رژیم سوورى بویه‌ به‌شیگ له‌ گوزه‌یشته‌

شفق نيوز

و خاس زانن ك خوازن وه‌هه‌ر جووریگ بوود ئه‌و مه‌ویسیه‌ بشارنه‌و و ئاشكراى نه‌كه‌ن و شیواز روخساره‌ راسكانیه‌گه‌ى ده‌رنه‌خه‌ن ك گشت كه‌سیگ وه‌پى زانێد.

 

 

ئه‌وان خوازن ئیمه‌ بخه‌نیم و سه‌ما بكه‌یم و گورانى بویشیم ئه‌را ئه‌و خوینڕشیان و گیرستن و ته‌رم مناڵه‌یل بیناز كه‌فتگه‌ له‌جاده‌و خوازن گووشمان بوه‌سیم و زووانمان نه‌جویلنیم و ده‌ممان وه‌ مووم قرمز داخه‌یم و چه‌وه‌یلمان بنویقنیم له‌وه‌ختیگ ئه‌و خوینڕشیانه‌ پیچیاسه‌ هسه‌یلمان.

 

لایه‌نگره‌یل زووان چه‌ك و تون وتیژى و كوشتن له‌بان ناسنامه‌و سزاداین و جه‌رده‌و دزه‌یل و له‌ناوبردن جوانى و بزه‌ى خه‌نستن مناڵه‌یل، هه‌میشه‌ له‌پشت په‌رده‌ى به‌رژه‌وه‌ندى و گفت هیزدارى خوه‌یان شارنه‌و نه‌ك هیز گفتدارى و گفتوگوو.

 

كیشه‌ى ئیمه‌یش باوه‌ڕ ئه‌وان نییه‌، به‌ڵكوو ئه‌وان مكوڕن له‌بان كلكردن باوه‌ڕ ئه‌ڕامان و له‌وه‌ختیگیش باوه‌ڕ نه‌یریم وه‌پیان تاوانبارمان كه‌ن، ك یه‌یش چشت ئه‌ڵڵاجه‌وییگه‌.

 

رژیم سوورى ته‌بڵ نه‌فامى كوتێدو سه‌رده‌م و رووژگار سته‌مكارى دى وه‌ختى نه‌مه‌ندو ده‌زگایه‌یل له‌ناوبردن دویرن له‌ شیواز ژیان ئى سه‌رده‌م تازه‌و ریككه‌فتنه‌یل ئیسه‌ى هه‌قه‌یل ئاده‌میزاد.

 

وه‌ل ئه‌وه‌یشا دوینید كه‌ناڵه‌یلیگ فه‌رمى شه‌و و رووژ باس له‌وه‌ كه‌ن و ئویشن سوریا له‌وه‌هار عه‌ره‌بى نییه‌و به‌شار ئه‌سه‌د جوور قه‌زافى و موباره‌ك و زه‌ینولعابدین بن عه‌لى نییه‌، یه‌یش دعایه‌كردنیگه‌ ئه‌را پاڵه‌وانیه‌تى ناوجوودیگ و ته‌نانه‌ت له‌ فیلم كارتۆنییش ئى جووره‌ چشتیگ نییه‌ ئه‌را مناڵه‌یلیش، چوینكه‌ مناڵ وه‌ زیره‌كى خوه‌ى گشت چشتیگ زانیدو له‌یه‌كه‌و ئه‌یاد.

 

كیشه‌ى رژیم سوورى ئه‌وه‌سه‌ ك له‌خوه‌یا گشت چشتیگ ئه‌ڕِاى جیوه‌جى بوود، وه‌لى له‌بان شاشه‌ نه‌ك له‌راسى، ئمجا خه‌نستن و گیرستن ها له‌وره‌ لایه‌نگره‌یلى باوه‌ڕ وه‌ سه‌ركه‌فتنه‌یلى كه‌ن وه‌ گووره‌ى ره‌سانن یا ئعلامه‌یلى و له‌هه‌مان وه‌خت باوه‌ڕ وه‌ ئه‌وه‌یش دیرن ك جاده‌و كارخانه‌و ده‌زگاو ماڵ و كویچه‌و مه‌یدان و ئاوایه‌یل سوورى هه‌ر وه‌بى جموجویل مینن له‌بان ده‌س ئه‌و رژیمه‌ ك چیه‌سه‌ قوناغ مه‌رگ و هه‌وه‌جه‌ وه‌ گولله‌ى ره‌حمه‌ت ناكا.

 

ئیمه‌ هویچ وه‌ختیگ باوه‌ڕ وه‌ داستان رژیم نه‌یریم و خوه‌مان له‌تومه‌تباركردن قورتار كه‌یم له‌وه‌رانوه‌ر نه‌وه‌یل ئاینده‌، وه‌لى ئه‌وانه‌ك باوه‌ڕ وه‌پى كه‌ن ئه‌وه‌ بیگومان تاریخ ده‌رهه‌قیان ره‌حم ناكا.

 

فه‌وزى ئه‌تروشى

 

ج. ا