خواردنه‌یل كوردستانى وه‌ تام و بوو كورده‌وارى

شفق نيوز

 

سى جووره‌ خوارده‌مه‌نى كورده‌وارى هه‌س جوور"دووینه‌و ته‌رخێنه‌و كه‌شك" ك له‌ئاوایه‌یل به‌رهه‌میان ئه‌یه‌رن و له‌شاره‌یل فرووشیه‌ن، وه‌تایبه‌ت له‌ هه‌ردوگ وه‌رز پایز و زمسان له‌وه‌ختیگ ك له‌گشت كوردستان سه‌ردى فریه‌یگه‌، له‌و وه‌خته‌یله‌ خواردن"دووینه‌" مه‌ردم ئاوایه‌یل وه‌ ته‌واوى پشت وه‌پى به‌سن ئه‌را خوراك رووژانه‌، ك یه‌یش له‌ وه‌رز تاوسان ئاماده‌ كریه‌ێد له‌وه‌خت دره‌و ، گه‌نم تیه‌رن و خه‌نه‌ى ناو ئاو ئه‌را چه‌ن رووژیگ و خه‌نه‌ى وه‌ر خوه‌ر تا وه‌ ته‌واوى وشكه‌و بوودو دویاخر هه‌ڕنه‌ى وه‌رجه‌ ئه‌وه‌ك هامیته‌ى بكه‌ن وه‌ل شیره‌ى زه‌بادى و شیواننى وه‌ كه‌فیر و لاوردن دووه‌ ترشه‌گه‌ى.

له‌شوون هامیته‌كردن گه‌نم هه‌ڕیاگ وه‌ل دوو له‌و قه‌زانه‌یل گه‌وراو شیواننى، نریه‌ێده‌ بان ئاگره‌و تا وه‌ته‌واوى كوڵیه‌ێد و دویاخر خریه‌ێده‌ وه‌ر خوه‌ر تیندار تا جوور ئاوته‌ماته‌ وه‌پى باێد، دویاى ئه‌وه‌یش وه‌ده‌س جوور تووپه‌یل بویچگ وه‌پى كه‌ن و داینه‌ن له‌بان شوونیگ پاك هه‌م له‌ژێر خوه‌ر تا وشكه‌و بوودو دى هویچ ئاویگ له‌تى نامێنێ. ئمجا شێواز دروسكردن ئى خوراك كورده‌واریه‌ له‌ ئاوایه‌یل كریه‌ید، ئه‌ویش وه‌ خیسانن چه‌ن پارچه‌یگ له‌و تووپه‌یل دووینه‌ وه‌گووره‌ى هه‌وه‌جه‌ له‌ناو ئاو گه‌رم تا جوور شووروا وه‌پێ تیه‌ێدو دویاخریش نریه‌ێده‌ بان ئاگر و له‌شوون ئه‌وه‌یش پیاز ئه‌راى هه‌نجیه‌ێد وه‌ل روین و ئاڵه‌ت و نمه‌ك تا تیه‌ێده‌ كوڵ و بووده‌ خوراكیگ پڕ له‌ پرۆتین. ئمجا مه‌ردم ئاوایه‌یل و جفتیاره‌یل گرنگى فریه‌یگ ده‌نه‌ خواردن دووینه‌ له‌ شه‌وه‌كیان وه‌رجه‌ چگن ئه‌را ناو باخ و بووسان، یا نیمه‌ڕوان جوور خواركیگ پرۆتیندار تیه‌رنه‌ى كار له‌وه‌ر ئه‌وه‌ك توانا ئه‌یاده‌ له‌شیان ئه‌را ماوه‌ى چه‌ن وه‌ختێگ .

له‌ شاره‌یل تریش جوور سلێمانى و ده‌ورگردى ك له‌ هه‌ردوگ وه‌زر پایز و زمسان ك بڕ فره‌یگ له‌لى تیه‌ریه‌ێده‌ كار و فرووشیه‌ێد له‌ دوكانه‌یل، دى نووڕید ئه‌و ژنه‌یله‌ ك كه‌نه‌ى خواردن تام و له‌زه‌ت خوه‌شیگ ئه‌راى دورس كه‌ن له‌ڕێ ئاڵه‌ت جووراوجوور و چشته‌یل تر.

