میدیاى كوردى له‌ كۆنگره‌ى نه‌ته‌وه‌یى

شفق نيوز

 

كارنامه‌ى كومسیۆنه‌یل و ئه‌و ئه‌كامه‌یله‌ ك وه‌پى ره‌سن، گام گورج و پوختكردنیگ ئه‌و رییه‌سه‌ ئه‌را كۆنگره‌ى نه‌ته‌وه‌یى، چوینكه‌ هه‌ر له‌ئیسه‌و له‌هه‌ر بواریگ ك كۆنگره‌ بڕیاره‌ گرنگى وه‌پى بیه‌یدو هه‌ڵویست له‌بانى داشتوود، نه‌خشه‌ڕى یا پرووژه‌یگ سه‌ره‌تایگ ئه‌ڕاى ئاماده‌س.

كومسیۆن ره‌سانن یه‌كیگ بوى له‌و كومسیۆنه‌یل خاس و پوخته‌ ك له‌ناونى (7) دانیشتن له‌ماوه‌ى (8) رووژ (20) راپۆرت ره‌ساننكار و ئه‌كادیمیه‌یل كورد تاوتویكرد، یه‌یش بیجگه‌ پیشنیار و پرووژه‌ى ئه‌ندامه‌یل كومسیۆن ك نوێنه‌ر گشت به‌شه‌یل كوردستان له‌تى بوى و دویاخریش راپۆرت كووتایى خوه‌ى دا لیژنه‌ى ئاماده‌كارى كۆنگره‌ى نه‌ته‌وه‌یى.

هه‌رچه‌نى ماوه‌ى(8)رووژ ئه‌را دیاریكردن ئاینده‌ى كار ره‌سانن له‌بان ئاست نه‌ته‌وه‌و ده‌سنیشانكردن كیشه‌و گرفته‌یل و دیاریكردن چاره‌سه‌ر وه‌ وه‌رگرتن هویر وڕاى نزیكه‌ى(40)كه‌س هیمان كار ته‌واویگ نیه‌، وه‌لى وه‌ل ئه‌وه‌یشا تویه‌نیم بویشیم كومسیۆن ره‌سانن كار خاسیگ كردو تویه‌نست خه‌ته‌یل گشتى ئاینده‌ى كار ره‌سانن نه‌ته‌وه‌یى دیارى بكا. ئنجا له‌ ئایه‌نده‌یش وه‌ گووره‌ى دقه‌تكردن ناوه‌ڕووك كۆنگره‌ى نه‌ته‌وه‌یى و كاركردن له‌بان وه‌سیه‌ته‌یل و دروسكردن ئه‌و یه‌كگفتاریه‌ ك خوازیاره‌و كۆنگره‌ له‌وه‌ر خاترى ساز كریه‌ید، ره‌سانن و میدیاكاره‌یل كورد ئه‌رك قورسیگ كه‌فیده‌ بان شانیان و ئه‌وان بایه‌سه‌ په‌یام كۆنگره‌ بڕه‌سننه‌ كورد له‌ كوردستان و بڕه‌سننه‌ى ئه‌و مه‌ردم نه‌ته‌وه‌یل جیاواز كورده‌ ك وه‌لیانا ژیه‌ن و هه‌ر نه‌ته‌وه‌یگ و وه‌زووان خوه‌ى.

هه‌ر له‌وه‌ر ئه‌وه‌یش وه‌ گرینگ زانیمنه‌ى ك پیشنیار ئه‌را لیژنه‌ى ئاماده‌كار بكه‌یم، ك بیجگه‌ له‌ ئه‌ندامه‌یل كومسیۆن ره‌سانن ك كارنامه‌گه‌ ئاماده‌ كردنه‌، به‌شیگ له‌ ئه‌كادیمیه‌یل كوردو شاره‌زایه‌یل بوار ره‌سانن و خاوه‌ن تواناى جیاوازیش بووه‌نه‌ ناو كۆنگره‌گه‌ ك جواو ئاست پیشكه‌فتن میدیاو شیواز ئاراسته‌كردن په‌یام و مامڵه‌كردن وه‌ل گرووپ و نه‌ته‌وه‌ى جیاواز داشتوون.

فوئاد ئه‌حمه‌د

ج .أ