نه‌ورووز ... ئه‌فسانه‌ى زوحاك و كاوه‌ى ئاسنگه‌ر

شفق نيوز

ڕووژگاریگ تیه‌ڵ و ناخوه‌شى ژیان ژیرده‌سه‌یى و چه‌وسیان له‌چنگ داگیركه‌ره‌یل كوردستان وه‌هه‌ر شیوه‌یگ بویگ  وه‌ دزى و ئاشكرا عه‌ید نه‌ورووز هه‌ر پیرووزتر و پڕ له‌شادى و سه‌یران و خوه‌شتر كردنه‌.

ملله‌ت كورد وه‌ گڕ نه‌ورووز دوشمن په‌زنه‌وه‌، ئاگر له‌ جه‌سته‌ى داگیركه‌ره‌یل كوردستان وه‌ردانه‌و عه‌ید نه‌ورووز له‌ كورد و كوردستان پیرووز كردنه‌. ها له‌هویرمان ك دوشمنه‌یل كورد ئى عه‌یده‌ له‌ ملله‌ت كوردستان قه‌یه‌غه‌ كردیان ك وه‌گشت شیوه‌یگه‌وه‌ سازكردن ئى عه‌ید نه‌ته‌وایه‌تیه‌ له‌ملله‌ت كورد قه‌یه‌غه‌ كردیان له‌لایه‌ن بڕیگ ملهوڕه‌وه‌ ك خوه‌یان وه‌ خوداناس و دینپه‌رس بى كه‌م وكوڕى زانستیان و فه‌تواى قه‌یه‌غه‌كردنى دریاو نائسانیانه‌ وه‌ناو دینه‌وه‌ ئاشكرا وتیان: عه‌ید نه‌ورووز حه‌رامه‌و ئاگرپه‌رسیه‌و نیه‌وگ ئه‌وه‌ك موسڵمان بووگ عه‌ید نه‌ورووز پیرووز بكا.

ئه‌وان هه‌میشه‌ ئى هویر كویه‌ن و دوشمنكارانه‌ دویر له‌هس دین پیرووز هاوردیانه‌ كار وه‌رانوه‌ر وه‌ملله‌ت كورد و هه‌میشه‌ ڕیگر بوین له‌ سازكردن عه‌ید نه‌ورووز كورده‌وارى و هاتن وه‌هار ڕه‌نگین ك ڕووژ نه‌ورووزه‌ كردوینه‌ى عه‌ید دارو دره‌خت، وه‌ل ئه‌وه‌یشا هویچ وه‌ختیگ ناو نه‌ورووز كورد نه‌وردیان و سروشت ژیان له‌ كورد و كوردستان وه‌ نامه‌ردانه‌ قه‌یه‌غه‌ كردیان، وه‌ى كاره‌یل ناپوختیشه‌ ئه‌و هه‌مگه‌ سته‌م و تاوانه‌یله‌ وه‌رانوه‌ر وه‌هس پاك نه‌ته‌وه‌ى كورد و عه‌ید پیرووز نه‌ته‌وایه‌تى كورد وه‌ گوناه زانستیان. ئمڕوو تا ئه‌و شوونه‌ چه‌و بڕ ئه‌كا كوردستان پڕ بویه‌ له‌ خوه‌شى و ملله‌ت كورد له‌ ژیانیگ ئازادانه‌و سه‌ربه‌رزانه‌ ژیه‌ن له‌سایه‌ى خه‌بات شووڕكاره‌یل و شه‌هیده‌یل نه‌مر كوردستان، ك ئه‌وه‌سه‌ له‌ باشوور كوردستان ئازادانه‌ تویه‌نیم بویشیم كورد سه‌روه‌خوه‌یه‌ نه‌ك وه‌ ماناى وجوود ده‌وڵه‌تیگ خاوه‌ن قه‌واره‌، وه‌لى ئه‌وه‌سه‌ ئازادیه‌یل و پیشكه‌فتن و هه‌وڵ و خه‌بات وه‌ره‌و وه‌خته‌یل سه‌روه‌خوه‌یى هه‌میشه‌یى ها له‌وجوود و له‌یوا دوینیم ك له‌شوون 2710ى ساڵ كوردى ملله‌ت كورد چوین و وه‌چ گه‌وراییگه‌وه‌ دى وه‌هار خوه‌ى پیرووز ئه‌كاو عه‌ید نه‌ته‌وه‌یى نه‌ورووز كورد ئه‌نجام ده‌یگ ، ك ئه‌ویش مایه‌ى شانازى و به‌خته‌وه‌ریه‌ دوینیم ئمڕوو ئازادانه‌ ئى عه‌یده‌ بریه‌یگه‌ ڕییه‌وه‌ له‌وه‌هاران له‌گشت كوردستان وه‌شیوه‌یگ ڕه‌سمى و جوان و ڕه‌نگین.

