‌وریان جوور ئه‌و باجه‌یله‌ ك وه‌ى دویاییه‌ ده‌سه‌ى ڕه‌سانن چه‌سپانیه‌سه‌ى بان ڕادیۆگه‌مان ك وه‌ملیۆنه‌ها دیناره‌، جوور كه‌رایه‌ى وه‌كارهاوردن فرێكوانس، له‌وه‌ختیگ ك ڕادیۆگه‌مان وه‌ شیوه‌زووان كوردى فه‌یلى پرۆگرامه‌گامى په‌خش كه‌ید و تاكه‌ ڕادیۆیگه‌ له‌ جه‌هان ك وه‌ى شیوه‌زووانه‌ به‌رنامه‌یلى په‌خش بوود وه‌ناو كورده‌یل فه‌یلى ك وه‌دریژى تاریخ عیراق زوڵم له‌لیان كریا و تا ڕووژ ئمڕوویش هه‌قه‌یل خوه‌یان نه‌سه‌ننه‌سه‌وه‌ (وه‌ ئه‌سه‌ر ڕه‌جعى) جوور ئه‌وه‌گ ده‌سه‌ى ڕه‌سانن و په‌یوه‌ندیه‌یل داواى كه‌رایه‌ى فرێكوانس كه‌ید، ئایا ده‌سه‌گه‌ ئى وه‌رپرسیاریه‌ گریده‌ كووڵ خوه‌ى و چووده‌ ناو تاریخ وه‌ زوڵمكردن نوویگ دژ وه‌كورده‌یل فه‌یلى، سه‌ربار ئه‌و هه‌مكه‌ زوڵمه‌ ك تویشیان هاتیه‌؟ ئه‌وه‌ بیجگه‌ له‌و كه‌رایه‌یل ئیدارى ساڵانه‌ ك له‌ ڕادیۆه‌یل سیننه‌ى ك ئاساییه‌ ك كاریگه‌رى داشتوود له‌بان بودجه‌ ساڵانه‌یان و شایه‌ت ناچار بڕیگیان بكه‌ید واز له‌ كار بارن".

جه‌واد كازم وه‌رده‌وامى دا قسه‌یلى و وت :"سێیم مه‌ترسى ئه‌وه‌سه‌ ك قانوونیگ نیه‌ ئه‌را مقه‌یه‌تى كردن میدیاكاره‌یل وه‌شیوه‌یگ گشتى و كارمه‌نده‌یل ڕادیۆ وه‌شیوه‌یگ تایبه‌ت، چوینكه‌ نه‌وین مقه‌یه‌تى كردن قانوونییگ ئه‌را كار میدیایى و ڕادیۆیى شیوایشیو خه‌یده‌ ناو كار و هان كارمه‌نده‌یل نیه‌ید ئه‌را زیاتر كاركردن و داهێنان میدیایى وه‌ خاتر په‌یاكردن گۆڕانیگ له‌ ڕووشنهویرى كوومه‌ڵگا ك وه‌ل ئى واقع نووه‌و بگونجیه‌ید.. چوارم مه‌ترسییش وه‌ره‌ودویاچوین ئاست ڕووشنهویریه‌ وه‌شیوه‌یگ گشتى له‌ عیراق و یه‌یشه‌ هیلید گووشته‌كن و وه‌رگر له‌ به‌رنامه‌یل ڕووشنهویرى دویره‌و بكه‌فید چوینكه‌ تواناى تاوتوێكردن و گفتوگوو نه‌یرید له‌باوه‌ت مه‌سه‌له‌یل به‌رنامه‌یل