وه‌لى خواردن" ته‌رخینه‌" ك زوورمى له‌ ئاوایه‌یل دروس كریه‌ێد، یه‌یش جوور دووینه‌ دروس كریه‌ێد ته‌نیا جیاوازى كه‌میگ دیرید له‌ كوڵانن، ك یه‌یش گه‌نم هه‌ڕیاێ وه‌ل شه‌له‌م ته‌ڕ و گه‌ڵاگه‌ى تیكه‌ڵى كه‌ن و دویاى شووردنى خه‌نه‌ى ناو قه‌زان گه‌ورایگ و نریه‌یده‌ شوون گه‌رمیگه‌و تا خه‌مه‌ره‌ بكاو تا راده‌یگ تامى تورشه‌و بوود، دویاى ئه‌وه‌یش توپتووپه‌و كریه‌ێد جوور دووینه‌و نریه‌ێده‌ وه‌ر خوه‌ره‌و تا وه‌ته‌واوى وشكه‌و بوودو هه‌ڵیگرن ئه‌را زمسان.

ته‌رخێنه‌ له‌ ئاوایه‌یل فێشتر تیه‌ریه‌یده‌ كار، وه‌ل ئه‌وه‌یشا ئه‌وانه‌ك فشار خوین دیرن فیشتر تیه‌رنه‌ى كار، چوینكه‌ ئه‌و فشاره‌ تێرێده‌ خوار و كوتان دڵیش رێكه‌و خه‌ێد. هه‌ڵبه‌ته‌ یه‌یش وه‌گووره‌ى قسه‌ى شاره‌زایه‌یل تایبه‌ت ئسبات كریاگه‌. شێواز دروسكردن ته‌رخێنه‌ جوور ئاش، هاوشێوه‌ى دووینه‌س، وه‌لى جیاوازى فره‌ كه‌میگ هه‌س له‌ناونیان له‌ڕوى تامه‌گه‌ى، ئمجا ته‌رخێنه‌ له‌گشت تاقیگ تویه‌نید له‌لى بخوه‌ید وه‌ل خواردنه‌یل تر .

وه‌لى خوراك كه‌شك، وه‌ تاوسانان ئاماده‌ كریه‌ێد له‌ ئاوایه‌یل كورده‌وارى، ك یه‌یش له‌ خانواده‌ى شیره‌مه‌نیه‌، وه‌تایبه‌ت له‌ شیر خه‌س، ك خریه‌یده‌ ناو قه‌زان گه‌وراو خریه‌یده‌ وه‌ر خوه‌ر تا وه‌ته‌واوى سفته‌و بوود، ئمجا وه‌ ده‌س جه‌ڕیه‌و ده‌ن تا وه‌ یه‌كجارى ئاوه‌گه‌ى ده‌رچوود و له‌شوون ئه‌وه‌یش بویچگ بویچگیه‌و كه‌ن و هیلنه‌ى تا وشكه‌و بوود.

فره‌یگ له‌ مه‌ردم شار و ئاوایه‌یل كوردستان ئه‌را ناشتا كه‌شك تیه‌رنه‌ كار له‌وه‌ر تام و بووه‌ خوه‌شه‌گه‌ى و نه‌فوه‌رگرتن له‌ پرۆتینه‌گه‌ى، ئمجا وه‌ شێواز جووراوجوور ئاماده‌ كریه‌ێد، له‌لیان هه‌ن تێكه‌ڵى كه‌ن وه‌ل خا یا پیاز ئه‌ڕاى هه‌نجنن و له‌ناو روین دان تامیگ تر ئه‌راى دروس كه‌ن.

هه‌ر ئه‌وه‌ مه‌ندگه‌ بویشیم ك ئى خواردنه‌یل كورده‌واریه‌ ته‌نیا له‌ ماڵه‌یل دروس كریه‌ن چ له‌ئاوایى و چ له‌شار، هه‌ر له‌وه‌ر ئه‌وه‌یش ئاشخانه‌ى تایبه‌تیگ وه‌ى خواردنه‌یله‌ نییه‌ جوور خوراكه‌یل تر.

هیواز عه‌زیز

ج . أ