له‌ى نه‌ورووزه‌ له‌گشت شوونه‌یل كوردستان، كورده‌یل وه‌ شادى و خوه‌شى چنه‌ سه‌یران و گه‌وراو بویچگ و ژن و پیاو به‌شدارى له‌خوه‌شى و هه‌ڵپه‌ڕه‌گه‌ كه‌ن و سه‌رانسه‌ر كوردستانیش تا بویشید ڕه‌نگین و جوانتر كه‌ن، ك وه‌ڕاسى نه‌ورززو عه‌ید نه‌ته‌وایه‌تى كورد ئه‌و تیه‌رزیگ  ك هاتن سه‌رساڵ كوردیه‌و ملله‌ت كورد وه‌و شیوه‌ عه‌ید ئه‌ڕاى ساز بكاو ئه‌و هه‌مگه‌ سه‌یران و شادى و خوه‌شیه‌یله‌ ك له‌ سیمایه‌یل كوردستانه‌وه‌ دوینریه‌یگ  كورد خوه‌ى وه‌پیه‌وه‌ خه‌ریك بكاو ئه‌و چه‌ن ڕووژه‌ ك عه‌ید نه‌ورووزه‌ گشت تاكیگ كورد له‌هه‌ر ناوچه‌و شارو ئاوایى و شوونیگه‌وه‌ وه‌دڵ پڕ له‌ خوه‌شه‌ویسى عه‌ید كوردستانه‌وه‌ هه‌ناس خوه‌شى هه‌ڵكیشن و گشت چین و لایه‌نه‌یل كورد ئاهه‌نگ خوه‌شى بكه‌ن و موباره‌كبایى له‌ خوه‌ى و ملله‌ت كوردستان و جه‌هان بكا و هه‌زاران سڵام بڕه‌سنیگ ئه‌را گیان پاك شه‌هیده‌یل و خه‌باتكه‌ره‌یل كوردستان و سه‌ر ڕیز و نه‌وازش بچه‌منیگ ئه‌ڕایان، وه‌تایبه‌ت سڵام ئه‌را گشت پێشمه‌رگه‌ى كوردستان و پرووزبایى له‌لیان بكه‌ن ك له‌سایه‌ى پاكى و ئازایه‌تى ئه‌وان ئه‌و هه‌مگه‌ ئارامى و ئاسایشه‌ له‌ كوردستان به‌رقه‌راره‌و دڵ نه‌یار و داگیركه‌ره‌یل كوردستان پڕ ترس كردنه‌و خه‌ریكن له‌داخا ته‌قن.

