ئه‌و هووكاره‌یله‌ ك په‌یوه‌سن وه‌كیشه‌ى كورده‌یل (فه‌یلى)ه‌وه‌

شفق نيوز

و ئامانج گشتى نه‌ته‌وه‌یى هاوبه‌ش ، وه‌ل ئه‌وه‌یشا كورده‌یل فه‌یلى و ئه‌وانه‌ك نیشته‌جى ده‌یشت كوردستانن كیشه‌یلیگ  دیرن ك تایبه‌تمه‌ندى فره‌یگ  دیریگ  و بایه‌سه‌ له‌وه‌رچه‌و بگیریه‌یگ  و چاره‌سه‌ر ئه‌راى بكریه‌یگه‌ دى ك جیاوازه‌ له‌و كیشه‌یله‌ ك تایبه‌ته‌ وه‌ كوردستان ، له‌وانه‌یش :
1- شوون نیشته‌جى : زوورم كورده‌یل فه‌یلى نیشته‌جاى ده‌یشت هه‌رێم كوردستان عراقن ، وه‌تایبه‌ت له‌به‌غداو ناوڕاس و باشوور عراق . هه‌ر له‌وه‌ر ئه‌وه‌یش ئه‌نجامه‌یل فره‌یگ  له‌لى كه‌فته‌وه‌و زوورمیان خراوه‌و به‌عزیگ  له‌لیان خاسه‌ ، له‌وانه‌یش :
أ- راسه‌وخۆ روى وه‌ڕوى جیاوازیكردن و فشار و ناڕه‌حه‌تى بوینه‌وه‌ له‌مه‌یدانه‌یل جووراوجوور ژیان و مه‌سه‌له‌ى ره‌گه‌زى له‌بان ده‌س حكوومه‌ت عراقى ئه‌را ماوه‌ى دویر و دریژیگ  ، ك دڕه‌نده‌ترین ئه‌و كاره‌یله‌ ده‌رهه‌قیان ئه‌نجام دریا له‌ساڵه‌یل هه‌فتاو هه‌یشتاى سه‌ده‌ى وه‌رین بوى .
ب- روى وه‌ڕوى بوینه‌وه‌ى فشاره‌یل ناڕاسه‌وخۆ كوومه‌ڵایه‌تى و ئابوورى و رووشنهویرى و ده‌روینى (دژایه‌تى ناڕاسه‌وخۆ)و له‌مه‌یدان كاركردن و زانست و خوه‌ندن وه‌سه‌به‌ب ئنتمابوین نه‌ته‌وه‌یى و زوانه‌گه‌یان فشار فره‌یگ  خریا بانیان  .
ج- وه‌مه‌هانه‌ى ئه‌وه‌ك گوایا ئه‌وانه‌ك له‌به‌غدا نیشته‌جى بوین ك زوورمیان كورده‌یل فه‌یلى بوین ، مه‌ترسى راسه‌خۆ دیرین له‌بان رژیم وه‌رین وه‌سه‌به‌ب فره‌یى شماره‌یان و هیز ئابوورى و بازرگانى و چشته‌یل تر .
د- به‌شدارى كارا یا فه‌عال كورده‌یل فه‌یلى له‌ جموجویل رزگاریخواز كوردستانى و باقى هیزه‌یل ئۆپۆزسیۆن عراق جویر مه‌ترسییگ  راسه‌وخۆ زانستن له‌بان رژیم سه‌دامى ، هه‌ر له‌وه‌ر ئه‌وه‌یش رژیم سه‌دام وه‌ دڕه‌نده‌ترین شیوه‌ دژایه‌تیان كرد .
2- سه‌ندنه‌وه‌ى هه‌ق هاووڵاتیبوین له‌ كورده‌یل زوڵملیكریاگ فه‌یلى و بیجگه‌ ئه‌وه‌یش زه‌فتكردن گشت به‌ڵگه‌نامه‌یل ئسپات عراقیه‌تیان : بیگه‌مان كورده‌یل فه‌یلى له‌ى عراقه‌ رووژانه‌ تویش كاره‌سات و كیشه‌یل فره‌یگ  سایكۆلۆژى و ئابوورى و كوومه‌ڵایه‌تى و رووشنهویرى بویانه‌وه‌ ، ئه‌ویش وه‌سه‌به‌ب گومانكردن له‌ هاووڵاتیبوینیان له‌بان ره‌سه‌نایه‌تى و ته‌به‌عیه‌ ، ئه‌وه‌ بوى كورده‌یل فه‌یلى جویر ئه‌وه‌ك گشتمان زانیم و ئاشكرا حكوومه‌ت عراق له‌وه‌خت رژیم به‌عس وه‌ته‌به‌عیه‌ى ئیرانى دریانه‌ قه‌ڵه‌م .
3- كووچ وه‌پیكردن و پاكسازى ره‌گه‌زى : حكوومه‌ت عراق زاڵ بویه‌ گشت وه‌زعیگ  و ته‌ماشاى كورده‌یل فه‌یلى وه‌ك بیگانه‌ كرد له‌عراق و هه‌ر له‌وه‌ر ئه‌وه‌یش مامڵه‌ى بیگانه‌ وه‌لیانا كرد وه‌سه‌به‌ب مه‌سه‌له‌ى نه‌ته‌وه‌یى ، ك بویه‌ سه‌به‌ب جى وه‌جیكردن سیاسه‌ت كووچ وه‌پیكردن زووره‌ملى و له‌ناوبردن و كوشتنیان وه‌چه‌كه‌یل جووراوجوور له‌وانه‌یش چه‌ك كیمیاوى وه‌رج له‌وه‌ك تاقیه‌و بكریه‌یگ  له‌بان هه‌ڵه‌بجه‌و شوونه‌یل تر كوردستان ، یا خوین له‌لیان بریاو دیانه‌ى زه‌خمداره‌یل جه‌نگ  ئیران – عراق ، ك یه‌یش تاوانیگه‌ له‌دژ ئنسانیه‌ت ، دى ئه‌و كووچ وه‌پیكردنه‌ له‌بان فكره‌ى شۆڤێنى زه‌ره‌د فره‌یگ  وه‌كورده‌یل فه‌یلى ره‌سان .