ئئتلاف مالكى له‌بان به‌شه‌وكردن راسكانى ده‌سڵات جه‌خت ئه‌كا و عیراقیه‌یش خه‌یده‌ى دروو

شفق نيوز

ڕاسكانى كه‌ن له‌ ده‌سڵات، و ئه‌وه‌یشه‌ ئاشكراكرد ك ئه‌گه‌ر حكوومه‌ت هاوبه‌شى نیشتمانى نه‌ویاتا ئى سسه‌وبوین و شلیه‌ ڕوى نه‌یاد له‌ فۆرمه‌ى حكوومى، وه‌لى لیست عیراقیه‌ جه‌خت له‌بان ئه‌وه‌ كرد ك هاوسه‌نگى له‌ به‌شه‌وكردن ده‌سڵات تا ئیسه‌ كارا نه‌كریایه‌ چوینكه‌ هیمان ڕیككه‌فتنه‌یل هه‌ولێر جیوه‌جى نه‌كریانه‌.

خالد ئه‌سه‌دى ئه‌ندام ئئتلاف ده‌وڵه‌ت قانوون ك به‌شیگه‌ له‌ هاوپه‌یمانى نیشتمانى له‌ په‌یوه‌ندییگى وه‌ل شه‌فه‌ق ئاماژه‌ وه‌وه‌یشه‌ دا ك:"حكوومه‌ت هاوبه‌شى نیشتمانى وه‌و مه‌عنا نیه‌ ده‌س بخریه‌یده‌ ناو ده‌سڵاته‌یل (صلاحیات) ده‌ستوورى وه‌وجووره‌گ بڕیگ لایه‌ن له‌لى ڕه‌سینه‌سه‌و، چوینكه‌ ده‌سخستن ویرانكارى ئۆپه‌راسیۆن سیاسیه‌ و یه‌یشه‌ ماوه‌ وه‌پى نیه‌دریه‌ى". و له‌بان ئه‌وه‌یشه‌ جه‌ختكرد ك:"باسكردن به‌شه‌وكردن ده‌سڵات وه‌ى شیوه‌ى چشتیگ ڕه‌ته‌وكریایه‌ و ماوه‌ وه‌كه‌س نیه‌دریه‌ى ته‌عدا بكه‌یده‌بان ده‌سڵاته‌یل ده‌ستوورى".

له‌باوه‌ت ئه‌و داواكاریه‌یله‌ ئه‌را دوباره‌وه‌كردن هه‌ڵوژارنه‌یل، ئه‌سه‌دى وت:"دوباره‌وكردن هه‌ڵوژاردنه‌یل له‌ لایه‌ن واقعیه‌وه‌ ڕى نه‌یرى و سوودیش نه‌یرى لاى كه‌م له‌ى وه‌خت حازریه‌؛ چوینكه‌ ئاكامه‌یلى فره‌ جیاواز ده‌رنیه‌چوود وه‌ل ئه‌وه‌گ له‌ هه‌ڵوژاردنه‌یل وه‌رین ده‌ركه‌فتن، و زوورانه‌یل زیاتریگ له‌لى كه‌فیده‌وه‌ له‌ ناوبه‌ین فراكسیۆنه‌یل سیاسى، جوور ئه‌وه‌گ له‌ دامه‌زرانن حكوومه‌ت وه‌چه‌و خوه‌مان دیمنه‌ى". و له‌دریژه‌ى قسه‌یلیشى وت:"بڕیگ لایه‌ن توان وڵاته‌گه‌ بخه‌نه‌ گیژاوه‌ى نوویگ وه‌خاتر دروسكردن نیگه‌رانى و عاجزبوین مه‌ردم ئه‌ویش وه‌ریگه‌ى داواكردن دوباره‌وكردن هه‌ڵوژاردنه‌یل".

له‌لاى خوه‌یه‌و حامد موتڵه‌گ نوێنه‌ر لیست عیراقیه‌ له‌ په‌یوه‌ندییگى وه‌ل شه‌فه‌ق وت:"هویچ به‌شه‌وكردنیگ راسكانى ده‌سڵات له‌بان زه‌وى واقع وجوود نه‌یرى، و هه‌رسێ سه‌رۆكایه‌تیه‌گه‌ نوێنه‌رایه‌تى به‌شه‌وكردن ده‌سڵات نیه‌كه‌ن وه‌و جووره‌وگ به‌عزى كه‌س باوه‌ڕ كه‌ن". و ئه‌وه‌یشه‌ ڕووشنه‌وكرد ك:"ڕیزبه‌ندى یا ته‌سه‌لسول فه‌رمانبه‌رى له‌ بریكاره‌یل وه‌زاره‌ته‌یل و سه‌فیره‌یل و به‌ڕێوه‌به‌ره‌یل گشتى ئه‌وه‌ دوینیمن ك زوورمیان وه‌ ڕێژه‌ى 90% له‌ یه‌ك حزبن".

زیاتریش وت:"هاوسه‌نگى له‌ ناوبه‌ین فراكسیۆنه‌یل سیاسى كارا نه‌كریاس له‌ چوارچیوه‌ى ده‌سپیشخه‌ریه‌گه‌ى سه‌رۆك بارزانى ك دامه‌زرانن حكوومه‌ت له‌لى كه‌فته‌وه‌". و جه‌خت له‌بان ئه‌وه‌یشه‌كرد ك:"ریككه‌فتننامه‌یل سیاسى ئه‌گه‌ر كاراوه‌ نه‌كریه‌ن بارووه‌زع وڵات شیویه‌ید".

موتڵه‌گ ئه‌وه‌یشه‌ وه‌دویر زانست ك :"هه‌ڵوژاردنه‌یل دوباره‌وه‌ بكریه‌ن چوینكه‌ فراكسیۆنه‌یل سیاسى به‌شدار له‌ حكوومه‌ت هویچكامیان تا ئیسه‌ خوه‌یان نه‌كیشانه‌سه‌و". و زیاتریش وت:"ئه‌گه‌ر بارووه‌زع سیاسى له‌ عیراق خه‌راوه‌و بوى له‌ ئاكام جیوه‌جى نه‌كردن ڕیككه‌فتننامه‌یل سیاسى ناوبه‌ین فراكسیۆنه‌یل سیاسى له‌ چوارچیوه‌ى ده‌سپیشخه‌ریه‌گه‌ى هه‌ولێر شایه‌ت چه‌ن فراكسیۆنیگ خوه‌یان بكیشنه‌وه‌ و سه‌رنه‌كه‌فتن حكوومه‌ت بووده‌ كاریگ واقعى و ئنجا هه‌ڵوژاردنه‌یل دوباره‌وه‌ بكریه‌ن".

شایان باسه‌ ك نوێنه‌ر ئئتلاف فراكسیۆنه‌یل كوردستانى مه‌حموود عوسمان زویتر پیشبینى یا توقع ئه‌وه‌ كرد ك ئى حكوومه‌ته‌ ك وه‌سه‌رۆكایه‌تى نورى مالكیه‌ بڕمیه‌ید له‌وه‌ر ئه‌و ناكووكیه‌یله‌ ك كه‌فتیه‌سه‌ ناوبه‌ین فراكسیۆنه‌یل سیاسى، و دامه‌زرانن حكوومه‌تیگ زوورینه‌ى سیاسى و هه‌قدارى یا ئستحقاق هه‌ڵوژاردن و ئۆپۆزیسیۆن په‌رله‌مانى له‌ى وه‌خته‌ وه‌ چاره‌سه‌ریگ نموونه‌یى داقه‌ڵه‌م.

 

یاسر عماد