نه‌ورووز ، ماناى رووژیگ تازه‌ ده‌یگ ، ك وه‌ڕاسى ڕووژیگ تازه‌س، ك سه‌ردى زمسان چووگ و شه‌خته‌و وه‌فر كه‌مه‌ كه‌مه‌ تاویه‌نه‌وه‌و سه‌ردى زمسان نیه‌مینیگ و هه‌واى هوونك و خوه‌شى وه‌هاران تیه‌یگه‌وه‌و گوڵه‌یل جووراو جوور وه‌ك وه‌نه‌وشه‌و نه‌رگس و شه‌هلاو شلێر و به‌یبوون له‌ كوێستانه‌یل سه‌ر ده‌ركه‌ن و تا چه‌و بڕ ئه‌كا ده‌یشت ده‌ر و كویه‌یل ڕه‌نگین و شوونه‌یل كوردستان گرنه‌وه‌ر ك وه‌ سه‌وزایى ره‌نگین وه‌هاران و سروشت ژیان تازه‌وه‌ خوه‌یان ڕازننه‌وه‌و جایه‌ڵ جوانه‌یل دڵداریش له‌ كوڕ و دویه‌ت روى كه‌نه‌ ده‌یشت و كویه‌و گشت كوساره‌یل كوردستان ، له‌ قه‌ندیل و هه‌ڵگورد و گرده‌مه‌ندیل و پیره‌مه‌گروون و مه‌تین و به‌مۆ و ئه‌زمه‌ڕ و كڵات و گشت كویه‌یل به‌رز كوردستان به‌زم شادى و خوه‌شى وه‌هاران ساز كه‌ن و دڵ داگیركه‌ره‌یل كوردستان وه‌پى داڕزنن و ئویشن بژیه‌ى پێشمه‌رگه‌ى كورد و بژیه‌ى كوردستان.

بوى و نه‌وى ، ساڵه‌یل زوى كه‌س له‌ خودا گه‌وراتر و كه‌سیش له‌ زوحاك زاڵمتر نه‌وى، ئنجا باس كه‌ن و ئویشن: له‌و وڵاته‌ ك له‌تاریخ كوین وه‌پى وتریا وڵات فارس، پادشایگ بوى ناوى زوحاك بوى، وه‌لى تا بویشید زاڵم و بى به‌زه‌یى بوى. ئنجا وه‌ ئه‌ره‌ق ناوچه‌وه‌یل و زوور بازوو مه‌ردمه‌ بیده‌سڵاته‌گه‌ى  له‌بان یه‌كیگ له‌ كویه‌یل به‌رز ماڵیگ دروس كردویگ . زوحاك ڕووژیگ له‌ناكاو تویش نه‌خوه‌شییگ قورس و بى ده‌رمان تیه‌یگ ، گشت حه‌كیمه‌یل وڵات ده‌سه‌ ده‌سه‌ چنه‌لاى ئه‌را وه‌دیكردن چاره‌سه‌ریگ ئه‌را نه‌خوه‌شیه‌گه‌ى، وه‌لى كه‌س په‌ى وه‌ده‌رمان ده‌ردى نه‌ورد، ئنجا پیره‌ژنیگ جادووباز له‌نزیك ماڵ زوحاك ژیه‌یگ ، ڕووژیگ ده‌رمانى گریگه‌وه‌و چووگ ئه‌را لاى پاشا، وه‌جووریگ خوه‌ى له‌یوا پووشیگ تا پاشا نه‌ناسیگه‌ى و خوه‌ى له‌لى ئه‌كاده‌ حه‌كیم و ده‌رمانه‌گه‌ ده‌یگه‌ پاشاو ئامووژگارى یا نه‌سیحه‌ت پاشا ئه‌كا ك چوین ده‌رمانه‌گه‌ باریگه‌ كار، زوحاك دویاى چه‌ن رووژیگ له‌وه‌كارهاوردن ده‌رمان ژن جادووباز هس وه‌ خاسه‌وبوین ته‌ندروسى یا سه‌حه‌ت خوه‌ى ئه‌كا، وه‌لى وه‌ل خاسه‌وبوین وه‌زع ته‌ندروسى پاشایا، دو مار هه‌ر یه‌كیگیان له‌بان یه‌ك شان پاشا كه‌مه‌ كه‌مه‌ جویلیه‌ن و گه‌ورا بوون، ئه‌و ماره‌یله‌ وه‌ختى ورسگیان بووگ له‌ناو كوناى لویت زوحاكه‌وه‌ وه‌ مه‌ژگ پادشا ورسگى خوه‌یان شكنن. حه‌كیمه‌یل جاریگ تر لاى پاشا گرده‌و بوون و بڕیار ده‌ن ئه‌را ئه‌وه‌ك ئه‌و ماره‌یله‌ واز له‌ خواردن مه‌ژگ پاشا بارن، بایه‌سه‌ گشت رووژیگ سه‌ر هه‌رزه‌كاریگ  بوڕیه‌یگ و مه‌ژگى بدریه‌یگه‌ خوه‌رد ماره‌یل.

