كى برایم پاشا حالى بكا؟!

شفق نيوز

نه‌هاوردیمنه‌ و ناچاریمن باس له‌ به‌دبه‌ختى كورد فه‌یلى بكه‌یم، وه‌لى نه‌وه‌گ ئه‌و باوه‌ته‌یل سیاسیه‌ ك یه‌كڕاس دیارده‌یگ یا كێشه‌یگ سیاسى باس كه‌ن.

به‌ڵى كێشه‌ى كورد فه‌یلى له‌ شوونیگ و له‌ بڕگه‌یگ زه‌مه‌نى نه‌گونجیاى گیر كردیه‌، ك بویه‌سه‌ بازاڕیگ گه‌رم ئه‌را چه‌ن لایه‌نیگ ك په‌یوه‌ندى وه‌پیه‌و نه‌یرن، وه‌لى له‌وه‌ر به‌رژه‌وه‌ندیه‌یل سیاسى خوه‌یان وه‌ره‌و ئاقاره‌یلیگ به‌نه‌ى ك وه‌ نه‌ف خوه‌یان بوود، بى ئه‌وه‌گ هویر له‌و زه‌ره‌ده‌یله‌ بكه‌ن ك تویش ئى چین سته‌مدیده‌ى كورده‌ تیه‌ید.. چوینكه‌ بڕیگ لایه‌ن، له‌لى توان واز له‌ كوردیاتى خوه‌ى بارید، و له‌ برایل وكه‌س وكار باوان خوه‌ى واز بارید، و بووده‌ تاكه‌ ماڵیگ له‌ ده‌یشته‌ى سیاسه‌ت بى ڕه‌حم، و بڕیگ تر توان له‌ ناو گیژاوه‌ى دینى و مه‌زه‌وى بتاوننه‌وه‌ى، و نه‌یلن بووده‌ قویلایى و بوعد دیارییگ نه‌ته‌وه‌ى كورد له‌ ناو جه‌رگه‌ى به‌غداى پایته‌خت و ده‌ورووه‌رى.. له‌ هه‌مان وه‌خت برایه‌یل كوردیشى تا ئیسه‌ وه‌گووره‌ى خواست نه‌تویه‌نستنه‌ پشت ئى چینه‌ بگرن تا بتویه‌نى دوباره‌ هه‌ڵسیده‌ پا و ده‌وران خوه‌ى بڕانید ئه‌را خزمه‌تكردن ملله‌ت خوه‌یان ك ملله‌ت كورده‌ و قه‌ت واز له‌لى نه‌هاوردنه‌. زیاتر له‌سه‌رى نیه‌چیمن وجاریگ تر په‌نا به‌یمنه‌ ئه‌و وه‌سه‌ر هات و قسه‌یل پڕ مه‌عنا و پڕ حكمه‌ته‌ ك له‌ باوگ وباپیره‌یلمانه‌و ئه‌رامان مه‌نیه‌سه‌و، یه‌یشه‌ نموونه‌یگ له‌و وه‌سه‌رهاته‌یله‌ ك فره‌ قسه‌كردن نیه‌تواید:

له‌ ساڵه‌یل حوكم عوسمانى، و له‌ یه‌كیگ له‌ شاره‌یل كورده‌وارى لاى خوه‌مان، بیوه‌ژنیگ یه‌تیمبار كوڕیگ به‌دڕه‌فتار داشت، ڕووژانه‌ داواى خه‌رجى فره‌یگ  له‌لى كردیاد، و ناچارى كردیاد ئه‌و قردگه‌ پویله‌ ك وه‌ هه‌زار حال كه‌فتیاده‌ گیرى وه‌ زوور بوود یا ناڕازى كوت فره‌یگى بنه‌یده‌ ناو له‌پى، وه‌نه‌ هه‌زار نه‌فات وه‌پى كه‌ید.

چه‌ن ساڵیگ وه‌ى جووره‌ وه‌سه‌ر چوى و كه‌مه‌كه‌مه‌ كوڕ گه‌ورا بوى و هه‌ر وه‌بى كاروبارى و ته‌مه‌ڵى و به‌دڕه‌وشتى ڕووژگار خوه‌ى بردیاده‌ سه‌ر و وه‌ره‌ وه‌ره‌ داواى پویل زیاتر له‌ى دایگ بیچاره‌یه‌ كردیاد، تا كاره‌گه‌ ڕه‌سانه‌ى ئه‌و ڕاده‌ ك نه‌تویه‌نید ناز كوڕه‌گه‌ى بكیشید.

