ئه‌و قسه‌يله‌ ك ژنه‌يل له‌ هويريان ناچيد

شفق نيوز

ئه‌را نموونه‌: گه‌مه‌كردن وه‌ خيزانه‌گه‌د يا به‌چكه‌گه‌د له‌ناو شوونيگ قه‌ره‌باڵغی شايه‌ت ت له‌لای خوه‌ده‌و بويشيد گه‌مه‌ وه‌ليا ئه‌كه‌م، وه‌لی نه‌خه‌ير ئه‌وه‌ ئحساسی زيه‌مدار ئه‌دێ، يا له‌وه‌رچه‌و خه‌سويره‌د بڕيگ قسه‌ی نه‌گونجياگ بويشيده‌ هاوسه‌ره‌گه‌د جوور"چاخ بويده‌، نازانی خواردن دروس بكه‌يد، ته‌مه‌ڵيد، قسه‌ فريه‌ ئه‌كه‌يد" يا به‌عزه‌ جاريگ يا له‌ شوونه‌يليگ وه‌ ده‌نگ به‌رز هاوار بكه‌يد له‌بانيان ئه‌يه‌ ئحساسی زيه‌مدار ئه‌كه‌يد.

له‌ هه‌مان وه‌خت ژن و دويه‌ته‌يل فريه‌يش وه‌و چشته‌ تويڕه‌ بوون له‌وه‌ختيگ قسه‌ ئه‌كه‌ن و تنيش گووش له‌ليان نه‌گريد، ئه‌را نموونه‌: له‌و وه‌خته‌يله‌ ك ئه‌وان قسه‌ ئه‌راد ئه‌كه‌ن تنيش خه‌ريك خوه‌نين كتاو بويد يا ته‌ماشای ته‌له‌فزيۆن بكه‌يد يا وه‌هه‌ر چشتيگ تر خوه‌د خه‌ريك بكه‌يد و ئه‌وان پشتگووش بخه‌يد.

وه‌خته‌يليگ هه‌س پياوه‌يل ئاماده‌ نيين ئه‌را سوير و خوه‌شی و ته‌فريكردن ئه‌را شوونه‌يل گشتی خيزانه‌يليان وه‌ليانا بدێ، يه‌يش له‌وه‌ختيگ ك خوه‌يان زوی زوی گه‌شت ئه‌نجام ئه‌يه‌ن، ك ئه‌را ئی مه‌راميشه‌ خيزانه‌يليان پشتگووش ئه‌خه‌ن.

وه‌ختوه‌ختيگيش هه‌س دوينيم ژنه‌يل وه‌خته‌يل فريه‌يگ خوه‌يان ئه‌را هاوسه‌ره‌يليان شه‌كه‌ت ئه‌كه‌ن وه‌ ئارايش و خوه‌ڕازانن جنگ ئه‌رايان ك سايشته‌ی ئه‌وه‌سه‌ پيرووزبايی له‌ليان بكريه‌يد و تاريفيان بكريه‌يد و ئه‌را نموونه‌ بويشيده‌پی: ئمڕوو فريه‌ جوانيد و برين ئی پرچه‌ وه‌ی شيوه‌ له‌ليد ئه‌كه‌فيد و ئی جنگه‌يله‌ هه‌ر له‌خوه‌د جوانه‌، ك بيگومان گشت ئی قسه‌يله‌ له‌يوا ئه‌كا هاوسه‌ره‌گه‌د هس وه‌ شه‌كه‌تی نه‌كا و وچانيگ رووحی وه‌ربگريد و ئارامه‌و بدێ.

وه‌لی وه‌ چه‌واشه‌وه‌ ئه‌گه‌ر ئه‌و هه‌ر چشتيگ ئه‌راد كرد و تنيش گرينگی وه‌پی نه‌يايد، ئه‌وه‌ بيگومان شيرازه‌ی ئه‌و خيزانه‌ شيويه‌يد و سووز و خوه‌شه‌ويسی له‌تی نامينيد، ك هه‌ر له‌وه‌ر ئه‌وه‌يش بايه‌سه‌ گرينگی ته‌ماميگ بيه‌يمنه‌ خيزانه‌يلمان و سووز و خوه‌شه‌ويسی بخه‌يمنه‌ ناوماڵه‌يلمان و هه‌ميشه‌ گووش له‌ قسه‌ی هاوسه‌ره‌يلمان بگريم و چه‌ن وه‌ختيگيش بووه‌خشيمه‌ ئه‌وانيش، چوينكه‌ ئه‌وان هاوسه‌ر ژيانمانن.

پشكۆ خاڵدانی

ج . أ