له‌وه‌خت فه‌رمانڕه‌وایى زوحاك، ئاسنگه‌ریگ كورد له‌ورا ناوى كاوه‌ بووگ، كاوه‌ى ئاسنگه‌ر خاوه‌ن 7 كوڕ بووگ. ئنجا زویتر وه‌ نووره‌ مه‌ژگ 6 له‌ كوڕه‌یلى دریاویگه‌ خوه‌رد ماره‌یل بان شان زوحاك. ئنجا ئه‌و رووژه‌ ك نووره‌ى بڕین سه‌ر كوڕ هه‌فتم كاوه‌ى ئاسنگه‌ر تیه‌یگ ، كاوه‌ بڕیار ده‌یگ ئه‌را نواگرتن له‌ فه‌وتیان دویا جگه‌رگووشه‌ى و ڕوى وه‌ڕوى بوینه‌وه‌ى زوڵم زوحاك یاخى بووگ، ئه‌را ئه‌وه‌یش جنگ ئاسنگه‌رى پووشیگ و چه‌كوشه‌گه‌ى گریگه‌ ده‌سیه‌وه‌و دژ پاشاى وڵات دروشم یا شعار ئویشیگ  ك وه‌ بان جاده‌یا خه‌ریك ڕیكردنه‌، مه‌ردم دڵ پڕ له‌قین شاریش كه‌فنه‌ شوونى و گشتیان ڕوى كه‌نه‌ ماڵ پاشا له‌بان نك كویه‌گه‌و گشت ته‌خت و به‌خت پاشا شیونن و ئاگر وه‌رده‌ن له‌ ماڵه‌گه‌ى، ئمجا ئه‌و وه‌خته‌ ك ئاگر وه‌رده‌ن له‌ماڵه‌گه‌ى ده‌مه‌و خوه‌رنشینه‌، هه‌ر له‌وه‌ر ئه‌وه‌یش مه‌ردم داروده‌سه‌ى پاشاى دڵ پڕ له‌قین گڕ ئاگره‌گه‌ دوینن.

دى وه‌و بوونه‌وه‌ له‌و رووژه‌وه‌ تا ئیسه‌ ساڵ وه‌ساڵ وه‌یاد شكه‌ست نیشانه‌ى زوڵم و سته‌م، له‌بان نك كویه‌یل و شوونه‌یل به‌رز ئاگر نه‌ورووز كریه‌یگه‌وه‌. ئنجا ئى عه‌یده‌ سێ په‌ند پڕ قیمه‌ت هاورده‌سه‌ به‌رهه‌م:

1- گڕ ئاگر سزیان ماڵ زوحاك نیشانه‌س ئه‌را قورتاربوین و ئازادبوین له‌ زوڵم و سته‌م زوورداره‌یل.

2- زوڵم و سته‌م زوورداره‌یل هه‌رچه‌نى فره‌و دریژوه‌ختبه‌ر بوون، ئاخرى هه‌ر ره‌سنه‌ كووتایى، ئنجا كورد په‌ندیگ دیریگ ك ئویشیگ(گشت چشتیگ له‌ باریكى بڕیه‌ن ته‌نیا زوڵم و سته‌م نه‌وگ له‌ قایمى بڕیه‌ن).

3- ئه‌گه‌ر بایگ  و گشت زوڵملیكریاگه‌یل له‌ناو خوه‌یان یه‌كه‌و بگرن وه‌دڵ وگیان، ئه‌وه‌ كوشك یا ماڵ زوورداره‌یل چه‌نیگ سه‌خت و به‌رز بووگ، هه‌ر گیریه‌یگ و ته‌خت و به‌ختى ریشكیش كه‌ن. وه‌ل ئه‌وه‌یشا زاڵمه‌یلیش تیه‌ن و چن، ئه‌وانه‌ك میننه‌وه‌و نیه‌مرن نه‌ته‌وه‌ نیشتمانه‌گه‌مانن.