له‌و شاره‌ ك ئى بیوه‌ژن و كوڕه‌ له‌ تى ژیان بردیانه‌ سه‌ر كابرایگ حوكمدار عوسمانى ناوى برایم پاشا بوى و فره‌ وه‌ دڵڕه‌قى و زاڵمى ناو ده‌ركردوید و مه‌ردم شاره‌گه‌ له‌ تاوى موى ڕسیان، و ئه‌گه‌ر به‌خت سیه‌ى كه‌سیگ بڕه‌سانیاده‌ى وه‌رده‌س ئه‌و حاكمه‌، ئه‌وه‌ ئه‌گه‌ر له‌ ته‌ور ده‌س جه‌لاده‌گه‌ى قورتار بویاتاد، لاى كه‌م وه‌ ئه‌شكه‌نجه‌ و قه‌مچى و شه‌ق وشه‌لاق كه‌وڵى گردیانه‌و... بیوه‌ژنه‌گه‌یش هه‌ر جارى كوڕه‌گه‌ى فره‌ ئاجز وجاڕسى بكردیاد، هه‌ڕه‌شه‌ى ئه‌وه‌ دیاده‌ لى ك له‌لاى برایم پاشا شكاتى كه‌ید.. تا ڕووژیگ له‌ ڕووژان كار له‌ كار ترازیا و بیوه‌ژنه‌گه‌ به‌تیه‌ شڕه‌گه‌ى كرده‌ سه‌ر و تا سه‌راى برایم پاشا گت نه‌كرد.. وه‌ختى داروده‌سه‌ى برایم پاشا بیوه‌ژنه‌گه‌ بردنه‌ حزوورى و ده‌رد دڵ خوه‌ى ئه‌را پاشا باسكرد، یه‌كڕاس برایم پاشا ده‌موچه‌وى درژه‌و كرد وبرویه‌یلى له‌یوا شووڕه‌وكرد ك بان نیمه‌ى چه‌وى گرد و خوڕیه‌ كابراى جه‌لاد و فه‌رمان داپى ك وه‌ل ئى پیره‌ژنه‌ بچوود و وه‌ ته‌عجیل تاو كوڕه‌ بى ئه‌ده‌ب و بى ئتباره‌گه‌ى ده‌سگیر بكه‌ید و ته‌پ وتووپ خاسیگى بكه‌ید و قه‌وڵ ئه‌وه‌ له‌لى بسینید ك جاریگ تر دایگى تویڕه‌ نه‌كه‌ید!

وه‌ختى بیوه‌ژن وه‌ل كابراى جه‌لاده‌و كه‌فته‌ ڕى، ته‌ماشاى شان وكووڵ و ده‌س وبازوو و ڕوى سه‌خت و درژى كرد، ترس نیشته‌ دڵى و سووز دایگانه‌ى هاته‌ جووش نه‌وه‌گ وه‌ ده‌س ئى جه‌لاده‌و چشتى وه‌سه‌ر كوڕه‌گه‌ى باید، له‌ دڵ خوه‌یه‌و ڕاى خوه‌ى گوێڕان؛ وه‌لى له‌وه‌ ترسیا ك بویشیده‌ پى من كوڕه‌گه‌م وه‌خشام و جه‌لاده‌گه‌ سزاى خوه‌ى بیه‌ید ك ئه‌زیه‌ت خستیه‌سه‌ وه‌رى، كه‌فته‌ فكره‌وكردن وته‌گبیركردن پیلانیگ ك هه‌م خوه‌ى وهه‌م كوڕه‌گه‌ى له‌ى گیچه‌ڵه‌ قورتار بكه‌ید، وه‌لى هویچ وه‌پى نه‌كریا، له‌ى ئانه‌ وه‌ختى چویده‌ ناو ئى هویر و باسه‌و له‌ ناكاوا جه‌لاده‌گه‌ خوڕیه‌ لى : كوڕه‌گه‌د هاكوو ، نیشانم بیه‌ره‌ى تا ئمڕوو خاس ئه‌ده‌بى ئه‌راد بیه‌م.. ژنه‌گه‌یش له‌ پڕویكا چوى و یه‌كڕاس كلك ئه‌را جایڵیگ له‌ ناوجاده‌ دڕا كرد و  وت: ئا ئه‌یه‌سه‌ كوڕه‌گه‌م, هیمان قسه‌گه‌ له‌ ده‌م پیره‌ژن وه‌ته‌واوه‌تى ده‌رنه‌چوى، كابراى جه‌لاد جوور په‌ڵنگ په‌ڵتاف كوتا ونیشته‌ بان سینه‌ى جایڵ بیچاره‌ و وه‌ ڕه‌پووڵ و گورمچه‌ و مشت و شه‌ق وزلله‌ى بیشوماریگ دنیا له‌وه‌ر چه‌وى تاریكه‌و كرد وه‌ شیوه‌یگ ك نه‌زانستیاد له‌وه‌ر چه‌ ئى كابرا وه‌ى جووره‌ ڕه‌فتار وه‌لیا كه‌ید و له‌لى پرسى: ئاخر خودا هه‌قم له‌لید بسینى، ئه‌را وه‌ى جووره‌ وه‌پیم كه‌ید.. من چه‌ كردمه‌.. چه‌ بردمه‌.. چه‌ خواردمه‌؟!!.. كابراى جه‌لادیش چنگ نا ناقڕه‌ى جایڵ بیچاره‌ و قه‌یرى قسه‌ى ناشرین وه‌پى كرد و وته‌پى: هه‌ى خوێڕى.. چه‌ و فڵان وه‌پى هاتى.. خودا گیاند بسینى.. ئه‌را نیه‌چید كاریگ ئه‌را خوه‌د په‌یا بكه‌ید ونان ڕووژانه‌ى خوه‌د و دایگ پیر وپه‌ك كه‌فتیید بدرارید؟.. له‌وه‌ خاستر نیه‌ زوور باریده‌ بان ئى پیره‌ژن بیچاره‌؟

