عراق وه‌ بوو لاپه‌ڕه‌يل خلافه‌ت

شفق نيوز

هه‌رچه‌نی ك هه‌زاران كلكرياگ و په‌يامه‌يل ئاسمانی ئه‌را به‌نه‌يل كلكريا، وه‌لی ئاده‌ميزاد وه‌ شيوه‌ی دروسيگ له‌لی نه‌ڕه‌سينه‌و، به‌ڵكوو خراوييش ده‌رهه‌ق ئه‌و ره‌سينه‌وه‌ كردن، ك يه‌يش بنه‌ڕه‌ت رويداگه‌يل و كاره‌ساته‌يل بوی هه‌ر له‌ سه‌ره‌تای دروسبوين ئاده‌ميزاد تا رووژ ئمڕوو.

ئمجا وه‌ گووره‌ی ئه‌وه‌ك باسی كرديم ئه‌تويه‌نيم بويشيم ك كيشه‌ی گشت عراقيه‌يل ئه‌وه‌سه‌ له‌ گوزاره‌ی هاووڵاتيبوين و ژيان هاوبه‌ش له‌ وڵاتيگ ناڕه‌سنه‌و ك وه‌گووره‌ی راسيه‌يل مێژوويی ئه‌رايان دانه‌مه‌زرياگه‌ ك بگونجيه‌يد وه‌ل مافه‌يل نه‌ته‌وه‌ييان، ك هه‌ر وه‌و خاتريشه‌ چه‌سپانن سه‌په‌رشيكردن يا ره‌سه‌نايه‌تی و ته‌به‌عيه‌ وپاداگرتن له‌بان به‌ياننامه‌ی عوسمانی و مه‌سه‌له‌ی به‌ڵگه‌و چشته‌يل بنه‌ڕه‌تی تر بويه‌ باوه‌ته‌يل گرينگ ئه‌را عراقيه‌يل، چوينكه‌ عراق ته‌نيا وڵاتيگه‌ له‌ جه‌هان په‌يوه‌سه‌ وه‌ی به‌ڵگه‌يل قه‌يزه‌وه‌نه‌و ئسپاتيگه‌ ئه‌را ئه‌وه‌ك جی گرينگی نيه‌ ئه‌را ئه‌وانه‌ك گه‌ردنه‌ شوون حوكمكردن و هه‌ر كه‌سيگيش له‌ی وڵاته‌ ك ره‌گه‌زنامه‌ی عوسمانی ديريد وه‌پی نازاننه‌ی ك هيمان له‌ وڵاتيگ ژيه‌يد مێژووه‌گه‌ی رازياسه‌و وه‌ لاپه‌ڕه‌يليگ وه‌ بوو خلافه‌ت.

هه‌ر نويسه‌ر يا توێژه‌ر يا چه‌وديريگ عراقی شايه‌ت شه‌رم بكا له‌ باسكردن ئی مێژووه‌ يا خوه‌ی بياده‌ ده‌س ئی راسيه‌يله‌، ئمجا وه‌ل ئه‌و گشت هه‌وڵه‌يل كويه‌ن وتازه‌ له‌لايه‌ن ده‌وڵه‌ته‌يل خوه‌رئاواو ناوچه‌گه‌ ك توانای يه‌كه‌وخستن ناونی دو شار يا دو پيكهاته‌ نه‌يرن، ئه‌ی چوين ئه‌تويه‌نن پيكهاته‌يل ئی ملله‌ته‌ يه‌كه‌و بخه‌ن ك تا ئيسه‌يش ده‌نگ ته‌پڵ جه‌نگ له‌تی ژنه‌فيه‌يد له‌ گشت وه‌ختيگ ك وه‌پيا گوزه‌ر ئه‌كا وه‌ ياوه‌ری مه‌سه‌له‌ی هوزايه‌تی، ك نه‌ مه‌سه‌له‌ی نه‌ريته‌يل ئايينی و نه‌ نه‌ريته‌يل كومه‌ڵايه‌تی كوين و نه‌يش ته‌كنۆلۆجيای سه‌رده‌م و په‌يڕه‌وه‌يل تازه‌يش ك جه‌هان كرده‌ ئاواييگ جوور ئه‌وه‌ك ناسرياگه‌ وه‌ جه‌هانگيری توانای ئه‌وه‌ نه‌ياشت رووژيگ دياری بكا ناوی بنه‌يم" رووژ قورتابوين له‌ كينه‌ت " و ئيمه‌ ناوی بنه‌يم " رووژ له‌دايگبوين ملله‌ت عراق دوير له‌ ناونيشانه‌يل تر ".

ئيمه‌ گشت وه‌ختيگ جه‌نگ ناوخوه‌يی له‌ شوونه‌يل جياجيا ديمنه‌و ملله‌ته‌يل تر وه‌رجه‌ ئيمه‌ وه‌پيا گوزه‌ر كردن، وه‌لی ئه‌وان نه‌ف له‌و ئه‌زموونه‌يل وه‌رگرتن و بويه‌ په‌ند و عبره‌ت ئه‌را نه‌وه‌يليان و دی گله‌و نه‌خوه‌ن ئه‌را مه‌سه‌له‌يله‌، وه‌لی ئيمه‌ وه‌ چه‌واشه‌وه‌ فيشتر كاره‌گه‌ سه‌خت و دوباره‌وه‌ ئه‌كه‌يم وه‌ ره‌نگيگ تووختر و خراوتر له‌بان خوه‌مان.

گشتمان رووژ له‌دايگبوين فه‌رمانڕه‌وايه‌يل سته‌مكار زانيم، وه‌لی هويچ مه‌هانه‌يگ يا قه‌واڵه‌يگ وه‌ ده‌سه‌و نه‌يريم ناوی بنه‌يم"رووژ له‌دايگبوين ئی ملله‌ته‌"، ئمجا جوور ئه‌وه‌ك له‌ سه‌ره‌تا ئاماژه‌ وه‌پی كردم ك پيكهاته‌يل ئی ملله‌ته‌ نه‌ك هه‌ر له‌ بار خوه‌يان ناڕه‌سنه‌و، به‌ڵكوو له‌وه‌يش فيشتر دويره‌و كه‌فتنه‌ وه‌ هه‌تككردن وه‌ كرامه‌ت يه‌كتری و دی هويچ په‌نايگ ئه‌را وه‌يه‌كه‌وژيان ئاشتيانه‌و په‌يوندی و مامڵه‌كردن وه‌ل يه‌كتری له‌تی نه‌مه‌ندگه‌و له‌ نه‌وين جورئه‌ت و متمانه‌ ئه‌را ديده‌ن راسيه‌يليش ئه‌وه‌ ده‌ركه‌فيد ك عراقيه‌يل ئاهه‌نگ ئه‌را ئه‌و مه‌ويسی و خه‌مه‌يله‌ ساز ئه‌كه‌ن ك ئه‌ياكه‌يان هاورده‌ی بان ئه‌واكه‌يان و رووژيگ دڵته‌نگی نيه‌ ئه‌را مردن خوه‌شه‌ويسی ناونی مه‌ردمانيگ ك ماوه‌ی سه‌ده‌يگ هه‌وڵ ئه‌وه‌ دان بوونه‌ ملله‌تيگ نه‌ك ته‌نيا له‌بان وه‌رقه‌.

عه‌لی حسێن فه‌يلی

ج . أ