خوین كورد و نه‌فت كوردستان

شفق نيوز

ئی داواكارى ئه‌نجوومه‌ن ئاسایش ناوده‌وڵه‌تیه‌ خواستیگ لاستیكیه‌و هه‌ر یه‌ك له‌ هه‌رێم كوردستان و به‌غدایش ئه‌تویه‌نن وه‌ قانجاز ته‌كلایه‌نى خوه‌یان له‌یه‌كیه‌و بیه‌ن، به‌غدا ئه‌تویه‌نید وه‌و جووره‌ له‌یه‌كیه‌و بیه‌ید ك لایه‌نگرى ئه‌را به‌غدا ها پیه‌و وه‌ئه‌وه‌ك ئویشید"وه‌ل ریككه‌فتننامه‌یل ناوده‌وڵه‌تى عراق بگونجیه‌ید"و هه‌رێم كوردستانیش ئه‌تویه‌نید وه‌ جووریگ مه‌زه‌نه‌ى بكا ك خواسته‌گه‌ى ئه‌نجوومه‌ن ئاسایش گرتنه‌وه‌ر چاره‌سه‌ریگه‌و هویچ پابه‌ندییگ نه‌ ئه‌را هه‌رێم كوردستان و نه‌یش ئه‌را وڵاته‌یل جه‌هان له‌تى نیه‌، یه‌یش له‌وه‌ختیگ ئه‌نجوومه‌ن ئاسایش تویه‌نستیاد بریار بیه‌ید یا داوا له‌ وڵاته‌یل جه‌هان بكا ك نادێ نه‌فت هه‌رێم كوردستان بسینن.

له‌یرا ئه‌خوازم ئه‌وه‌ بویشم ك ئیمه‌ى كورد وه‌و هه‌مگه‌ قوربانى و تاوانه‌یل دژ وه‌ ئنسانیه‌ته‌ ك ده‌رهه‌قمان ئه‌نجام دریانه‌، نه‌ویمنه‌ جى گرینگى ئه‌نجوومه‌ن ئاسایش، له‌وه‌ختیگ ك هه‌ڵه‌بجه‌ وه‌ چه‌ك كیمیاوى له‌لى دریاو هه‌زاران ئاده‌میزاد بوینه‌ ئاگردوى له‌تى و له‌وه‌ختیگ ئه‌نفال كوردستان كریاو جه‌هان خوه‌ى له‌لى كه‌ڕ كردوید.

له‌وه‌ختیگ ك بارزانیه‌یل و كورده‌یل و فه‌یلى كوشیان و بڕ كریان و پاكسازى ره‌گه‌زى كه‌ركووك و چه‌نه‌ها شاروچكه‌ى ئى نیشتمانه‌ شیویا یه‌كا، جه‌هان گووش له‌ هاوار و نزاى كورد نه‌ته‌كان و چه‌ویان دویكه‌ڵ ژه‌هرواران هه‌ڵه‌بجه‌و سزانن كوردستان نه‌ى، وه‌لى ئیسه‌ گشتیان چه‌ویان ها شوون ئه‌و كه‌شتى نه‌فتهه‌ڵگره‌ ك نه‌فت كوردستان هه‌ڵگرتگه‌.

ئایا نرخ خوین كورد له‌ نرخ ئه‌و نه‌فته‌ كه‌متر بوى له‌لاى كوومه‌ڵگاى ناوده‌وڵه‌تى.؟ بایه‌سه‌ ئه‌و راسى تیه‌ڵه‌ بوینیم ك به‌ڵى گشت ماف ئاده‌میزاد و ئازادیخوازه‌یل جه‌هان و مه‌هانه‌یلیان ئه‌را مقه‌یه‌تیكردن ملله‌ت و نه‌ته‌وه‌یل ژیرده‌سه‌و گشت ئه‌و بانگه‌وازه‌یلیانه‌ ك له‌باوه‌ت ئازادى و دیموكراسى و ماف ئاده‌میزاده‌و كردیانه‌ى و ئیسه‌یش ئه‌كه‌نه‌ى په‌یوه‌سه‌ وه‌ به‌رژه‌وه‌ندیه‌یلیان و خوین كورد نه‌ویه‌ به‌رژه‌وه‌ندى ئه‌را ئه‌وان تا له‌بانى بانه‌ ده‌نگ ، بگر به‌رژه‌وه‌ندیه‌یلیان وه‌و جووره‌ بوى ك بایه‌س بوى خوین كورد بڕژیاتاد، وه‌لى نه‌فت ئه‌تویه‌نید بووده‌ به‌رژه‌وه‌ندى، هه‌ر له‌وه‌ر ئه‌وه‌یش ئه‌و زووانه‌ ك قسه‌ وه‌پى ئه‌كه‌ن له‌بان مه‌سه‌له‌ى نه‌فت زووانیگ نه‌رم و شیرینه‌.

