ئاده‌میزاد و ئاده‌میزاد

شفق نيوز

  فریه‌جار ئه‌را فامستن له‌ ئاده‌میزاد یا هه‌ر چشتیگ تر، هه‌وه‌جه‌ وه‌ گله‌وخواردن ئه‌را مه‌ته‌یڵ سه‌ره‌تاى ده‌ركه‌فتن و دروسبوین چشته‌یل، ئنجا ئاده‌میزاد جوور دروسكریاگیگ پڕ نرخ و جیاواز، خاوه‌ن مه‌ته‌ڵ تایبه‌ت وه‌ خوه‌یه‌و مه‌ته‌ڵ دروسبوین ئاده‌میزادیش جوور گشت چشته‌یل تر ته‌نیا یه‌ك روخسار نیه‌، وه‌لى به‌ش فره‌یه‌ى وه‌سه‌رهاته‌یل نزیكن له‌ ئایینیه‌و، چوینكه‌ ئایین نه‌خش گرینگ و سه‌ره‌كى دیرید له‌ ئاراسته‌كردن و خستنه‌ڕوى مه‌ته‌ڵ په‌یابوین ئاده‌میزاد.

ئنجا ئه‌گه‌ر ئیمه‌یش وه‌ دید پڕ دقه‌تیگه‌و ته‌ماشاى مه‌ته‌ڵ یه‌كه‌م ئاده‌میزاد بكه‌یم، بایه‌سه‌ چشته‌یلیگ وه‌ ئاشكرا بوینیم جوور ره‌ته‌وكردن ته‌نیایى، ك ئاده‌میزاد گشت هه‌وڵیگ ئه‌یادئه‌را ئه‌وه‌ك ته‌نیا نه‌ود، دى ئه‌و ته‌نیاییه‌ چ فیزیكى بوود یا رووحى، وه‌ل ئه‌وه‌یشا بڕیگ له‌ كرده‌وه‌و ره‌فتار ئاده‌میزاد ك ئه‌نجامیان ده‌ید جوور هه‌وڵیگن ئه‌را ته‌نیایى.

پاولۆ كۆلیلۆ نویسه‌ر، باوه‌ڕى ئه‌وه‌سه‌ ك ئاده‌میزاد بوود هه‌فته‌یگ وه‌بى ئاو، یا دو هه‌فته‌ وه‌بى خواردن و چه‌نه‌ها ساڵ وه‌بى ماڵ بژیه‌ید، وه‌لى ناتویه‌نید وه‌ ته‌نیایى بژیه‌ید، چوینكه‌ چه‌نیایى نك ناڕه‌حه‌تیه‌یله‌.

دوینید له‌ حاڵه‌ته‌یلیگ ئاده‌میزاد جوور دروسكریاگیگ وه‌رپرسیار كوومه‌ڵایه‌تى خوه‌ى ده‌رخه‌ید، ك یه‌یس له‌ سه‌ره‌تاى وجوود ئاده‌میزاد یه‌كه‌مه‌و هه‌ر وه‌رده‌وامه‌و تا ئیسه‌یش ئاده‌میزاد هه‌ر خه‌ریك ره‌ته‌وكردن ته‌نیاییه‌، ك یه‌یش خه‌یده‌مانه‌ وه‌رده‌م واقعیگ راسكانى و هس وه‌پیكریاگ، چوینكه‌ جوور ئه‌وه‌ك ئاشكراس ئاده‌میزاد هه‌م دژ ته‌نیاییه‌و هه‌میش هووكار و هاوكاره‌ ئه‌را دروسبوین بار ته‌نیایى.

كرده‌وه‌ى له‌ناوبردن ئاده‌میزاد له‌لایه‌ن ئاده‌میزاده‌و، چووده‌ ناو بازنه‌یگ فراوان و فریه‌ مانا، وه‌لى وه‌ ئاشكرا هس وه‌ ئه‌وه‌ كه‌یم ك مه‌ته‌ڵ كوشتن و له‌ناوبردن له‌ قابیله‌و ده‌س وه‌پى ئه‌كا.

ئاده‌میزاد و ئاده‌میزاد هاوكیشه‌یگن، ك وه‌ل یه‌كترى دژ و ناته‌واون، یه‌یش وه‌و به‌ڵگه‌ ك ئاده‌میزاد وه‌ دریژایى وجوود نه‌تویه‌نستگه‌ رووح خوه‌ى پاكه‌و بكا له‌ دڕنده‌یى و دژایه‌تى و له‌ناوبردن ئه‌واكانتر.

گشت رویداگه‌یل گه‌وراى تراژیدى، له‌لایه‌ن خود ئاده‌میزاده‌و په‌یا بویه‌، ئنجا ئه‌گه‌ر وه‌ جوانى ته‌ماشاى رویداگه‌یل ئه‌و دو سه‌ده‌ى گوزه‌یشته‌ بكه‌یم، رووژ وه‌ رووژ ئاده‌میزاد گام مه‌ترسیدارتر نه‌ید ئه‌را ئه‌وه‌ك تواناى قڕكردن فیشتر داشتوود، ك یه‌یش وه‌ ئاشكرا له‌ مه‌سه‌له‌ى پیشكه‌فتن ته‌كنۆلۆجیاى جه‌نگ و به‌رهه‌مهاوردن مادده‌یل كیمیاوى جه‌مكوش دیاره‌.

ماناى ئه‌وه‌سه‌ تا ئیسه‌یش ئاده‌میزاد هویچ گه‌ره‌نتییگ نه‌یرید و ئاشكراس رووژ له‌دویاى رووژ نه‌خشه‌ى دنیایگ بى ئنسانى له‌ خه‌یاڵ خوه‌ى كیشید، ئنجا هه‌وڵ ئه‌را مه‌ندن جووریگه‌ له‌ هه‌وڵ ئه‌را له‌ناوبردن مه‌ردمان تر، ك ئه‌ویش وه‌ هه‌ر هووكار و هه‌ر شیوه‌یگ .

ئارام شێخوه‌سانى

ج . أ