ناديه‌ موراد

شفق نيوز

ئه‌وه‌سه‌ له‌و خوه‌ندنگاوه‌ وه‌ل سه‌دان ئافره‌ته‌يل تر ئێزيدی عراقی و مناڵه‌يل بويچگ وه‌ديل كه‌فتنه‌ ده‌س ترۆريسته‌يل له‌ دڕنده‌ترين تاوان له‌ مێژوو ك ئيمه‌يش هايمنه‌ سه‌ده‌ی بيس و يه‌ك.

چه‌وه‌يلی باوه‌ڕ نه‌كردن براو خوه‌يشكه‌يلی له‌وه‌رده‌می كوشيه‌ن وه‌ل ٧٠٠ كه‌س تر له‌ ماوه‌ی چه‌و پرتاننيگ، چه‌و نويقان و وت: شايه‌ت كابووس بوود له‌ تيه‌ريكه‌ شه‌و، وه‌لێ وه‌ هاواره‌و چه‌و واز كرد له‌بان بوو خوين له‌گشت شوونيگ.

ئی دويه‌ت بيس ساڵانه‌ چوين وه‌رگه‌ی فيشتر گرت و جه‌سه‌ی چوين بوی و دڵه‌ پاك و بيتاوانه‌گه‌ی چوين بوی ك ده‌ورگردی پڕ بوی له‌ شه‌ڕ و له‌و وه‌حشيه‌يل دڕنده‌.

وه‌لێ ئه‌وه‌ بوی ناديه‌ موراد ئێزيدی جوور واشه‌ی پاڵه‌وان عراقی شايسته‌ی ئه‌وه‌ بوی بدێده‌ ناديه‌ موراد جوور خه‌نسا و خه‌وله‌ی دويه‌ت ئه‌زوه‌ر و زه‌ينه‌ب و زوها حه‌ديد و گشت ئافره‌ته‌يل گه‌ورا ك هه‌وه‌جه‌ وه‌ تاريفكردن نه‌يرن و ته‌نيا هه‌ رناويان به‌سه‌، چوينكه‌ كرده‌وه‌يليان به‌رز بويه‌و هه‌ر ئه‌وه‌يش بويه‌سه‌ هووكار به‌رزه‌وكردنيان و بوينه‌سه‌ ئاساره‌ وه‌ دريژايی مێژوو.

ناديه‌ موراد ئێزيدی عراقی شانازيه‌ ئه‌را نه‌ته‌وه‌ و عزه‌تی و هه‌ڵوژاننيشی جوور باڵوێز نيازه‌يل پاك وه‌ڕاسی شانازيه‌ ئه‌را نه‌ته‌وه‌يل يه‌كگرتگ و گشت ئنسانيه‌ت.

وه‌لێ ئمڕوو ئه‌وه‌سه‌ ها ناونيمان و نيشتمانه‌گه‌يشی ك ده‌سپيشخه‌ری ئه‌را له‌خوه‌يگرتنی نه‌كرد جوور ئه‌وه‌گ ملله‌ته‌يل جه‌هان گرته‌ خوه‌ی ئه‌وه‌سه‌ ك بايه‌سه‌ له‌بان حكومه‌ته‌گه‌ی چه‌ويگ وه‌پيا بخشنێد و ده‌سپيشخه‌ری بكا ئه‌را ئه‌وه‌گ مه‌سه‌له‌گه‌ وه‌ رێڕه‌و راسيگ وه‌ره‌و لای بچه‌رخنێد وه‌رجه‌ ئه‌وه‌گ كار له‌كار بترازيه‌ێد، ئمجا هه‌ر نيشتمانيگ ك رووڵه‌ی خوه‌ی نه‌گرێده‌ باوه‌ش شايسته‌ی ئه‌وه‌ نيه‌ وه‌پی بويشێد نيشتمان.

له‌يس شوبه‌ر