پێشمه‌رگه‌و ده‌زگای سه‌ربازی عراقی

شفق نيوز

وه‌رجه‌ ئه‌وه‌يش هه‌نای ك به‌عسيه‌يل كوده‌تا كردنه‌ بان عه‌بدولكه‌ريم قاسم، ميليشيايگ دامه‌زرانن و ناونی نانه‌ حه‌ره‌س قه‌ومی، ك ئه‌ركه‌يلی پاكسازيكردن گشت ئۆپۆزسيۆنه‌يل بوی جوور پيشكه‌فتنخوازه‌يل و ديموكراسيخوازه‌يل عراقی و كوردستانی، ئه‌ويش له‌ڕی كرده‌وه‌يل كوشتن ك هه‌زاران له‌ خاسترين كادره‌يل له‌ به‌غدا و كوردستان گرته‌وه‌، دويای ئه‌وه‌يش له‌شوون كوده‌تا له‌بان عه‌بدولڕه‌حمان عارف له‌ ١٧ی ته‌مووز ١٩٦٨ وه‌ كينه‌ته‌و سوپا هاوردنه‌ كار ئه‌را سزانن كوردستان وه‌ ناپاڵم و به‌رميل به‌نزين و دينامێت، ته‌نانه‌ت ميليشيايگ سوپای مه‌ردمی دامه‌زرانن ك خراوه‌كاری له‌ كوردستان كرد و كرده‌وه‌يل كووچ وه‌پيكردن زووره‌ملی ده‌رهه‌ق مه‌ردم كورد ئه‌نجام دان ئه‌را باشوور و خوه‌رئاوای عراق و گشت جووره‌ كوشتن و سزا و ترۆر و دزيكردنيگ ده‌رهه‌ق مه‌ردم هاوردنه‌ كار، ك ئه‌ويش ده‌س له‌ناو ده‌س وه‌ل فه‌وجه‌يل خه‌فيفه‌ و ته‌نانه‌ت شماره‌ی ئه‌و ئاوايه‌يله‌ ك كاول و ويرانی كردن وه‌ ته‌مامی ره‌سيه‌ نزيكه‌ی فيشتر له‌ ٤٥٠٠ ئاوايی وه‌ باخ و بووسان و مزگفت و كه‌نيسه‌و خوه‌ندنگاو ناوه‌نده‌يل ته‌ندروسی و مه‌ردمه‌گه‌يشی ته‌رحيل كردن ئه‌را بياوانه‌يل باشوور عراق و دوياخريش له‌ناويان دان و فريه‌يگ له‌ليان زينگ وه‌چاڵ كريان، ك شماره‌يان ره‌سيه‌ فيشتر له‌ ٨٢ هه‌زار كه‌س له‌ ژن و مناڵ و پير و په‌ككه‌فتگ، ئه‌ويش له‌ يه‌كيگ له‌ دڕه‌نده‌ترين كرده‌وه‌يل له‌ناوبردن وه‌جه‌م له‌ شوون جه‌نگ جه‌هانی دويه‌م.

ئمجا ئه‌و سه‌ربازه‌يل عراقيه‌ و ته‌نانه‌ت ئه‌و ميليشيايه‌يليشه‌ خاس ها هويريان ك جه‌نگ كرديان يا له‌وه‌رده‌م يه‌كه‌يل سه‌ربازی يا دوياخر مقه‌يه‌تی له‌و خاكه‌ كرديان ك داگيری كرديان ك چوين مامڵه‌ وه‌ل ئه‌و مه‌ردم كورده‌ كرديان و چوينيش هيز پێشمه‌رگه‌ مامڵه‌ وه‌ليانا كردياد هه‌نای وه‌ديل كه‌فتيانه‌ ده‌سيان و پێشمه‌رگه‌ چوين به‌شه‌ خوه‌راك خوه‌ی خستياده‌ وه‌رده‌م ئه‌و ديل و زه‌خمداره‌يله‌، وه‌لێ ده‌زگای هه‌واڵگری سه‌ربازی و ئاسايش سه‌ربازی گشت جووره‌ سزايگ ده‌رهه‌ق ديل و زه‌خمداره‌يل مه‌ردم كورد هاورديانه‌ كار له‌وه‌چه‌و مه‌ردم ئاوايی و شاره‌يل.

وه‌ختيگيش ك كوردستان تويش خه‌ته‌رترين په‌لامار ترۆريستی هات له‌لايه‌ن ريكخرياگ ترۆريستی داعش، ئی هيزه‌يل چه‌كدار كورده‌ ئسپات ئازايه‌تی خوه‌يان كردن له‌ جه‌نگ وه‌ل حورمه‌تگرتن له‌ ياسايه‌يل جه‌نگ و مامڵه‌كردن وه‌ل ديله‌يل و زه‌خمداره‌يل دوشمن و سه‌ركه‌فتنه‌يليگيش هاورده‌ ده‌س بويه‌ جی سه‌رسامی گشت جه‌هان و مسته‌ڵح پێشمه‌رگه‌ وه‌و خاتريشه‌ بويه‌ مسته‌ڵحيگ جه‌هانی و ته‌نانه‌ت وه‌و هيزه‌ تاريف كريا ك جه‌نگ له جيای ‌گشت جه‌هان پيشكه‌فتگ ئه‌كا دژ هه‌مه‌جيه‌ت و دوياكه‌فتن، ك هه‌رچه‌نی چه‌ك پيشكه‌فتگيش نه‌يرێد و هيمان ناڵنێد وه‌ده‌س ئابڵووقه‌ی ئه‌وانه‌گ سه‌ركردايه‌تی ئه‌و ده‌زگايه‌يل سه‌ريازی و ئاسايشيه‌ ئه‌كه‌ن له‌ وڵاته‌گه‌ چ له‌ مه‌سه‌له‌ی پڕچه‌ككردن يا مه‌شقداين يا مووچه‌و بودجه‌.

كفاح مه‌حمود كه‌ريم