له‌ كه‌سایه‌تیه‌یل كورد فه‌یلى

شفق نيوز

  عه‌بدولستار كازم اسماعیل كه‌سایه‌تى كورد فه‌یلى له‌ساڵ 1925 له‌شار كووت له‌ كویچه‌ى سه‌ید حسێن له‌ناوچه‌ى عه‌گدلكورد هاته‌سه‌ دونیاو له‌ هووز سوره‌مێریه‌.

خوه‌ندن سه‌ره‌تایى و ناوه‌ندى له‌ شار كووت ته‌واو كردگه‌و دویاى ئه‌وه‌یش خانه‌ى باڵاى مامۆستایه‌یل له‌ به‌غدا ته‌واو كردگه‌. ساڵ 1943 له‌ قه‌زاى سوێره‌ جوور مامۆستاى سه‌ره‌تاى له‌ خوه‌ندنگاى سه‌وێره‌ دامه‌زریاگه‌و بیجگه‌ ئه‌وه‌یش له‌ پۆسته‌یل په‌روه‌رده‌یى جوراوجووریش له‌ كووت و ناحیه‌یلى دامه‌زریاگه‌.

ساڵ 1985 له‌لایه‌ن لیژنه‌ى وزاره‌ت مه‌عارفه‌و داواى پرووژه‌ى داناین خوه‌ندنه‌وه‌ یا قرائه‌ى مه‌دره‌سى له‌لى كریا ك له‌ پاشایه‌تیه‌و ئاڵشتى بكا ئه‌را كومارى، ئنجا وه‌گووره‌ى فه‌رمانیگ وزارى كریا سه‌په‌رشیار گشتى له‌ وزاره‌ته‌گه‌و جیواز كریا ئه‌را به‌غدا.

ساڵ 1970 بویه‌ سه‌رۆك سه‌رپه‌رشیاره‌یل له‌ هه‌مان وزاره‌ت ناوبریاگ له‌ به‌غداو دویاى ئه‌وه‌یش خانه‌نشین كریا. عه‌بدولستار ده‌سكرده‌ نویسانن له‌ رووژنامه‌ى ته‌ئاخى و گووڤاره‌یل كوردى جوور: هاوكارى، كاروان، خوه‌ر كوردستان. وه‌ل ئه‌وه‌یشا ده‌سكرده‌ هه‌ڵه‌وگه‌ردانن مه‌ته‌ڵه‌یل و ئه‌ده‌ب كوردى.

ساڵ 1976 بویه‌ ئه‌ندام سه‌ندیكاى رووژنامه‌نویسه‌یل، ك وه‌ عه‌بدولستار موعه‌لم ناسریا. دكتۆر به‌درخان سندى و جهاد زایر و دكتۆر شه‌عبان مزیرى ره‌فیقى بوین، خوه‌ندكاره‌یلیشى ئه‌یانه‌ن: دكتۆر خه‌لیل واستى مامۆستا له‌ ئه‌كادیمیه‌ى هونه‌ره‌ جوانه‌گان، شاكر محه‌مه‌د وه‌ڕیه‌وبه‌ر وازیگاى وه‌رزشى واست، ئه‌ندازیار ماجد قوتبى، ماجد عه‌بدولڕه‌زا مامۆستاى زانسته‌یل سیاسى.

عه‌بدولستار له‌ خه‌باتكه‌ره‌یل سه‌ره‌تاى جموجویل كوردایه‌تى بویه‌ له‌ پارت دیموكرات كوردستان و وه‌پرس خه‌باتكه‌ره‌یل فره‌یگ بویه‌ له‌ دێرینه‌یل كورد ك ئیسه‌ بڕِیگ له‌لیان زینگن و بڕیگیش له‌لیان چیه‌سه‌ ره‌حمه‌ت خودا جوور ره‌حمه‌تی حه‌بیب محه‌مه‌د كه‌ریم و رووژنامه‌نویس كورد محه‌مه‌د داراو عه‌باس به‌درى و محه‌مه‌د به‌درى.

عه‌بدولستار خاوه‌ن 10 كوڕ و یه‌ك دویه‌ته‌، ك له‌ رووژ 4-7 - 1994 له‌ شار به‌غدا ماڵئاوایى یه‌كجارى له‌ دونیا كرد.

ئه‌حمه‌د یارى

ج . أ