جایڵه‌گه‌یش سه‌رى له‌ى قسه‌یله‌ سوڕ مه‌ن و هه‌زار قه‌سه‌م وقورعان خوارد ك ئى ژنه‌ دایگى نیه‌، و دایگى یه‌ چه‌ناى چه‌ن ساڵه‌ ئه‌مر خودا كردیه‌.. و ڕوى كرده‌ ژنه‌گه‌ و وته‌پى: میمى بكه‌ خاتر خودا و مه‌ولد په‌یغه‌مبه‌ر ڕاسى بویشه‌ ئى كابراى جه‌لاده‌، ئاخر من كه‌ى كوڕ تونم، من له‌ كوو و تن له‌كوو؟!

پیره‌ژنیش وه‌ختى ئى كاره‌ له‌ جه‌لاده‌گه‌ دى ك چه‌وه‌ سه‌ر ئى كوڕ بیچاره‌ هاورد، زیاتر ترس نیشته‌ دڵى ئه‌را كوڕه‌گه‌ى و هات وه‌رده‌وامى دا درووه‌گه‌ى و وته‌ جایڵه‌گه‌: ئاخر كوڕم من چه‌ن جار وتمه‌ پید له‌ لاى برایم پاشا شكاتد كه‌م و تو هه‌ر وه‌ قسه‌م نه‌كردید.. ئنجا له‌وه‌رده‌م كابراى جه‌لاد ده‌نگ به‌رزه‌وكرد و وت: تو هیمان ڕوى سه‌ختى وه‌لما كه‌ید و ئویشید تو دایگم نید؟!

كابراى جه‌لادیش زیاتر تویڕه‌ بوى و قه‌یرى تر دالى و وته‌ ژنه‌گه‌: ئه‌وه‌ من دى ته‌وبه‌ دامه‌سه‌ كوڕه‌گه‌د و ئیسه‌یش ئویشمه‌ پى بیلا وه‌ كووڵ هه‌ڵدبگرید و ئه‌را ماڵ بووه‌یده‌ده‌و ، ئه‌گه‌ریش وه‌ قسه‌د نه‌كرد، به‌و دوباره‌ خه‌وردارم بكه‌، منیش كار خوه‌م وه‌لیا زانم چه‌س.. كوڕ جایڵیش ناچار بوى پیره‌ژن سوار مل خوه‌ى كرد و وته‌ پى: یه‌ڵا دایه‌ بیلا بچیمن ئه‌را ماڵ.. له‌ ڕى، براى ئه‌و كوڕه‌ دا لایانا و وه‌ختى نووڕست براگه‌ى پیره‌ژنیگ وه‌بان ملى هه‌ڵگردیه‌، سه‌رى سوڕ مه‌ن و له‌ براگه‌ى پرسى: برا تو خودا بویشه‌ پیم  ئى ژنه‌ كیه‌؟ ئه‌ویش وت: یه‌ چه‌ده‌ برا ئه‌را نیه‌زانید ئه‌یه‌ دایگمانه‌؟! براگه‌یشى وت: كاكه‌ ئه‌یه‌ چه‌ده‌ مه‌گه‌ر دایگمان وه‌رجله‌ چه‌ن ساڵیگ ئه‌مر خودا نه‌كرد و وه‌ده‌س خوه‌مان نایمنه‌ى ژیر خاك؟ من له‌ى كاره‌ حالى نیم، تو خودا تو حالییم بكه‌؟ كوڕه‌ جایڵه‌گه‌یش وت: وه‌خودا من زانم تو چه‌ ئویشید و خاس له‌ مه‌سه‌له‌گه‌ حالییم؛ وه‌لى وه‌من مه‌ویش، كوڕ توام بچوود برایم پاشا حالى بكا!!

 

ماجد سوره‌ میرى