چه‌ ریوده‌یگ ئه‌گه‌رگه‌وجیگ ده‌س بنه‌یگه‌ دوگمه‌یگا ؟

شفق نيوز

ئمجا به‌عزی له‌و وڵاته‌یله‌ له‌لایه‌ن ئایمه‌یل گه‌وج ونه‌فامیگ جورسه‌دام گوڕوه‌گوڕ خوه‌مان حوكم كریه‌ی ومومكنه‌ هه‌رئانیگ له‌چشتیگ عه‌سه‌بی بوون وده‌س بنه‌نه‌ مل دوگمه‌ی ئه‌و چه‌كه‌یله‌ وكاره‌سات مه‌رگباریگ وه‌دی بارن ؛

له‌ سای ئه‌وهه‌ڕه‌شه‌یل ترسناكه‌ ك سه‌لامه‌تی مه‌ردم نیشته‌جای بان زه‌یوخه‌نه‌ خه‌ته‌ر؛ هیوچ ئایم عاقڵیگ وه‌ئومید ومتمانه‌وه‌ نیه‌نوڕیگه‌ ئاینده‌ی جه‌هان . مه‌ردمیش ئه‌وانه‌گ چه‌ن هه‌فته‌ وه‌رجله ‌ئیسه‌ خوه‌یان سه‌رقاڵ وه‌وخه‌وه‌ر بی بنه‌وا كردن ك گوایه‌ جه‌هان له‌سال ٢٠١٢ ئه‌خته‌ر تازه‌یگ ئه‌را یه‌كمین جارتیه‌یگه‌ دی و ده‌ی له‌قه‌ی زه‌یووبه‌شه‌رله‌ ریو زه‌یو نیه‌یلی ؛ خاستره‌ خوه‌یان وه‌هه‌ڕه‌شه‌یگ راسه‌قینه‌ سه‌رقاڵ بكردان ك خوه‌یان وه‌ده‌س خوه‌یان دروسی كردنه‌و ئه‌ویش بومب نه‌وه‌ویه‌ . به‌ڵێ له‌ی جه‌هانه‌ ك هه‌رچشتیگ وه‌ئاسانی له‌شیونیگ ئه‌را شیونیگتربریه‌ی قه‌د وه‌دیوری مه‌زانن ك ئه‌و بومبه‌یل نه‌وه‌ویه‌ له‌ وڵاتیگ ئه‌را وڵاتیگتربوریه‌یگ وئه‌وسا كومه‌ڵگای ناوده‌وڵه‌تییش نیه‌تیوه‌نی ئه‌وچه‌كه‌ كونترۆڵ بكه‌یگ وشایه‌د ئه‌وچه‌ك كوشه‌نده‌ بكه‌فیگه‌ ده‌س میلیشیاوده‌سه‌و تاقمه‌ تروریستیه‌گان وجه‌هان وه‌پی له‌ناو بوه‌ن . وه‌رجله‌ ماوه‌یگیش كۆریه‌ی باكور خوه‌ی له‌ وه‌راوه‌ر جه‌هان قۆته‌و كردو موشه‌ك  نه‌وه‌وی خوه‌ی دپیه‌كه‌وكردو نیشاندا ك وه‌بی له‌وه‌رچه‌وگردن خه‌ته‌ره‌یل ئی چه‌كه‌ ئه‌را جه‌هان دریژه‌ ده‌یگه‌ ته‌قالاگانی ئه‌را وه‌ره‌ونوا بردن ئه‌وچه‌كه‌ . له‌ولایشه‌و ئیران دریژه‌ ده‌یگه‌ ته‌قالاگانی ئه‌را وه‌ده‌س هاوردن ئه‌وچه‌كه‌و ته‌نانه‌ت سه‌رۆك كۆمارئه‌و وڵاته‌ ئیوشیگ ( مه‌سه‌له‌ی وه‌ده‌س هاوردن چه‌ك نه‌وه‌وی یه‌كلاوه‌ بیوه‌و ئیران ده‌س له‌ته‌قالاگانی له‌ی باوه‌ته‌ نیه‌كیشی )  . ئه‌مریكایش ك خوه‌ی وه‌پولیس جه هان یا وه‌ كوردیه‌گه‌ی بیوشیم خوه‌ی وه‌قویخای جه‌هان زانیگ نیه‌تیوه‌نی ڤایروس چه‌ك نه‌وه‌وی له‌ بڵاوبیون بوسنیگ ؛ وئیسه‌ له‌ریو زانستیه‌و واشنتون نیه‌تیوه‌نی ئه‌و چه‌كه‌ له‌ ده‌س كۆریه‌ی باكوور بسینی وهه‌میش نیه‌تیوه‌نی سایه‌بانیگ ئه‌را مه‌قه‌یه‌تی كردن ناوچه‌یل ژیرده‌سه‌ڵات خوه‌ی له‌ هه‌ڕه‌شه‌یل چه‌ك نه‌وه‌وی دروس بكه‌یگ . به‌ڵێ له‌ی جه‌هان هه‌ركه‌ ئه‌را خوه‌ی ئمڕووه‌ كه‌س نیه‌تیوه‌نی سه‌لامه‌تی به‌شه‌ره‌یه‌ت زامن بكه‌یگ وهه‌ركه‌سیگ بایه‌د ده‌س بنه‌یگه‌ بان كڵاوخوه‌ی تا وا نه‌وه‌یگه‌ی و له‌جی خوه‌ی سه‌رقاڵ كردن وه‌مه‌قه‌یه‌تی مه‌ردم بایه‌د یه‌كم جارمه‌قه‌یه‌تی خوه‌ی بكه‌یگ . راسه‌ ئیوشن عاقڵه‌یل ودانایه‌یل ئمڕوو شه‌وانه‌ سه‌رنه‌نه‌ بان باڵشت نگه‌رانی وهیوچ كه‌سیگ هه‌رچه‌نیش به‌رزترین پله‌ی گه‌شبینیش داشتووگ نیه‌تیوه‌نی وه‌بی كابوس وهیوره‌و كردن وه‌كاره‌سات بخه‌فیگ . به‌ڵێ له‌ وه‌ختیگ به‌شه‌رسه‌رده‌مه‌یل كیوه‌نه‌ ته‌نیا چه‌كه‌یل سه‌ره‌تایی داشت و ڕخی له‌ ئاینده‌ چیاد ؛ ئمڕوو چیون ڕخی ئه‌را ئاینده‌ نیه‌چووگ ئه‌گه‌ر هات ودوگمه‌ی ئه‌و چه‌ك كوشه‌نده‌ كه‌فته‌ وه‌رده‌س ئایم نه‌فام وگه‌وجیگ وده‌س نا مل دوگمه‌گه‌یا ؛ ئمجا ئه‌و وه‌خته‌ بیجگه‌ خودا خوه‌ی كه‌س نیه‌زانی چه وه سه‌ر به‌شریه‌ت تیه‌ی.