ڕووشنهویرى ك له‌ ڕادیۆه‌یله‌و په‌خش كریه‌ن، و یه‌یشه‌ كاره‌سات ڕاسكانییگه‌ چوینكه‌ ئه‌گه‌ر بتواید عیراقیگ نوو بینا بكه‌ید و ڕه‌فتار و ڕووشنهویرى نوویگ بڵاوه‌و بكه‌ید ك وه‌ گیان له‌یه‌ك وه‌خشین و برایه‌تى له‌ناوبه‌ین پیكهاته‌یل ملله‌ت بینا بكه‌ید، بایه‌ته‌ هه‌وڵ و ته‌قه‌لا دوقاته‌و بكه‌ید وه‌خاتر ئه‌و گۆڕانكاریه‌ له‌ ڕووشنهویرى تا وه‌ل بارووه‌زع نووه‌و بگونجیه‌ید و یه‌یشه‌ یه‌كیگه‌ له‌ گرنگیه‌یل گوێڕانكارى دیموكراتى، و یه‌كیگه‌ له‌ هووكاره‌یل سه‌ره‌كى ئه‌را كه‌مه‌وكردن و بایه‌خ نه‌داین بڕیگ له‌ ڕادیۆه‌یل وه‌ لایه‌ن ڕووشنهویرى و ته‌نیا په‌خشكردن مۆسیقا و به‌رنامه‌یل هه‌مه‌ڕه‌نگ ئه‌را مه‌یلكیشانن گووشته‌كنه‌یل وه‌تایبه‌تى جایڵ و جوانه‌یل و یه‌یشه‌ هه‌ڕه‌شه‌یگ ڕاسكانى و جددیه‌ له‌بان ڕووشنهویرى و چه‌مكه‌یل نوو ك بایه‌ته‌ شان وه‌شان ئۆپه‌راسیۆن دیموكراتى هاووه‌خت وجوود داشتوون".

دكتۆر مزاحم كه‌ره‌م مال الله ئه‌ندام ده‌سه‌ى به‌ڕێوه‌به‌رایه‌تى ڕادیۆى (الناس) له‌ په‌یوه‌ندییگ ته‌له‌فۆنى وه‌ل ماڵپه‌ڕ شه‌فه‌ق له‌ى باوه‌ته‌وه‌ ئویشى:"زوورمى ڕادیۆه‌یلمان له‌ لایه‌ن داراییه‌وه‌ كه‌مده‌سن و ڕوى وه‌ڕوى بارووه‌زع خودى و باوه‌تى فره‌یگ بوینه‌ ك بوینه‌سه‌ نواگر ڕیگه‌ى پیشكه‌فتن و كاركردنیان و هه‌میشه‌ ڕوى وه‌ڕوى پیچه‌وانه‌ى ئه‌وه‌گ توایمنه‌ى و له‌ ده‌ستوور ئه‌رامان هاتیه‌ بویمن، ك جه‌خت كه‌ید له‌بان ئازادیه‌یل گشتى پابه‌ند وه‌تایبه‌تى كه‌ناڵه‌یل ڕه‌سانن پابه‌ند وه‌ كێشه‌ى ملله‌ت و جه‌ماوه‌ر و وشیاركردنیان وه‌ وشه‌ى هوشیار و و ئومیدوار ئه‌وه‌ بویمن ك لایه‌نه‌یل حكوومى ك ده‌قه‌یل قانوونى جیوه‌جیكه‌ن، پشتگیرى و كوومه‌ك ئى توانایه‌یل میدیاییه‌ بكه‌ن ك له‌ شوون ڕمیان دیكتاتۆریه‌ت سه‌رهه‌ڵدانه‌".