كورد بایه‌سه‌ ئى ده‌رفه‌ته‌ له‌ ده‌س نه‌یه‌ید و دى جه‌هان جوور ئه‌وه‌ بوینید ك هه‌س، نه‌ك جوور ئه‌وه‌ك ئیمه‌ خواستیمه‌ى و بایه‌سیشه‌ نه‌فت بكه‌یمنه‌ جیگر خوین، ك گشت نه‌فت وڵاته‌گه‌مان خوین چه‌ن جایه‌ڵیگ ئى نیشتمانه‌ ناهه‌رزید، هه‌ر وه‌و خاتریشه‌ بایه‌سه‌ ئیمه‌یش وه‌و جووره‌ وه‌ل جه‌هانا مامڵه‌ بكه‌یم و ئاسووه‌یل ئاینده‌یش په‌یوه‌س بكه‌یمنه‌ رشانن نه‌فته‌و، نه‌ك رشانن خوین رووڵه‌یلمان، چوینكه‌ له‌لى ئه‌وان نرخ نه‌فت فیشتره‌ له‌ نرخ خوین.

كورد ئیسه‌ خاس له‌ى مه‌سه‌له‌ ره‌سیه‌سه‌و، ئه‌وه‌ك ئیسه‌یش روى ئه‌یاد قوناغیگ گوزه‌ركه‌ره‌و مه‌سه‌له‌یگ هسیاره‌ له‌ناونى گوزه‌ركردن یه‌كجارى و وسیان، له‌وه‌یش مه‌ترسیدار ئه‌وه‌سه‌ ك خوه‌د وه‌ره‌و دویا بكیشیده‌و، ئمجا هه‌رچه‌نى گامه‌یلیمانیش گورجتر بوون ئه‌را بازداینمان بایه‌سه‌ ئه‌وه‌نه‌یش گرفت و وسانن و خوه‌یكیشانه‌وه‌مانیش بته‌وتر بوون، وه‌لى بایه‌سه‌ كورد سه‌ر نه‌چه‌منید و هه‌وڵ ئه‌وه‌ بیه‌ید وه‌ ئیراده‌ى بته‌ویگه‌و له‌ى قوناغه‌ گوزه‌ر بكاو بایه‌سه‌ مه‌ردم كوردستانیش له‌و گرینگیه‌ بڕه‌سنه‌وه‌و بایه‌سه‌ سه‌ركردایه‌تى سیاسى كوردستانیش له‌ ره‌سینه‌وه‌ى هسیارى مه‌سه‌له‌ى بازداین له‌ى قوناغه‌و گشت مه‌رجیگ ئه‌را ده‌سه‌وه‌ركردنى دڵنیا بوود ك وه‌ى كاره‌ بویمنه‌ وڵاتیگ خاوه‌ن نه‌فت له‌ بازاڕه‌یل جه‌هان.

ئمجا بایه‌سه‌ بچرپنیمه‌ گووش ئاسایش ناوده‌وڵه‌تى ك نرخ نه‌فت له‌لاى ئیمه‌ یه‌كسان نیه‌ وه‌و گرینگى و نرخ ئه‌وانه‌، چوینكه‌ نه‌فت ئه‌را ئیمه‌ له‌ جیاى خوینه‌و خوازیاریم جاریگتر خوین نه‌ڕشیه‌ید ئه‌را وه‌رگرتن مافه‌یلمان و بایه‌سه‌ مافه‌یلمانیش ئسپات بكریه‌ن و بچه‌سپه‌ین.

عارف قوربانی

ج . أ