ملله‌ت كورد گشتی پێشمه‌رگه‌س

شفق نيوز

بيگومان ئيمه‌ی كورديش هه‌رچه‌نی باس له‌وه‌ كرديايم ك كوردستانه‌گه‌مان سه‌قامگير و پڕ ئاسايشه‌و دويره‌ له‌ جه‌نگ لويله‌ی تفه‌نگ و كيشمه‌كيش چه‌كداری، وه‌لی وه‌هه‌ر شيوه‌يگ بوی هيز پێشمه‌رگه‌ی كوردستانيش له‌وه‌ر خاتر وه‌رگريكردن له‌ ناوچه‌يل كوردستانی ده‌يشت هه‌رێم تويشی بويه‌ تويش جه‌نگ نه‌خوازرياگ ريكخرياگ داعش و هاوپه‌يمانه‌يلی له‌ ناوچه‌يل جياجيای جوور شه‌نگاڵ و زوممار تلكێف و جه‌له‌ولا...هتد.

ئيسه‌يش دويای خوين كه‌فتنه‌وه‌و شه‌هيدبوين شماره‌يگ له‌ رووڵه‌يل كورد چه‌ونه‌ترس و پێشمه‌رگه‌ی قاره‌مانمان له‌ به‌ره‌يل جه‌نگ، ئه‌وه‌ ده‌ركه‌فێد ك پێشمه‌رگه‌ وه‌گشت باوه‌ڕ و ئيراده‌يگ پووڵايينه‌و گيانفيدای خاكه‌ پيرووزه‌گه‌ی كوردستانن و ده‌س له‌ وژه‌يگ ئی نيشتمانه‌ هه‌ڵناگرن ئه‌را دوشمن و تونڕه‌وه‌يل.

داعش هويچ وه‌ختيگ له‌ وڵات كورده‌يل ئه‌وزه‌ڵ ناكا وه‌و باوه‌ڕ و ئيراده‌ی دوير له‌ شه‌ريعه‌ت ئنسانی و ئسلاميه‌و، هويچ وه‌ختيگ ترۆريست شكه‌ست وه‌ خواست و توانای پێشمه‌رگه‌يل كورستان نايه‌رێدو ئوقره‌ ناگرێد له‌وه‌رانوه‌ر نه‌ڕه‌ی شيره‌ كوڕه‌يل رووژ جه‌نگ.

راسه‌ جاروباريگ نه‌گونجيان و ناته‌باييگ له‌ناونی هيز و لايه‌نه‌يل كوردستانی په‌يا ئه‌دێ وه‌خاتر پۆست و دابه‌شكردن ده‌سڵاته‌يل سياسی، ك يه‌يش مه‌سه‌له‌يگ ئاساييه‌ له‌گشت وڵاته‌يل دونيا، وه‌لی خوه‌شبه‌ختانه‌ ئی هيز و لايه‌نه‌يل كوردستانيه‌ له‌ وه‌رانوه‌ر هه‌ر كيشه‌يگ ده‌ره‌كی و دژه‌ كورد يه‌كهڵويست و يه‌كده‌نگن، وه‌تايبه‌ت ئه‌گه‌ر خودانه‌خواسته‌ په‌ی وه‌ هه‌ر مه‌ترسييگ بكريه‌يد ئه‌را بان نيشتمان كورده‌يل، چوينكه‌ ملله‌ت كورد هويچ وه‌ختيگ ئاماده‌ نيه‌ جاريگتر خاكه‌گه‌ی زه‌فت بكريه‌يد و ئاماده‌ن وه‌ ژن وپياگ و گه‌وراو بويچگه‌و چه‌ك شه‌ره‌ف پێشمه‌رگايه‌تی بكه‌نه‌ شان و خوين خوه‌يان له‌وه‌ر خاتر ئی كوردستانه‌ بكه‌نه‌ قوربانی و ملله‌ت كورد له‌ی جووره‌ حاڵه‌ته‌يليگ گشتی پێشمه‌رگه‌س، ك يه‌يش نيشانه‌ی خوه‌شه‌ويسيه‌ ئه‌را ئه‌و خاك و ئاو و نيشتمانه‌ ك له‌تی ژيه‌ن.

جه‌ماڵ ئه‌ركه‌وازی