كوردستان وڵات وه‌یه‌كه‌و ژیان و یه‌كتری وه‌خشینه‌

شفق نيوز

ده‌وڵه‌ت عراق له‌ساڵه‌یل بیس سه‌ده‌ى وه‌رین دامه‌زریه‌ێدو كوردستان بلكنریه‌ێده‌ عراقه‌و  خاوه‌ن گه‌وراترین شارستانیه‌ت و كلتوور و فه‌رهه‌نگ كویه‌ن ده‌وڵه‌ت ئاشوورى و كلدانى بوین و ته‌نانه‌ت ئه‌كه‌ر ته‌ماشاى شوونه‌واره‌یل كویه‌ن نه‌ینه‌واو نه‌مرووده‌یل و ئه‌كه‌دو بابل و هه‌ولێر و گشت شوونه‌یل تر كویه‌ن بكه‌یم، ئه‌وه‌ ئه‌و شارستانیه‌ته‌ وه‌گه‌وراترین سامان نه‌ته‌وایه‌تى ئى وڵاته‌ دانریه‌ێد ك مایه‌ى شانازى و مایه‌ى ئه‌وه‌سه‌ ك ئمڕوو ملله‌ته‌یل عراق شانازى وه‌پیه‌و كه‌ن.

 

 

ده‌ركه‌فتن دین مه‌سیح له‌كوردستان و عراق ك چووده‌و  ئه‌را سه‌ده‌ى یه‌كه‌م و دویه‌م زایینى له‌بان ده‌س كلكریاگه‌یل عیساى مه‌سیح بویه‌ هووكار ئه‌وه‌ك باوه‌ڕ وه‌و دینه‌ بكریه‌ێد و بتپه‌رسى نه‌مینێد. هه‌ر له‌وه‌ر ئه‌وه‌یش له‌چه‌ن شوونیگ كوشت و كوشتار كه‌فته‌و له‌بان ده‌س سه‌ركرده‌یل ئه‌و سه‌رده‌مه‌و بیجگه‌ ئه‌وه‌یش وه‌بوونه‌ى نه‌ته‌وه‌و شووڕشكاریه‌و ده‌رده‌سه‌رى له‌لى كه‌فته‌و جوور ئه‌وه‌ك له‌ئه‌نفاله‌یل كه‌فته‌و ك گشت كوردستان گرته‌وه‌و هه‌ڵه‌بجه‌یش كه‌فته‌ وه‌ر په‌لامار غاز كیمیاوى. هووكار ئى مه‌سه‌له‌یشه‌ چووده‌و ئه‌را سیاسه‌ت چه‌فت حكوومه‌ت و ده‌سڵاتداره‌یل ك ملله‌ت كوردستان وه‌گشت پیكهاته‌یلیه‌و تویش هه‌مان چه‌وسانن هاتن، ك داگیركه‌ره‌یل وه‌یه‌ك چه‌و ته‌ماشاى گشت چینه‌یل كردگه‌ له‌چه‌وسانن، ئنجا وه‌ختى ته‌ماشاى شووڕشه‌یل ملله‌ت كوردستایش كه‌ێد تیكڵاییگ هه‌س له‌ناو ئه‌و پیكهاته‌ ئه‌را بته‌وكردن رزه‌یلى له‌دژ داگیركه‌ره‌یل.

 

داگیركه‌ره‌یل كوردستان دریغى له‌كوشتن و بڕین و ده‌روه‌ده‌ركردن و داگیركردن موڵك و دارایى مه‌ردم نه‌كردنه‌، هه‌ر له‌وه‌ر ئه‌وه‌یش داخ له‌دڵه‌یل كوردستان هه‌وڵ ئه‌وه‌ دانه‌ خوسه‌و كینه‌ت و ناكوكى بخه‌نه‌ ناونى مه‌ردمه‌گه‌و ناو دین و نه‌ته‌وه‌و مه‌زه‌وه‌یل، ك ده‌س بیگانه‌و داگیركه‌ر ده‌ور خوه‌ى داشتگه‌ ئه‌را ئه‌وه‌ك ملله‌ت كوردستان تائیسه‌یش سه‌روه‌خوه‌یى نه‌ود له‌چاره‌نویش خوه‌ى.

 

ده‌وڵه‌ت تازه‌ى عراق له‌سه‌رده‌م پاشایه‌تى شماره‌ى فره‌یگ له‌ مه‌سیحیه‌یل شاروچكه‌ى سمێل كوشت، له‌سه‌رده‌م رژیم به‌عسیش بڕیگ تر له‌لیان له‌ئاوایى صۆریا كوشیان، وه‌ل ئه‌وه‌یشا له‌ئه‌نفاله‌یلیش مه‌سیحى و موسڵمان و ئیزیدى...هتد وه‌یه‌ك چه‌و ته‌ماشاى گشتیان كرد.

 

له‌شوون رمیان رژیم دكتاتۆرى سه‌دام، گشت ده‌وڵه‌ته‌یل هه‌رێمى و پاشمه‌نده‌یل رژیم رمیاگ له‌هه‌وڵ ئه‌وه‌ بوین مه‌سحیه‌یل له‌عراق ده‌ركه‌ن و ئاواره‌یان بكه‌ن و شوونه‌یل پیرووزیان بته‌قننه‌و، ئى په‌لاماریشه‌ مزگفت و كه‌نیسه‌و حسیه‌نیه‌یلیش گرته‌و له‌عراق وه‌تایبه‌ت ناوچه‌یل عه‌ره‌بنشین، وه‌ل ئه‌وه‌یشا ئێزیدیه‌یلیش له‌ناوچه‌یل خوه‌یان تویش خراوترین چه‌وسیان و ده‌روه‌ده‌رى و كوشتن هاتن له‌ پاریزگاى موسڵ.

 

ئنجا كوردستان ئومیده‌واریم ك وه‌ سه‌روه‌خوه‌یى بوینیمنه‌د، چوینكه‌ ئه‌را گشتمان وڵات وه‌یه‌كه‌و ژیان و له‌یه‌كوه‌خشین و ئه‌را گشتمان وڵات ئاشتى و ئارامى و ئازادى و وڵات موسڵمان و مه‌سیحى و ئێزیدى و نه‌ته‌وه‌و دین و مه‌زه‌وه‌یلى، وڵات چه‌پكه‌ گوڵ ڕازاوه‌یدو له‌تیه‌ڵى و خوه‌شى گشت پیكهاته‌یل جوور یه‌ك ژیه‌ن له‌تى، ك ئیسه‌یش ئى پیكهاته‌یله‌ له‌حكوومه‌ت هه‌رێم كوردستان ده‌ور كاراو كاریگه‌ر دیرن و به‌شدارن له‌داناین یاساو هه‌ر بڕیاریگ ك ئاینده‌ى گشت ملله‌ت كوردستان و پیكهاته‌یلى له‌ژیر سایه‌ى ئاسووده‌ بوون و دیموكراسى و یه‌كسانى و خوه‌شگوزرانى ئه‌را گشت چینیگ له‌ چینه‌یلى دابین بكا.

جه‌میل عیسا

ج