سوپاسگوزارى به‌شێگه‌ له‌ به‌خته‌وه‌رى

شفق نيوز

یه‌كیگ له‌و غه‌ڵه‌ته‌یله‌ ك زوورممان كه‌یمنه‌ى، ئه‌ویش ته‌ماشاكردن كه‌سه‌یل ده‌وروه‌رمانه‌و به‌راوردكردنیانه‌ وه‌ خوه‌مان.

 

ئه‌گه‌ر هات و ئه‌و كه‌سه‌یله‌ ك به‌راوردیان كه‌ید وه‌ل خوه‌د له‌لید خاستر بوین، ئه‌وه‌ ماناى ئه‌وه‌ نییه‌ ك تۆ كه‌س خاسیگ نیید. یا ئیچنه‌ هویره‌و بكه‌ید ئه‌گه‌ر ئه‌وان بار ئابوورییان خاستر بوى له‌لید دى ئه‌وان خاستر و دڵخوه‌شتر و به‌خته‌وه‌رتر ژیه‌ن.

 

جى داخه‌ ك رووژانه‌ ژنه‌فیم ك مه‌ردمه‌یلیگ باس له‌ خوه‌یان به‌رزتر كه‌ن ئه‌را ئه‌وه‌ك خوه‌یان ئسبات بكه‌ن و خوه‌یان دڵنیا بكه‌ن ك ئه‌وان ئه‌و ژیانه‌ دابین نه‌كردنه‌ ك ئاره‌زووى كه‌ن، هس كه‌ن ك ناعه‌داڵه‌تییگ وجوود دیرێد. ئمجا خاسى و خراوى له‌ به‌راوردكردن هه‌میشه‌ چووده‌و ئه‌را ئه‌وه‌ك ئاده‌میزاد وه‌ل كییا خوه‌ى به‌راورد ئه‌كا.

 

له‌یره‌ وه‌خوه‌شاڵیه‌و بڕێگ له‌ قسه‌یل دكتۆر لالش – ئێریك ئونستۆڵ خه‌یمنه‌ ڕوى ك ئویشید:

- ئه‌گه‌ر له‌ یه‌خچاڵیگ خواردن بوى، دڵنگ له‌ كه‌نتۆر بوى، له‌ژێر بنمیچیگ بوید و قه‌نه‌فه‌یگ داشتید له‌بانى بخه‌فێد، ئه‌وه‌ تن له‌ 75% مه‌ردم جه‌هان ده‌وڵه‌مه‌نترید.

- ئه‌گه‌ر پویل داشتید له‌ بانك و بڕێگیش له‌ گیرفاند بوى، ئه‌وه‌ تۆ یه‌كیگید له‌و 8% ده‌وڵه‌مه‌نه‌یل جه‌هانه‌.

- ئه‌گه‌ر شه‌وه‌كیان له‌ خه‌و هه‌ڵساید وه‌ ته‌ندروسى خاسێگه‌و و هویچ شوونیگد ژان نه‌كرد، ئه‌وه‌ تۆ خاسترید له‌و ملیۆن كه‌سه‌ ك نه‌خوه‌شى سه‌خت دیرن یا مرن.

- ئه‌گه‌ر تۆ هویچ وه‌ختێگ له‌جه‌نگ و زندان و ئازار نه‌ژیاوید، ئه‌وه‌ بایه‌د سوپاسگوزار بوید و نرخ ئه‌و ژیانه‌ بزانید ك نزیكه‌ى 500ملیۆن كه‌س نه‌یرنه‌ى له‌ جه‌هان.

- ئه‌گه‌ر تۆ سه‌ربه‌رز و ده‌م وه‌خه‌نستن و گه‌شبین و سووپاسگوزارید، ئه‌وه‌ بایه‌د پیروزبایى له‌لید بكریه‌ێد، له‌وه‌ر ئه‌وه‌ك فره‌ن ئه‌وانه‌ك هووكار ته‌واویش دیرن ئه‌را ئه‌وه‌ك سوپاسگوزار و له‌و شێوه‌ بوون، وه‌لى ناكه‌نه‌ى.

 

ئیمه‌ هه‌وه‌جه‌ وه‌ ئه‌وه‌ دیریم ك رووژانه‌ چه‌ن جارێگ ئاگادار خوه‌مان بكه‌یم تا ئه‌و چشته‌یله‌ ك دیریمنه‌ى خاستر بوینیمنه‌ى و سوپاسگوزار بویمن. شایه‌د ئیمه‌ زوورممان لایه‌ن فیزیكمان بته‌و بوود و" ده‌س ،پا ،چه‌و ،گووش " دیریم و له‌ش ساقیم، دى مه‌ندگه‌سه‌ بان ئه‌وه‌ك ده‌روینمان بته‌و بكه‌یم و بایه‌د سوپاسگوزار بویمن و كار وه‌ پیان بكه‌یم تا ره‌سیمنه‌ ئاست ئه‌و خوه‌شگوزرانیه‌ ك ئاره‌زووى كه‌یم.

 

خوه‌شگوزرانى وه‌و شیوه‌ ك جوور تاكیگ هس وه‌پى كه‌ید ك شایه‌ت فره‌جار جیاواز بوود وه‌ل خوه‌شگوزرانى كه‌سه‌یل تر، وه‌لى دوینید ئه‌و خوه‌شگوزرانیه‌ ئه‌ڕاد ماناى گه‌ورایگ دیرێد و تاقه‌ت و ژیان وه‌پید به‌خشید.

 

به‌خته‌وه‌رى ده‌روین وه‌دیكردنى فره‌ ئاسان نییه‌، ئه‌گه‌ر خوه‌د هووكاره‌ نه‌كردوید ئه‌را ئه‌وه‌ك لایه‌نه‌یل خاس خوه‌د بوینید وه‌رجه‌ لایه‌نه‌یل كزد، ئه‌گه‌ر ئه‌و چشته‌ ك دڵخوه‌شد ئه‌كا هس وه‌پى نه‌كه‌ید و نه‌ویده‌ به‌شێگ له‌ هویره‌وكردنه‌یلید، ئه‌گه‌ر وه‌رده‌وام نه‌وید له‌ ده‌سمه‌یه‌تداین كه‌سه‌یل ده‌وروه‌رد و نیشانداین گه‌شبینى، ئه‌گه‌ر ئه‌و تاقه‌ته‌ هس وه‌پى نه‌كه‌ید ك وه‌ریگرید و ئه‌را ئه‌وه‌ك بخوازید له‌ى بواره‌ ئاگادارتر بوید، ئه‌وه‌ هه‌وه‌جه‌ وه‌ بارێگ ئارام دیرید و ئه‌را ئى مه‌رامیشه‌ تاقیكردنه‌وه‌ى ده‌روینى باره‌ كار ئه‌را ئه‌وه‌ك خاستر ده‌سد بڕه‌سێده‌ ناو سه‌چه‌وه‌یل شاریگ خوه‌د تا بویده‌ هووكاریگ ئه‌را به‌خته‌وه‌رى خوه‌د.

چۆپى مه‌جید

ج. ا