پیه‌ڵ رووشنهویرى ناونى هه‌رێم كوردستان و وڵات هه‌ره‌مه‌یل

شفق نيوز

ك ژیان له‌تى ئارام و سه‌قامگیره‌و پیكهاته‌ى كوومه‌ڵایه‌تیه‌گه‌ى پیكهاتگه‌ له‌چه‌ن نه‌ته‌وه‌یگ جوور كوردو توركمان و كلدوئاشوور و كه‌مینه‌یل تر، ك رووح له‌یه‌كوه‌خشین و برایه‌تى دیرن له‌ناونى خوه‌یان له‌ژیر سایه‌ى كه‌شیگ پڕ له‌ئازادى.

كورد مه‌یل گامناین دیرن وه‌ره‌و دروسكردن پیه‌ڵه‌یل په‌یوه‌ندى وه‌ل ملله‌ته‌یل جه‌هانا له‌وه‌ر خاتر وه‌دیهاوردن په‌یوه‌ندیه‌یل ستراتیجى له‌بان بنه‌ماى هاوكارى و ئاشنایى له‌بان رووشنهویرى ملله‌ته‌یل و ئاڵشتكردن شاره‌زایى له‌گشت مه‌یدانه‌یل جوور رووشنهویرى و بازرگانى و پیشه‌سازى و ئابوورى و ئاوه‌دانى و بیجگه‌ مقه‌یه‌تیكردن به‌رژه‌وه‌ندیه‌یل هاوبه‌ش.

ئنجا هه‌رێم كوردستان پڕه‌ له‌رووشنهویرى، ئه‌ویش وه‌حوكم پیكهاته‌یل جوراوجوورى جوور رووشنهویرى كوردى و عه‌ره‌بى و توركمانى و سریانى و كلدوئاشوورى و رووشنهویرى كه‌مینه‌یل تر هاوبه‌ش له‌ژیان هه‌رێم، هه‌ر له‌وه‌ر ئه‌وه‌یش ئداره‌ى هه‌رێم كوردستان هویر له‌دروسكردن پیه‌ڵ په‌یوه‌ندى كرد وه‌ل ده‌وڵه‌ته‌یل جه‌هان له‌وه‌ر ئاشنابوین له‌بان رووشنهویریه‌یل جوراوجوور و له‌هه‌مان وه‌خت تا مه‌ردمان بیگانه‌یش له‌رووشنهویرى كوردستانى و سروشت كوردستان و شوونه‌واره‌یلى بڕه‌سنه‌و، وه‌ل ئه‌وه‌یشا ته‌ماشاى كه‌ش سیاسى و كوومه‌ڵایه‌تى و نه‌ریت ملله‌ت كوردمان بكه‌ن له‌هه‌رێم.

هه‌ر له‌وه‌ر ئه‌وه‌یش له‌ژیر چه‌ودیرى وزاره‌ت رووشنهویرى هه‌رێم، شاندیگ رووشنهویرى مسرى"هه‌فته‌یگ رووشنهویرى"هه‌ڵوژان و له‌تى وه‌رپرسه‌یل گه‌وراى مسرى و وه‌ڕیه‌وبه‌ر گشتى په‌یوه‌ندیه‌یل رووشنهویرى خارجى له‌ وزاره‌ت رووشنهویرى مسرى و كه‌سایه‌تیه‌ییل تر گرته‌ خوه‌ى، ئه‌ویش ئه‌را قویله‌وكردن په‌یوه‌ندیه‌یل رووشنهویریمان وه‌ل مسرا، چوینكه‌ ئیمه‌ بنه‌ڕه‌ت تاریخى وه‌لیانا دیریم و له‌یوا هس كه‌یم نزیكیم له‌ملله‌ت مسرى زیاتر له‌ملله‌ته‌یل تر. ئنجا په‌یوه‌ندیه‌یل كورد و مسرى چووده‌و ئه‌را سه‌رده‌م فرعه‌ونیه‌یل، ك یه‌یش په‌یوه‌ندییگ گرینگ و تاریخیه‌، ك وه‌ل ئه‌وه‌یشا له‌دهۆك ته‌په‌یگ هه‌س وه‌ناو"ته‌په‌ى فرعه‌ونیه‌یل"و شوونه‌وار فرعه‌ونى له‌تى دوینریاسه‌و ك یه‌یش به‌ڵگه‌یگه‌ له‌بان ئه‌و په‌یوه‌ندیه‌یله‌ ك ئابوورى و رووشنهویرى بویه‌ له‌ناونى هه‌ردوگ ملله‌ت كوردستانى و مسرى. بیجگه‌ ئه‌وه‌یش فره‌یگ له‌خیزانه‌یل كورد له‌سه‌رده‌م ده‌وڵه‌ت ئه‌یووبى له‌وه‌خت سه‌ڵاحه‌دین جیواز بوین ئه‌را مسر و له‌ورا نیشته‌جى بوین.

كورد به‌ش خاسیگ دیرن له‌په‌یوه‌ندى رووشنهویرى مسرى، ئه‌را نموونه‌: یه‌كه‌م رووژنامه‌ى كوردى"كوردستان"له‌قاهیره‌ ده‌رچى و یه‌كه‌م چاپخانه‌ى كوردییش هه‌ر له‌مسر بوى و یه‌كه‌مین رادیۆى كوردییش له‌ساڵ 1959 له‌مسر بوى، بیجگه‌ ئه‌یانه‌یش كورده‌یل فره‌یگیش به‌شدار بوینه‌ له‌داناین رووشنهویرى مسرى و تویه‌نیم بویشیم: ناودارترین رووشنهویر و كه‌سایه‌تیه‌یل مسرى كوردن و له‌وانه‌یش: محه‌مه‌د عه‌بده‌، عه‌باس مه‌حموود ئه‌لعه‌قاد، ئه‌حمه‌د شه‌وقى، قاسم ئه‌مین و كه‌سه‌یل تر. وه‌ل ئه‌وه‌یشا فره‌یگ كورده‌یل مسر ره‌سینه‌ به‌رزترین پۆسته‌یل حكوومه‌ت له‌وانه‌ك ده‌ور كارایگ داشتن له‌دروسكردن رووشنهویرى مسرى.

بایه‌سه‌ ئه‌وه‌یش له‌هویره‌و نه‌وه‌یم ك خه‌باتكه‌ر گه‌ورا مه‌لا مسته‌فاى بارزانى نه‌مر په‌یوه‌ندى تاریخى داشت وه‌ل سه‌رۆك مسرى كوچكردگ جه‌مال عه‌بدولناسر، وه‌ل ئه‌وه‌یشا قسه‌ى جه‌مال عه‌بدولناسر له‌هویرمان ناچى ك تاریف كوردستان كرد وه‌"كڵاو عه‌ره‌ب" ك ماناى مقه‌یتكردنه‌ له‌ سه‌ر عه‌ره‌ب.

دى ئه‌و فیستیڤاڵه‌ چشت خاسیگ بوى ئه‌را قویله‌وكردن په‌یوه‌ندیه‌یل ناونى كورد و مسرى و دروسكردن پیه‌ڵیگ ئه‌را ئه‌وه‌ك له‌ئه‌زموون كه‌سه‌یل تر نه‌ف وه‌ربگریم.

 

محه‌مه‌د عه‌لى سه‌ماوى

ج