مال الله گوزارش له‌ خه‌م و په‌ژاره‌ى خوه‌ى كرد له‌وه‌ر ئه‌و هه‌مكه‌ ته‌گه‌ره‌یله‌ ك هانه‌ ڕیگه‌ى رادیۆه‌یل ناوخۆیى و وت :"وه‌ داخه‌وه‌ ته‌گه‌ره‌یل فره‌یگ هانه‌ ڕیگه‌ى كاركردنمان و تویه‌نم ناوى بنه‌م ده‌مكوتكردن و له‌لیانیش داواكردن بڕ پویل فره‌یگ جوور باج سوود وه‌رگرتن له‌ فرێكوانس په‌خشكردن و یه‌یشه‌ى مایه‌ى ئه‌ڵاجه‌وى هاتنمان بوى چوینكه‌ وه‌ (ئه‌سه‌ر ره‌جعى) شماره‌كریا و له‌كیش تواناى ڕادیۆ وده‌زگایه‌یل نیه‌. و ئه‌گه‌ر ئى ڕادیۆه‌یله‌ خاوه‌ن تواناى گه‌ورایگ بویاتان ئه‌وه‌ بارووه‌زعیان خاستره‌و بوى، و بایه‌ته‌ ده‌سه‌ى په‌یوه‌ندیه‌یل و ڕه‌سانن كوومه‌ك و پشتگیرى له‌ى كه‌ناڵه‌یله‌ بكه‌ید ئه‌را زیاتر ئاشكراكردن و ڕووشنه‌وكردن ڕاسیه‌یل و بیلى ڕه‌سانن پابه‌ند یا ملتزم بڕه‌سیده‌ گشت ڕووڵه‌یل ملله‌ت عیراق".

له‌لاى خوه‌یه‌و ئه‌حمه‌د ئه‌بیه‌ز ڕاوێژكار یا مستشار وه‌رین ده‌سه‌ى ڕه‌سانن و په‌یوه‌ندیه‌یل له‌ په‌یوه‌ندییگى وه‌ل ماڵپه‌ڕ شه‌فه‌ق ئه‌وه‌ ئاشكراكرد ك:"ده‌سه‌ى ڕه‌سانن و په‌یوه‌ندیه‌یل یه‌كیگه‌ له‌ ده‌سه‌یل گرنگ  له‌وه‌ر ئه‌وه‌سه‌ ك كیشمه‌كیش فره‌یگ هه‌س ئه‌را به‌سانن ئیجووره‌ ده‌سه‌یلیگ وه‌ ئه‌نجوومه‌ن وه‌زیره‌یل و ده‌سه‌ى ڕه‌سانن، له‌گشتى زیاتر وه‌ى بڕیاره‌ قه‌بوول نه‌كرد چوینكه‌ یه‌كیگه‌ له‌ ستوینه‌یل سسته‌م دیموكراتى و بایه‌ته‌ بووده‌ نوێنه‌ر میدیاى ئازاد و دویر بوود له‌ ده‌سڵات حكوومى، وه‌لى وه‌داخه‌وه‌ دیاره‌ ك ئیداره‌ى جیوه‌جیكردن ئى ده‌سه‌ نه‌ڕه‌سیه‌سه‌ ئاست ئه‌داى خاس ك بتویه‌نید وه‌ شیوه‌ى فراوانیگ  وه‌بان كه‌رت ڕه‌سانن و كه‌ناڵه‌یل ئاسمانى و كه‌ناڵه‌یلیگتر وازه‌و بوود، و مه‌سه‌له‌ى شماره‌كردن كه‌را و ماوه‌داین وه‌ په‌خش فرێكوانسى وه‌ى جووره‌ نیه‌ود، چوینكه‌ پێوانه‌ یا معیاره‌یل ناوده‌وڵه‌تى هه‌س و نیه‌ود ئى كه‌را وه‌ (ئه‌سه‌ر ڕه‌جعى) شماره‌ بكریه‌ید و گشتمان زانیمن ك ڕادیۆه‌یل ناوخۆیى و هه‌رله‌یوا له‌ پارێزگایه‌یلیش تواناى دارایى نه‌یرن و خاستر ئه‌وه‌ بوى له‌ كه‌راى ماوه‌ى گوزه‌یشته‌ بوه‌خشیه‌ن؛ و من خوه‌م ته‌ماشاى لیست كه‌رایه‌یل كردم و ناڕه‌زا بویم، و وه‌پى قه‌بوول نه‌كردم، و ئومیدوارم ك ده‌سه‌گه‌ خوه‌ى وه‌ دڵڕه‌ق و سه‌خت نیشان نه‌یه‌ید له‌ وه‌رانوه‌ر ڕه‌سانن و كه‌ناڵه‌یل ئاسمانى، و دیاره‌ ك ئى ڕه‌سمه‌ خه‌ریكه‌ زیاتر ئاشكرا و ڕووشنتره‌وبوود ئه‌را ناوه‌نده‌یل ڕه‌سانن له‌ باوه‌ت ده‌سه‌گه‌ ك دى ئه‌و ده‌سه‌ نیه‌ ك سه‌رپه‌رشتى و چاودێرى ڕه‌سانن وه‌گووره‌ى قانوونه‌گه‌ى كه‌ید، وه‌لى وه‌گووره‌ى بنه‌ماى سیاسى".

