چاره‌نویس په‌یوه‌ندیه‌یل هه‌رێم كوردستان و به‌غدا

شفق نيوز

راى كورد ئى به‌ش كوردستانه‌ لكاننه‌ عراق عه‌ره‌بیه‌و له‌وه‌ر ئه‌وه‌ك خود ئه‌و لكاننه‌ ناسروشتى بوى تائیسه‌یش و له‌سه‌رده‌م گشت ئه‌و ده‌سڵاتداره‌یل یه‌ك له‌شوون یه‌كه‌ ك حوكم عراق كردنه‌ بارودوخ ملله‌ت كورد وه‌ل ده‌سڵاتداره‌یل به‌غدا ئه‌را ته‌نیا سه‌عاتیگیش ئاسایى نه‌ویه‌و هه‌میشه‌ له‌ جه‌نگ و كیشمه‌كیش و دژایه‌تى بویه‌.

له‌شوون پرۆسه‌ى ئازادى عراق له‌ساڵ 2003، سه‌ركردایه‌تى سیاسى كورد ئاره‌زوو له‌داڵگبوین عراقیگ تازه‌ى دیمۆكراسى و فیدراڵى كرد له‌ هه‌ردوگ پرۆسه‌ى ئازادكردن و بنیاتناین عراق، وه‌لى چوینكه‌ به‌شیگ له‌وانه‌ك هانه‌ به‌رزایى ده‌سڵات له‌ به‌غداو هه‌ڵگر هه‌مان ئه‌قڵیه‌ت و زاینده‌ى هه‌مان ژینگه‌ن و باوه‌ڕ وه‌ دیمۆكراسى و هاوبه‌شى نه‌یرن له‌ حوكمڕانى و هه‌میشه‌ بارودوخ عراق زیاتر ناخوه‌ش و پڕ قه‌یران تر بوود ك وه‌رده‌وامیش قه‌یرانه‌یل سیاسى مه‌مه‌ر سه‌ره‌كى سه‌خته‌وبوین كێشه‌یله‌.

له‌ڕوى ده‌ستوریه‌و له‌ناونى گشت پێكهاته‌یل عراق، كورد پێكهاته‌یگ گرنگه‌ له‌ عراق و نه‌خش سه‌ره‌كى دیرێد له‌گشت هاوكێشه‌یل سیاسى، له‌دویاى هه‌ڵوژاردن ئه‌نجوومه‌ن نوێنه‌ره‌یل له‌ساڵ 2010 پێكهاوردن كابینه‌ى حكوومه‌ت ئه‌وقه‌ره‌ دویا كه‌فت ك ركۆرد جه‌هانى شكان، ته‌نانه‌ت تا زیاتر له‌ شه‌ش مانگ ئه‌نجوومه‌ن نوێنه‌ره‌یل عراق له‌وه‌ر رێكنه‌كه‌فتن هه‌ردوگ پێكهاته‌ى سوننى و شیعه‌ى عه‌ره‌بى نه‌تویه‌نست دانیشتنه‌یل ئاسایى خوه‌ى ئه‌نجام بیاد و دویاخریش وه‌ هه‌وڵ و ده‌سپیشخه‌رى سه‌رۆك بارزانى و له‌ ئاكام رێككه‌فتننامه‌ى هه‌ولێر ئى حكوومه‌ت ئیسه‌ى عراقه‌ پێكهات، وه‌لى دویاى 2 ساڵ له‌ رێككه‌فتننامه‌ى هه‌ولێر و دویاى چه‌نه‌ها ساڵ له‌ په‌سه‌نكردن ده‌ستوور عراق له‌وه‌ر لاداین و خود دزینه‌وه‌ى حكوومه‌ت عراق له‌ مادده‌یل ده‌ستوورى چ له‌بان ئاست عراق وه‌گشتى چ ئه‌وانه‌ك په‌یوه‌ندیدارن وه‌ هه‌رێم كوردستانه‌و له‌و مادده‌یل ده‌ستووریه‌ جیوه‌جى نه‌كریانه‌و هه‌ر وه‌یجووره‌ وه‌بێ چاره‌سه‌ر مه‌ندنه‌.

هویر و سیاسه‌ت سه‌رۆك بارزانى و دیدو له‌یه‌كه‌وداینى ئه‌را ئیسه‌و ساڵه‌یل ئاینده‌ى هه‌رێم كوردستان ئه‌وه‌ ئه‌خوازێد ك لایه‌نه‌یل سیاسى و مه‌ردم كوردستان یه‌كڕز و یه‌كهه‌ڵوێست بوون له‌وه‌رانوه‌ر ئى مه‌سه‌له‌ى چاره‌نویسسازه‌، بایه‌د لایه‌نه‌یل سیاسى و میدیایه‌یل ئه‌و راسیه‌یله‌ چه‌واشه‌وه‌ نه‌كه‌ن و ئه‌و هه‌ڵكه‌فت یا واقعه‌ جوور خوه‌ى ئه‌را مه‌ردم باس بكه‌ن، چوینكه‌ ئه‌یه‌ په‌یوه‌ندى وه‌ چاره‌نویس گشت تاك و هاووڵاتیه‌یل هه‌رێمه‌و دیرید وه‌تایبه‌ت دویاى ئه‌وه‌ك چاره‌سه‌ر نه‌كردن كێشه‌یل و پشتگووش خستن داواكاریه‌یل یاسایى و ده‌ستوورى كورد هه‌ڕه‌شه‌و له‌شكركیشى هاته‌ بانى. ئمجا باوه‌ڕ ناكه‌یم ك هاووڵاتییگیش مه‌ندوید له‌ هه‌رێم كوردستان له‌ مه‌رام و نیاز مالكى نه‌ڕه‌سویده‌و له‌وه‌رانوه‌ر ئه‌زموون و چاره‌نویس هه‌رێم  كوردستان.

ماناى ئه‌وه‌سه‌ ئه‌را چه‌ كه‌س و لایه‌نه‌یلیگ خوازن ئه‌و راسیه‌یله‌ له‌ مه‌ردم چه‌واشه‌ بكه‌ن و له‌وه‌ر خاتر به‌رژه‌وه‌ندى تایبه‌ت حزبى و خودى له‌راسى مه‌سه‌له‌گه‌ لائه‌یه‌ن و ته‌قالا ئه‌كه‌ن مه‌ردم وه‌ ڕێ چه‌فتیگا بووه‌ن و ته‌نانه‌ت پێشنیار و ئه‌ڕاى چوینه‌یل خوه‌یانیش ئه‌یه‌نه‌ پاڵ سه‌رۆك هه‌رێم و قسه‌ى بى بنه‌ما له‌ ده‌زگایه‌یل ره‌سانن ئه‌ڕاى هه‌ڵوه‌سن. ئایا ئه‌یانه‌ كه‌ى ده‌رس له‌مێژوو وه‌رگرن و تا كه‌ى ته‌نیا ئامانج هه‌ر گیرفان و كورسى بوود؟ یه‌یش له‌وه‌ختیگه‌ ك بایه‌د سیاسه‌ت ئیسه‌ ئه‌را له‌وه‌رچه‌وگرتن به‌رژه‌وه‌ندیه‌یل ملله‌ت بوود و له‌هه‌مان وه‌خت بایه‌د له‌ى جووره‌ وه‌خت و چاره‌نویسسازیگیش به‌رژه‌وه‌ندى باڵاى ملله‌ت كورد مه‌رام و ئامانج سه‌ره‌كى گشت كه‌س و لایه‌نیگمان بوود.
د. ڤیان سلێمان

ج.ا