له‌ ناو ئی ڕووژه‌یله

شفق نيوز

مه‌ی ك بی په‌نای بێ په‌نا و ته‌سکین ده‌رده‌!

ئه‌را من سه‌وقاتێ فه‌قه‌ت گریانه‌ و نیه‌زانم ئه‌را؟

ئی شه‌وه‌یله‌ وه‌ شوون مانگه‌شه‌و، شه‌واره‌مه‌

ترویسکه‌ی هه‌ساره‌یش وه‌لیم پنهانه‌ و نیه‌زانم ئه‌را؟

هه‌ر له‌ ژیر واران بی من گومت کردم

دڵم که‌فیده‌ ژماره‌ هه‌روه‌خت وارانه‌ و نیه‌زانم ئه‌را؟

نه‌ وه‌ وه‌هار دڵخوه‌ش بووم و نه‌ زمسان ده‌ی ئازارم

کول دڵخوه‌شیه‌گانم سه‌رد و بێ گیانه‌ و نیه‌زانم ئه‌را؟

هه‌رچی شه‌وه‌ وه‌ کنار یه‌ی قاپ خالی

هویرت وه‌ بسکه‌‌ێگه‌و وه‌لام مێوانه‌ و نیه‌زانم ئه‌را؟

په‌ل پوو تاقه‌تم ڕزیاگه‌ و نه‌یرم باڵ فڕین

مه‌ل دڵ له‌ سارای یادت وه‌یلانه‌ و نیه‌زانم ئه‌را؟

ڕووژه‌گان جوور ئه‌وسا هه‌ر تیه‌ن و چن

وه‌لی هاڵ دڵم نه‌ چوی جارانه‌ و نیه‌زانم ئه‌را؟