يه‌كه‌مجار فه‌يليه‌يل يه‌كبخه‌ن دوياخر به‌شبه‌شيانه‌و بكه‌ن

شفق نيوز

ئه‌ڵلاجه‌وى ها له‌ورا له‌ سه‌ره‌تاى دامه‌زرانن عراق ك نزيكه‌ى سه‌د ساڵه‌، هيمان لوغزيگ هه‌س ك كورده‌يل فه‌يلى گردنه‌ شوون جواوه‌گه‌ى، ئه‌را ئه‌وه‌ك ئه‌وان رووڵه‌يل ئى خاكه‌نه‌، بايه‌سه‌ قه‌واڵه‌يگ پيشكه‌ش بكه‌ن عراقى نيه‌، به‌ڵكوو ئه‌چێده‌و ئه‌را ئمبراتۆريه‌ت عوسمانى.

هه‌ر وه‌و خاتريشه‌ خاستر ئه‌وه‌سه‌ ياساى ره‌گه‌زنامه‌ى ساڵ 2006 لاوريه‌ێد و ياساى 43ى ساڵ 1963 و ياساى شماره‌ (5) له‌ ساڵ 1975 ئاڵشت بكريه‌ن، ئمجا ئيمه‌ خوه‌شاڵ بويمن وه‌ داين ره‌گه‌زنامه‌ وه‌و عراقيه‌يله‌ ك بيبه‌ش بوين له‌ ماف هاووڵاتيبوين، مه‌سه‌له‌گه‌يش ته‌نيا له‌بان كورد فه‌يلى نيه‌، به‌ڵكوو به‌هائيه‌يل و يه‌هوود و مه‌ردمان تريش ئه‌گرێده‌و.

له‌يرا له‌وه‌رگرتن ڕى شوون خواست ئه‌را هاوردنه‌وه‌ى ره‌گه‌زنامه‌ شه‌كه‌تيه‌و مه‌سه‌له‌ى داواكاريه‌يليگ بويه‌ هووكار نواگيرى له‌ كه‌سه‌يليگ كرد ك شايسته‌ن مافه‌يليان خوه‌يان وه‌ربگرن وه‌تايبه‌ت كورده‌يل فه‌يلى، ئى مه‌سه‌له‌يشه‌ جيوه‌جى له‌بان كارت نيشتمانى يه‌كگرتگ ئه‌دێ/ ك ئوميده‌واريم ئى شيرازه‌ى يه‌كگرتگه‌ به‌شبه‌شه‌و نه‌كه‌ێد.

ئمجا له‌ 200 ده‌وڵه‌ت له‌ جه‌هان، 30 ده‌وڵه‌ت له‌ليان ئسناد له‌بان خاك وه‌ ماف هاووڵاتيبوين ئه‌كه‌ن و باقيه‌گه‌ى ئسناد له‌بان ته‌به‌عيه‌ى خوين ئه‌كه‌ن، وه‌لێ ئى پێوه‌ره‌ جيوه‌جى ئه‌دێ له‌بان عراق؟ دوياى سه‌ده‌يليگ له‌ ژيان كورده‌يل فه‌يلى له‌ى وڵاته‌، هيمان تائيسه‌يش بايه‌سه‌ سه‌ردان به‌ش ته‌جنيس تايبه‌ت وه‌ بيگانه‌يل بكه‌ن، يه‌يش وه‌و مانا نه‌ خاك و نه‌يش خوين شه‌فاعه‌ت ئه‌ڕايان نه‌يرێد.

ئيمه‌ى كورده‌يل فه‌يلى ره‌سيمنه‌سه‌ ئاكاميگ ناموعتاد، ك بايه‌سه‌ له‌ژير عاباى لايه‌نه‌يل تر بويمن ئه‌را په‌سپانن ناسنامه‌مان، ئيمه‌ وه‌ سه‌قه‌ت و مه‌زه‌له‌ت له‌ زگ داڵگه‌يلمان په‌يا نه‌ويمنه‌، وه‌لێ جى داخه‌ ئه‌و به‌شبه‌شيه‌ له‌ناونى پيكهاته‌گه‌مان له‌بان بڕياره‌يليگ ئه‌نجام ئه‌گريد ك رۆڵ له‌تى نه‌يريم و چاره‌سه‌ر ئه‌را كيشه‌يلان له‌تى نيه‌، جوور ئه‌وه‌گ يه‌كيگ له‌ زانايه‌يل ده‌روينناسى ئويشێد: شيتى ماناى دوباره‌كردنه‌وه‌ى يه‌ك كاره‌و ئوميديش گام ئه‌را ئاكام جياجيايگ نه‌ێد‌.

وه‌و خاتريشه‌ ئويشم ئه‌را هه‌ركه‌سيگ فكره‌ى كارنه‌كردگ كاڵێد و مه‌رج مافه‌يل هاووڵاتيبوين ئه‌را كورده‌يل فه‌يلى ئسپات ئه‌كا، ته‌ماشاى ئه‌وه‌ بكه‌ن چه‌ ده‌رهه‌ق ئنسانيه‌ت روێدا له‌ ويرانه‌كارى له‌ وه‌خت هه‌يمنه‌ى ئايدۆلۆجيات، ته‌نانه‌ت ئه‌گه‌ر هه‌رێم كوردستانيش سه‌روه‌خوه‌ى بوى، ئه‌وه‌ بيگومان نه‌ته‌وه‌يگ مينێد وه‌ناو كورد له‌ عراق.

عه‌لى حسێن فه‌يلى