ئه‌بیه‌ز ئه‌و ئامانجه‌یله‌ ده‌سنیشانكرد ك له‌ خاتریان ئى ده‌سه‌ دامه‌رزیا و وت:"ئامانج دامه‌زرانن ده‌سه‌ى ڕه‌سانن ئه‌وه‌ بوى ك له‌ خزمه‌ت ڕه‌سانن بوود وه‌گووره‌ى ئه‌و مه‌رجه‌یله‌ ك خود ده‌سه‌گه‌ دایان نایه‌ وه‌گووره‌ى ئه‌و مه‌رجه‌یل قانوونیه‌ ك هانه‌ ئیجازه‌ و مووڵه‌ت داین و بایه‌ته‌ نه‌خشوده‌ورى وه‌گووره‌ى قانوونه‌ ڕاسه‌قینه‌گه‌ى بوود ك جه‌خت له‌بان سه‌رپه‌رشتى كردن و چاودێرى ڕه‌سانن عیراقیه‌ و بایه‌ت بوى ئى نه‌خشوده‌وره‌ وه‌ گریه‌داین چه‌ن كۆنفرانس و كۆڕ و سیمینار خوله‌یل مه‌شقداین  خوه‌ى نیشان بیاتاد، و بایه‌ت بوى پویله‌یل ده‌وڵه‌ت عیراقى له‌ خزمه‌تكردن ڕه‌سانن عیراق خه‌رج بكردیاد و ده‌سه‌گه‌ تواناى دارایى دیرید و تویه‌نید سه‌رپه‌رشتى ڕادیۆه‌یل ناخۆه‌ییش بكه‌ید ك كار كه‌ن ئه‌را په‌خشكردن ڕووشنهویرى له‌یه‌كوه‌خشین و وه‌یه‌كه‌وژیان ئاشتیانه‌ وڕووشنهویرى دیموكراتى و پشتگیرى بكه‌ید له‌ كه‌ناڵه‌یل ڕه‌ساننیگ ك حاشا كه‌ن له‌ ڕووشنهویرى تون وتیژى و كینه‌ت و ئه‌یه‌یشه‌ بنه‌ڕه‌ت دروسكردن ده‌سه‌گه‌س و ئى ده‌سه‌ ئه‌را خزمه‌تكردن هویچ پارت و لایه‌ن  و دوكانیگ سیاسى نیه‌ ك په‌رش و بڵاو بوینه‌سه‌ ناو ده‌وڵه‌ت عێراق, و من هامه‌ بان ئه‌و باوه‌ڕه‌ ك ئى ده‌سه‌ ئمڕوو هاماركردن یا تعدیل تواید تا وه‌گووره‌ى قانوون و مه‌رجه‌یلى بچووده‌ ڕى و مێرده‌زماى حزبایه‌تى و كۆنترۆڵ كردن ده‌سڵاتدارى له‌لى دویره‌و بخریه‌ید، و ئى ده‌سه‌ یه‌كیگه‌ له‌ گرنگترین ده‌سه‌یل ده‌وڵه‌ت عیراق و من هام وه‌ل گشت میدیاكاره‌یل ڕوى ڕاس".