عراق گوزه‌یشته‌و ئیسه‌و په‌یام ئاینده‌

شفق نيوز

 

 

ئه‌و تاریخ سیاسیه‌ ك له‌ عراق هاته‌سه‌ به‌رهه‌م تویه‌نیم بویشیم بیجگه‌ له‌ وازییگ دوباره‌كریاگ له‌ سه‌ره‌تاى شارستانیه‌ت وڵات دوچه‌مان تا ئیسه‌ى جه‌نگ دو نه‌ته‌وه‌ى كورد و عه‌ره‌ب  یا كیشمه‌كیشه‌ مه‌زه‌ویه‌گه‌ى ناونى دو پیكهاته‌ ره‌گه‌ز عه‌ره‌به‌گه‌ى" شیعه‌و سونى" چشتیگ تر نیه‌ كه‌ش وبار  ئارام و ژیان هاوبه‌شیگ بووه‌خشیده‌ پیمان.

 

ئه‌را ئیسه‌ى عراقیش وه‌پیمان له‌یواسه‌ هه‌مان دریژه‌وكریاگ وازیه‌گه‌ى سه‌ره‌تاى ئه‌و قوناغه‌یل پاشایه‌تى تا ئیسه‌ى عراقه‌سه‌ ك هویچ ئاڵشتكارییگ جوور ئازادى هویر وڕا یا ده‌سوه‌ده‌سكردن ده‌سڵات و یه‌كتر قه‌بولكردن له‌تى ناته‌سه‌ وجوود.

 

ئه‌وه‌ك ئیسه‌ كه‌فیده‌ وه‌رچه‌و، په‌یامیگ تازه‌ نیه‌ له‌لاى تاك عراقى، به‌ڵكوو وه‌چه‌واشه‌وه‌ ئه‌و كیشمه‌كیش مه‌زه‌وى و نه‌ته‌وه‌یى ئیسه‌ له‌عراق ژیان عراقیه‌یل تیه‌ڵ كردگه‌و ئه‌و ره‌فتاره‌یله‌ ك له‌ ساى سیاسه‌ت ئیسه‌ دوینریه‌ید هویچ دڵخوه‌شییگ وه‌پیه‌و دیار نیه‌.

 

ئه‌وه‌ك له‌عراق ئیسه‌ دوینریه‌ید ته‌نیا عراق جوور جوگرافیایگ له‌ ده‌یشت سیاسه‌ت وه‌ یه‌كپارچه‌یى و یه‌كگرتگى مه‌نده‌سه‌و، ك هه‌رچه‌نى له‌لاى فره‌یگ له‌ عه‌ره‌به‌یل شۆفێنى ئدعاى جیابوینه‌وه‌ى كوردستان كه‌ن و باوه‌ڕیان ئه‌وه‌سه‌ كاره‌یل حكوومه‌ت هه‌رێم نیشانه‌ى سه‌روه‌خوه‌یى هه‌رێم كوردستان و هساو نه‌كردنه‌ ئه‌را ده‌سڵات ناوه‌ندى، وه‌نا ئه‌گه‌ر له‌بار سیاسى ته‌ماشاى ره‌سم عراق بكه‌یم ئه‌وه‌ بیگومان عراق ئیسه‌ له‌ جیاى یه‌ك نه‌ته‌وه‌ دو نه‌ته‌وه‌ خاوه‌نیه‌" كورد و عه‌ره‌ب"، وه‌ل ئه‌وه‌یشا له‌جیاى په‌ك پیكهاته‌ى سه‌ره‌كى نازانیم شیعه‌ یا سونى ده‌مچه‌رمگ وڵاته‌.

 

ئه‌گه‌ر كه‌میگیش ته‌ماشاى تاریخ گوزه‌یشت عراق بكه‌یم، بیگومان ئیسه‌ هاوشیوه‌گه‌ى دوینیم یا ئه‌وه‌ كه‌فیده‌ ده‌سمان ك ئى كیشمه‌كیشه‌یله‌ وه‌ ته‌واوى هه‌ر ئه‌و كیشمه‌كیش و خوینڕشانن و رویداگه‌یله‌سه‌ ك تاریخ عراق زویتر له‌ خوه‌ى تومارى كردگه‌.

 

عراقیگ له‌ تاریخ شارستانیه‌ته‌یله‌و ئه‌را ئیسه‌و له‌ ره‌وڕه‌وه‌ى جه‌هان ئمڕوویش تا تیه‌ید پانایى دیموكراسى له‌تى وه‌رته‌نگه‌و بوودو تا تیه‌ید ناكووكى ناونى ملله‌ته‌یل و نه‌ته‌وه‌و پیكهاته‌یلى شیواز تازه‌ گریده‌ خوه‌ى و له‌یوایش دیاره‌ له‌ ئاینده‌یش هویچى جیاواز نه‌ود له‌ ئیسه‌.

 

ئازاد ئبراهیم

ج . أ