هه‌ق وهساویگ هه‌س نه‌خریاسه‌ پاى وژدان

شفق نيوز

مه‌سه‌له‌یگ هه‌س، ك ئه‌ویش ئه‌وه‌سه‌ پیكهاته‌یل كورد ك مه‌به‌س له‌ چین و تایفه‌یل جوراوجووریه‌ ئایا جویر یه‌ك هه‌ق له‌ى وڵات و نیشتمانه‌ دیرن و ئه‌یاكه‌ دگان وه‌ ئه‌واكه‌یا نه‌یگ ؟ ئایا كوردستان ته‌نیا موڵك ئه‌وانه‌ن ك له‌تى نیشتنه‌ وه‌ئارام؟ ئایا ئى هه‌رێم كوردستان ئازاده‌ ته‌نیا مه‌ردمان نیشته‌جى هه‌رێمه‌گه‌ خه‌بات ئه‌ڕاى كردن و قوربانى ئه‌ڕاى دان؟

هه‌ق و هساویگ هه‌س هیمان له‌یه‌كه‌و نه‌دریاگه‌و باس له‌لى نه‌كریاگه‌و له‌ڕى وژدانه‌و ته‌ماشا نه‌كریاگه‌، یا ئه‌گه‌ر كه‌سه‌لیگ له‌لى ڕه‌سینه‌سه‌و باسى وه‌ هویچ شیوه‌یگ ناكه‌ن و نیه‌نوڕنه‌ ئاینده‌ى چاره‌نویس ملله‌ت كورد وه‌گشتى و ریڕه‌و راسكانى كوردایه‌تى.

جى داخه‌ ئمڕوو فره‌یگ له‌خه‌ڵك كوردستان ئه‌زیز وه‌چه‌و كه‌مه‌و نوڕنه‌ مه‌ردم ده‌یشت هه‌رێم و له‌ڕوى پله‌و پایه‌یش خوه‌یان له‌ئه‌وان گه‌وراتر زانن، وه‌لى باوه‌ڕ بكه‌ن مه‌سه‌له‌گه‌ له‌یوا نیه‌ ئه‌وان زاننه‌ى، چوینكه‌ ئه‌و ئارامى و سه‌قامگیرى و خه‌یر وبه‌یره‌ ك ئیسه‌ له‌سایه‌ى خودا له‌هه‌رێم كوردستان هه‌س و ئه‌و ئاوه‌دانى و به‌خته‌وه‌ریه‌ ك ئیسه‌ له‌هه‌رێم به‌رقه‌راره‌، ئه‌وه‌ خوین هاوبه‌ش و قوربانیداین روڵه‌یل كورده‌ جویر یه‌ك له‌سه‌نگه‌ر خه‌بات له‌ڕووژگار سه‌خت، تا ساڵ 1974و دویاى ئه‌وه‌یش شكه‌ست شووڕش كورد و پلان شووم جه‌زایر و پابه‌ند نه‌وین وه‌ ریككه‌فتننامه‌ى 11ى ئادار، له‌شار و ده‌یشت و شوونه‌یل جیاجیاى كوردستانه‌و مه‌ردم گیانفیداى خوه‌یان كردیان له‌وه‌ر خاتر خاك كوردستان، چه‌ك پێشمه‌رگایه‌تى وه‌شان گشت كوردیگه‌و بوى وه‌بى جیاوازى، بادینى و سۆرانى و فه‌یلى له‌ یه‌ك سه‌نگه‌ر وه‌یه‌كه‌و ژیان، نه‌مر مه‌لا مسته‌فاى بارزانى له‌گشت پیكهاته‌یگ وه‌لیا بوى و هویچ وه‌ختى فه‌رق و جیاوازى نه‌كرد له‌ناونى ئه‌ى و ئه‌و، كورد گشتى پێشمه‌رگه‌ بوین، وه‌تایبه‌ت ئه‌وانه‌ك نیشته‌جى ده‌یشت هه‌رێم كوردستانن، هه‌ر له‌بان كورد و خاك كوردستان چه‌نه‌ها جار ماڵیان سزیاگه‌و خاپوور كریاگه‌و چه‌نه‌ها جار ئاواره‌و دره‌وه‌ده‌ر شاره‌یل بوینه‌. خانه‌قى و مه‌نه‌لى و به‌ده‌رو جه‌سان...هتد، مه‌ردمه‌گه‌یان كووا؟ مه‌گه‌ر ئه‌یانه‌ له‌ده‌یشت هه‌رێم ئاواره‌ نه‌وینه‌و نیشتنه‌و چه‌وه‌ڕى ره‌حمه‌ت خوداو هاتنه‌وه‌ى خاكه‌گه‌یانن ئه‌را باوه‌ش كوردستان؟ مه‌گه‌ر خه‌ڵك ئى ناوچه‌یله‌ وه‌ تفه‌نگ و ڕه‌زنه‌و كویه‌یل سه‌خت و ده‌یشته‌یل دویر كودستان وه‌ پا نه‌وڕین و له‌ى ناوچه‌گه‌ ئه‌را ئه‌و ناوچه‌گه‌ وه‌ زگ ورسگ و نانه‌ڕه‌قه‌ خزمه‌ت وه‌ نیشتمان كردیان و ڕوى دوشمن وسیان له‌وه‌ر خاتر ئازادى و سه‌روه‌خوه‌ى كوردستان؟ له‌وه‌رچه‌ حكوومه‌ت به‌عس ڕوڵه‌یل كورد فه‌یلى بى سه‌رو شوون كردو خیزانه‌یلیان وه‌بان لوغما ئاواره‌ى ئیرانیان كرد؟ ڕه‌حمه‌تى حسێن فه‌یلى و شه‌هید جوامیر و هه‌زاران تر كورد فه‌یلى مه‌گه‌ر پیاو ڕووژ جه‌نگ  نه‌وین و خوین پاك و قرمزیان رشیا بان خاك كوردستان؟ مه‌ردم به‌دره‌و جه‌سان مه‌گه‌ر مانگانه‌ ده‌س یارمه‌تى دریژ نه‌كردیان ئه‌را خه‌باتكه‌ره‌یل كوردو مه‌گه‌ر له‌بان كوردبوین ته‌عریب و ته‌رحیل نه‌كریان؟

