ئامانج گفتوگوو چه‌س؟

شفق نيوز

ئه‌گه‌ر وتیم گفتوگوو نیشانه‌یگ شارستانیه‌ت ها پشتى و به‌ڵگه‌س له‌بان مه‌سه‌له‌ى فكرمه‌نى ئاده‌میزاد له‌وه‌رانوه‌ر كلتوور وه‌ختى و هه‌میشه‌یى، ئه‌وه‌ وه‌رگرتن و به‌خشین دو ئامانج هه‌ر گفتوگوویگ ناونى ئنسانى و شارستانیه‌تن.

 

مانى به‌خشین له‌ى وه‌كارهاوردنه‌، به‌خشانن چشت زیاتریگه‌و بى كه‌ڵك و له‌كاركه‌فتگ نییه‌ له‌ ئیمه‌وه‌ ئه‌را كه‌سه‌یل تر، به‌ڵكوو به‌خشین نرخدارترین چشته‌ ك ئه‌را ئیمه‌ قانجاز وژدانى و به‌خته‌وه‌رى و مه‌عنه‌وى ره‌سنید و ئه‌خلاق ئنسانیمان ده‌سه‌وه‌ر ئه‌كا.

 

ئمجا له‌یره‌ گه‌شه‌ى ره‌گه‌زیانه‌" فیلۆگینى" ئاده‌میزاد وه‌پیمان ئویشید: ئى دروسكریاگ یا مه‌خلووقه‌ سه‌ره‌تا وه‌رگر بویه‌و دویاخر ده‌سكردگه‌سه‌ به‌خشین. ئاده‌میزاد له‌ سه‌ره‌تا جوور ده‌سه‌ڵاتیگ به‌خشنده‌ ته‌ماشاى سروشت و هێز میتافیزیكیه‌یلى ئه‌كاو خوه‌یشى له‌ وه‌رانوه‌ریان جوور بیده‌سڵاتیگ دوینید.

 

ئى ره‌سینه‌وه‌یشه‌ له‌ پایه‌ى ئاده‌میزاد جوور دروسكریاگیگ كزه‌ ك ته‌نیا تواناى وه‌رگرتن دیرید و ئه‌گه‌ر چشتیگ وه‌رگرت شوكرانه‌ى بكاو ئه‌گه‌ریش بى ده‌سكه‌فت بوى باوه‌ڕ داشتوود قه‌ناعه‌ت وه‌پى بكا.

 

زوورم دینه‌یل و سیستمه‌یل سیاسى و دادوه‌ریه‌یل نایاسایى، ئاده‌میزاد له‌بان ئه‌و هویره‌ هووكاره‌ كردنه‌و له‌و ئاكامیشه‌ زه‌مینه‌ى سته‌مكارى كوومه‌ڵایه‌تى ده‌سه‌وه‌ر كردنه‌، وه‌لى له‌ شارستانیه‌تیگ ك هس وه‌ گرنگى كلتوور گفتوگوو كریاوید، پایه‌ى ئاده‌میزاد له‌(وه‌رگر و به‌خشنده‌)ه‌و بووده‌(به‌خشانن و وه‌رگرتن).

 

ئاده‌میزاد بفام مه‌رجیگ نه‌یرید ئه‌را ئه‌وه‌ك بویشیده‌ پیمان: تا وه‌رنه‌گرن، ناوه‌خشم. به‌ڵكوو ئه‌و له‌هه‌مان وه‌خت وه‌بى مه‌رج به‌خشید و وه‌رگرید. له‌گفتوگوو ده‌سپیشخه‌ر، یه‌ك لایه‌ن به‌شداربوى نییه‌، به‌ڵكوو به‌شداربویه‌یل ده‌سپیشخه‌ره‌یلن و ئاماده‌ن ئه‌را وه‌رگرتن و وه‌خشین وه‌رده‌وام.

 

ده‌سپیشخه‌رى، ئه‌خلاق به‌شداربویه‌یل گفتوگووه‌گه‌س، ك جه‌هان خوه‌یان به‌خشنه‌ یه‌كتر و دى وه‌ى جووریشه‌ بوار فراوانترین ساز كه‌ن تا وه‌ به‌خشنده‌یى سه‌رله‌نوو یه‌كترى پڕه‌و بكه‌ن، ئمجا گشت گفتوگوویگ خوازیار تێكه‌ڵبوین و هاوكاریه‌و له‌و هاوكارییشه‌ چشته‌یل ئاڵشت و ئوڵوشت كریه‌ن ك شایسته‌ى وه‌خشینن وه‌ كه‌س وه‌رانوه‌ر.

 

وه‌ختى باس له‌ گفتوگوو ده‌وڵه‌مه‌ن، خاس و ته‌واو، چڕ وپڕ...هتد كریه‌ید، له‌گشت ئى ده‌رخستنه‌یله‌ ئاماژه‌یگ هه‌س وه‌ وه‌رگرتن و به‌خشین، هویر سه‌ركه‌فتن له‌وه‌ر ئه‌وه‌ك ئه‌وقه‌ره‌ له‌ لۆژیك گفتوگوو جاڕسه‌ چوینكه‌ ئاده‌میزاد ئه‌كاده‌ وه‌رگر و ئه‌و چشته‌یلیشه‌ ك وه‌ریان گرید جوور ده‌سكه‌فت و قانجاز ماددى زانیده‌ى.

 

رێبوار سوه‌یلى

ج. ا