قوناغه‌یل گه‌شه‌كردن كار دبلۆماسى

شفق نيوز

  كار دبلۆماسى جوور به‌شیگ گرینگ له‌ په‌یوه‌ندیه‌یل ناوده‌وڵه‌تى و په‌یوه‌ندیه‌یل ده‌ره‌كى ده‌وڵه‌ت گه‌شه‌كردنیگ گه‌ورا وه‌خوه‌یه‌و دیه‌، وه‌ جووریگ ك ئمڕوو بویه‌سه‌ هووكاریگ سه‌ره‌كى له‌ جیوه‌جیكردن په‌یوه‌ندیه‌یل سیاسى خارجیه‌ى وڵاته‌یل.

هه‌رچه‌نى ناتویه‌نیم وه‌ شیوه‌ى دروسیگ سه‌ره‌تاى ده‌ركه‌فتن دبلۆماسیه‌ت دیارى بكه‌یم، چوینكه‌ دبلۆماسیه‌ت وه‌ل هه‌وه‌جه‌ى ئاده‌میزاده‌یل و گشه‌كردن خواسته‌یلیان له‌ ناونى كه‌سیگ ئه‌را كه‌سیگ تر و كومه‌ڵگایگ ئه‌را كومه‌ڵگایگ تر وجوود و سه‌رهه‌ڵداین وه‌ خویه‌و دوینید، وه‌لى تویه‌نیك بویشیم دبلۆماسیه‌ت كرداریگ سیاسى ك ئامانجى ته‌نیا وه‌دیهاوردن په‌یوه‌ندى ئاشتیانه‌ى ده‌وڵه‌ته‌یل نیه‌، به‌ڵكوو دویره‌وخستن ئه‌گه‌ره‌یل جه‌نگ و مه‌ترسیه‌یلیه‌.

یه‌یش وه‌و مانا ك دبلۆماسى هه‌ر له‌سه‌ره‌تاى دروسبوین ده‌وڵه‌ته‌یل و زیایبوین هه‌وه‌جه‌ى ئاده‌میزاده‌یل وجوود داشتگه‌و ئى دبلۆماسى و له‌یه‌كڕه‌سینه‌وه‌ بویه‌ هووكار جیوازكردن بڕیگ له‌ ژیان ئنسانى ئه‌را ژیان شارستانى.

ئنجا له‌وه‌ر خاتر رووشنه‌وكردن قوناغه‌یل گه‌شه‌كردن دبلۆماسى، ئه‌تویه‌نیم دابه‌شى بكه‌یم ئه‌را دو قوناغ سه‌ره‌كى و رووشنكردنه‌وه‌ى تایبه‌تمه‌ندیه‌یل دبلۆماسى له‌ سه‌رده‌مه‌یل كویه‌ن و تازه‌.

له‌یرا كار دبلۆماسیه‌ت تازه‌ هه‌وه‌جه‌ وه‌ باسكردن نه‌یرید، چوینكه‌ وجوود دیرید، وه‌لى كار دبلۆماسى له‌سه‌رده‌م كویه‌ن هه‌ر له‌وه‌خت كومه‌ڵگایه‌یل ئنسانى وجوود داشتگه‌. له‌ناونى زانایه‌یل یه‌كده‌نگى وجوود نه‌یرید ئه‌را سه‌ره‌تاى ده‌ركه‌فتن كار دبلۆماسى، ك وه‌ شیوه‌یگ ئاشكرا دابه‌ش بوین له‌بان چه‌ن هویر و ئه‌ڕاى چوینیگ ، له‌وانه‌یش: بڕیگ له‌لیان بنه‌وه‌ى ئه‌را سه‌رده‌م شارستانیه‌ت كویه‌ن له‌لاى خوه‌رهه‌ڵاتیه‌یل وه‌تایبه‌ت له‌لاى رووم و بیزنتینیه‌یل و دویاخریش ئه‌را شارستانیه‌ت لاى عه‌ره‌به‌یل.

وه‌لى بڕیگ تر له‌لیان به‌نه‌وه‌ى ئه‌را ئاڵشت ئوڵشتكردن ته‌خت پاپا له‌ سه‌ده‌ى 13و مه‌ردمانیگیش هه‌ن وه‌ چه‌واشه‌ى ئه‌ڕاى چوین یه‌كه‌م به‌نه‌وه‌ى ئه‌را سه‌ره‌تاى ده‌ركه‌فتن كومه‌ڵگایه‌یل ئنسانى و گه‌شه‌كردن ئى كومه‌ڵگایه‌یله‌و دروسبوین په‌یوه‌ندیه‌یل ژیر وه‌ژیر له‌ سه‌رده‌م كویه‌ن.

رێبین عه‌بدولڕه‌حمان

ج . أ