گشت ئى هه‌قیقه‌ته‌ له‌تاریخ توومار كریاس، وه‌لى جویر ئه‌وه‌ك مه‌سڵه‌ت كورده‌وارى خوه‌مان ئویشیگ (سویر دى سه‌ما له‌هویرى چى)هه‌ر ئه‌وه‌نه‌ ده‌سیان له‌به‌خته‌وه‌رى گیركرد، ملله‌ت كورد ده‌یشت هه‌رێم و كویه‌نه‌ پێشمه‌رگه‌ى پارتى و بارزانى كه‌س ناویان نیه‌وه‌یگ و نیه‌خریه‌نه‌ هویر و(زگ تیر خه‌وه‌ر له‌زگ ورسگ نه‌یریگ ).

تویه‌نم بویشم ئه‌و خزمه‌ته‌ ك مه‌ردم كورد ده‌یشت هه‌رێم وه‌كوردستان و پێشمه‌رگه‌ى كوردستان كرد، هویچ مه‌ردمانیگ تر ئه‌و خزمه‌ته‌ نه‌كردن، ئه‌و لاپه‌ڕه‌ى چه‌رمگ تاریخه‌ مه‌ردم ده‌یشت هه‌رێم وه‌ مه‌ینه‌تى و ده‌روه‌ده‌رى و كاولكارى پڕیه‌و كردن، هویچ مه‌ردمیگ تر ئه‌و هه‌ڵویسته‌ نه‌یرن. ماڵ و موڵك و دارایى كورد ده‌یشت هه‌رێم زه‌فت كریاو تائیسه‌یش هه‌ر زه‌فته‌و ڕوڵه‌یل نازاریان تائیسه‌یش ته‌رمیان دیار نیه‌و له‌هویچ قه‌ورسانیگ شوون و نوینیان نه‌ویه‌. وه‌لى هیمان وه‌ سه‌ر كورد قه‌سه‌م خوه‌ن و باوانیان هه‌ر كورده‌و خوه‌یانیش له‌هویچ كوردیگ كه‌متر نیه‌زانن له‌ڕوى كوردپه‌روه‌رى و كوردبوین و كه‌سیگ له‌خوه‌یان گه‌وراتر نیه‌گرن و دونیایش بنى دویره‌.

 

جه‌مال ئه‌ركه‌وازی