ئه‌راچه‌ كيشه‌ى فه‌يلى ره‌سيه‌ قوناغ نه‌هاتنه‌وه‌؟

شفق نيوز

ئمڕوويش ئه‌و كيشه‌يله‌ چه‌ن ك بايه‌سه‌ باس بكريه‌ن؟ ئيمه‌ بوار فراوان و تواناى گونجياگيگيش داشتيم، وه‌لێ ئه‌و ده‌رفه‌ته‌يله‌ ك هاتنه‌ ده‌س بوينه‌ خاڵ كزبوين و هه‌ڕه‌شه‌ ئه‌رامان، يه‌يش خراوتره‌و له‌وه‌گ خه‌ياڵ بكريه‌ێد، وه‌ل ئه‌وه‌يشا له‌ چشته‌يل بويچگ كيشه‌يل گه‌ورا دروس كرديايم، ئه‌گه‌ريش پشت وه‌ ئاماره‌يل شماره‌ى كورده‌يل فه‌يلى بووه‌سياتايم، زه‌حمه‌ته‌ له‌ شوونيگ شماره‌ى فريه‌يگ وه‌دى بكرديايم روێداگه‌يل ده‌ورگردى وه‌ واقعيه‌ت شيه‌و بكرياتاد، ئه‌وانه‌يش ك هانه‌ هوير جموجويل رووژگار ده‌رفه‌ته‌يل گومبوى هويچ ئه‌رايان وه‌دى نايه‌رێد.

له‌ عراق ئمڕوو ناسنامه‌يل جوراوجوور وه‌ناوه‌يل و ئنتمايه‌يل جياجيايگه‌و ده‌ركه‌فتگه‌و هه‌ر يه‌كيگ له‌و ناسنامه‌يليشه‌ تويه‌نريه‌ێد روخسارى ئه‌را كينه‌ت و تون وتيژى ئاڵشت بكريه‌ێد، له‌ هه‌مان وه‌خت مه‌ردمان تريش وه‌رده‌وامن له‌ڕوى نه‌ته‌وه‌يى و تايفه‌گه‌رى، ك يه‌يش خاسيه‌يل له‌هويره‌و بردنه‌ له‌ڕوى مه‌عنه‌وى و قه‌واره‌ى رۆڵ سياسى و كومه‌ڵايه‌تيمان، چوينكه‌ كيشه‌گه‌مان دو مه‌سه‌له‌ گرته‌سه‌ خوه‌ى، يه‌كه‌ميان خوازياره‌ بچێده‌ ناو مه‌يدان جه‌هانى و ئه‌واكه‌يش ته‌حه‌فوز ديرێد و چه‌وى له‌ ده‌يشت چوارچيوه‌ى ناوچه‌يى گڕ نايه‌ێد.

گرينگترين هووكاره‌يل سه‌ره‌كى ئه‌را زه‌ره‌ده‌يلمان له‌ى راسيه‌ خوه‌ى ديه‌سه‌و‌ ك ئيمه‌ ئه‌را ئه‌و كيشه‌يل سه‌خته‌ هيشتنه‌مان له‌ سه‌رده‌م كيمشه‌كيش كورد و شيعه‌ له‌بان مه‌سه‌له‌ى مه‌ندنه‌وه‌، نه‌ك هه‌ر ته‌نيا شاكامى وه‌ ده‌سڵات، به‌ڵكوو وه‌و جه‌ده‌ليه‌تيشه‌ بريه‌ێد ك هوير و ڕا و ده‌نگه‌يل ملله‌تيگ زينگيش ئه‌رامان نايه‌رێده‌ ده‌س، ئمجا ئه‌وه‌گ ئى راسييشه‌ زانێد بايه‌سه‌ زرنگ بدێ و باسى ئه‌را نه‌وه‌يل ئاينده‌ بكا ك له‌ ئاينده‌ ئه‌و ڕيه‌يله‌ نه‌گرنه‌وه‌ر، ئيسه‌يش له‌ حاڵ حازر فريه‌يگ له‌ رووڵه‌يل پيكهاته‌گه‌ ك چينه‌سه‌ ئه‌و مه‌يدانه‌و وه‌ بوونه‌ى تونڕه‌وى نه‌ته‌وه‌يى يا تايفى باس له‌ى راسيه‌ ناكه‌ن و ئيمه‌يش له‌وه‌ر هووكار دروينى ده‌سنيشانى ناكه‌يم.

كيشه‌يل مێژوويى و رووشنهويرى و كومه‌ڵايه‌تى له‌ ناوچه‌يلمان داخريانه‌و تواناى گفتگوو له‌ده‌س دايمنه‌و هه‌ر چين و ره‌نگيگ سياسى به‌رزه‌و بوى وه‌ره‌و ئاسمان تايبه‌ت خوه‌ى و ته‌ماشاى له‌خوه‌ى نزمتر ناكا، ئمجا جوور بار له‌يوا پيكهاته‌يگيش دوياى مه‌ينه‌تى و قوربانيه‌يل فريه‌يگ دوينێد ئاقبه‌ت ئه‌ى حاڵه‌گه‌يه‌ جوور ئه‌وه‌گ ئيسه‌ ئيمه‌ له‌تى ژيه‌يم و تواناى ئه‌وه‌ نه‌يرێد سه‌دان و هه‌زاران جار تر قوربانى ئه‌ڕاى بيه‌ێد.

په‌يوه‌ندى و له‌يه‌كڕه‌سينه‌وه‌ له‌ناونيمان ئه‌ركه‌يليگ نيه‌ حكومه‌ته‌يل بچه‌سپننه‌ى، به‌ڵكوو له‌ به‌شدارى و ئاماده‌بوين وه‌كردار په‌يا ئه‌دێ، وه‌ل ئه‌وه‌يشا كزى په‌يوه‌نديمان نيشانه‌ى وشكبوين هويره‌يل مه‌ده‌نيمان، ئى كزييشه‌ زه‌ره‌ده‌يل كومه‌ڵگايى ره‌سانه‌ پيكهاته‌گه‌و له‌ ئاست په‌يه‌مان كه‌مه‌و كرد له‌ناو چينه‌يل فه‌رمى.

ئمڕوو ئاده‌ميزاد فه‌يلى دوياى ئه‌و بيده‌نگييه‌، ئه‌گه‌ردێده‌ شوون سه‌قامگيرى و ئارامى نسبى ته‌نانه‌ت ئه‌گه‌ر چشت ئاساييگيش بويه‌و له‌ هه‌ركوورا بوود، ئه‌ويش له‌وه‌ر ئه‌وه‌گ تا بتويه‌نێد له‌و كيشه‌و ئاژاوه‌يله‌ قورتار بدێ ك ئه‌ياده‌ تويشى و له‌و كيشه‌يله‌ واێد ك رووژانه‌ وه‌ ره‌نگ و روخسار جياجيايگ ئه‌يه‌نه‌ تويشى و باز له‌بان مافه‌يلى ئه‌يه‌ن.

عه‌لى حسێن فه‌يلى