جه‌سان داوڕیاگ له‌خاك باوان

شفق نيوز

ئاواره‌یى په‌ڕ شاره‌یل وه‌ سه‌خترین بار ژیانه‌وه‌ رووژگار به‌نه‌ سه‌ر و له‌كه‌ش وهه‌وایگ وه‌ناو ئازادى و دیموكراسى چه‌نه‌ واى واوه‌شینیگ هونكى وه‌پیان نه‌ڕه‌سیه‌و ترویسكه‌یگ روشنایى نه‌ینه‌سه‌ چه‌و، ك یه‌یش وه‌ بوونه‌ى ئه‌و رویداگه‌یل و كاره‌ساته‌یل ناخوه‌ش و دڵته‌زنه‌ ك له‌ژیر سایه‌ى رژیمه‌یل یه‌ك له‌شوون یه‌ك عراق وه‌تایبه‌ت رژیم به‌عس دكتاتۆر هاته‌ تویشیان و گشت ئه‌و مه‌ردمان كورده‌ له‌خاك خوه‌یان دویره‌و خریان و له‌شوونه‌یل تر ناوڕاس و باشوور عراق نیشته‌جى كریان و له‌لیانیش ئاواره‌ى زووره‌ملى وڵات ئیران كریاو له‌گشت موڵك و زه‌وى وزاریان ناهمى كریان و شاره‌ دڵگیره‌گه‌ى شوون باپره‌یلیان كریا ویرانه‌، ك ئه‌ویش جه‌سان داوڕیاگ له‌خاك باوان كوردستانیه‌و چه‌وه‌ڕى ئاوه‌دانى و هاتنه‌وه‌س ئه‌را باوه‌ش كوردستان.

جه‌سان وه‌دویرى (70)كم كه‌فیگه‌ خوه‌رهه‌ڵات پاریزگاى كووت(واست)و له‌هه‌مان وه‌خت كه‌فیگه‌ باشوور خوه‌رئاواى شار به‌دره‌. مه‌ردمه‌ كورده‌گه‌یشى وه‌ناوبانگن وه‌ به‌شداریكردن و هاوكاریكردن له‌ جموجویل ئازادیخواز كوردى و له‌و لایه‌نه‌وه‌ نه‌خش یاده‌ور باڵایگ داشتنه‌.

جه‌سان فه‌یلى نشین هه‌میشه‌ مه‌ردمه‌گه‌ى وه‌رجه‌ ئه‌وه‌ك كووچ زووره‌ملى وه‌پیان بكریه‌ى، خه‌ریك زه‌وى كاڵى یا ئه‌رواوى بوینه‌و ژیان ئاسووده‌و ئارامیگ داشتنه‌.

چه‌م گڵاڵ وه‌رده‌وام تیه‌نگى زه‌وى و باخ و بوسان و دارسانه‌یل ناوچه‌گه‌ شكانگه‌، وه‌لى له‌شوون ریككه‌فتننامه‌ى شووم جه‌زایر له‌ساڵ 1975 له‌ناونى شاى گوڕ وه‌گووڕ و سه‌دام حسێن دكتاتۆر ك له‌و وه‌خته‌ جیگر سه‌رۆك كوومار عراق بوى و له‌بان داواكارى و مه‌رجه‌یل ئمزاكریاگ، دى به‌دبه‌ختى ڕویداو مه‌سه‌له‌ى به‌خشین(شه‌تولعه‌ره‌ب)له‌لى كه‌فته‌وه‌ ك وه‌دریژى 90 كیلۆمه‌تر ده‌س له‌لى ئه‌ڵگریا و یه‌یش كاریگه‌رى خراویگ داشت له‌بان ناوچه‌یل مه‌رزنشین عراق و هه‌ر له‌وه‌وه‌ ئاو ناوچه‌ى جه‌سان روى له‌كه‌مى كرد و تاڕه‌سیه‌ ئه‌و ڕاده‌ى چه‌م گه‌ڵال وه‌یه‌كجارى وشكه‌و بوود.

بیگومان له‌سایه‌ى حوكم رژیمه‌یل شۆڤێنى، كه‌مه‌ كه‌مه‌ شاره‌یل و ناوچه‌یل گه‌رمه‌سیر كوردنشین وه‌تایبه‌ت شاره‌یل نزیك له‌مه‌رز، ده‌سڵات كورد و تام كورده‌وارى له‌تیان كزو كریا له‌ئه‌نجام سیاسه‌ت ناپاك و ته‌عریبكردن و كووچ زووره‌ملى وه‌مه‌ردم ره‌سه‌ن كورد ئه‌و شوونه‌یله‌ وه‌ره‌و شاره‌یل تر. وه‌ل ئه‌وه‌یشا مه‌رمان غه‌یره‌ كورد هاورده‌ ناوچه‌گه‌و له‌بان ماڵ و موڵك كورد ئه‌وان ده‌سكردنه‌ زه‌وى كاڵى و ئه‌رواوى و كورده‌ به‌دبه‌خه‌ته‌گه‌یش شوونله‌ق كریاو ره‌نج بیوه‌ر و هه‌ناسه‌ى سه‌رد.

جه‌نگ كاولكار هه‌یشت ساڵه‌ى ناونى ئیران و عراق زه‌ره‌د فره‌ گه‌ورایگ ره‌سانه‌ ناحیه‌ى جه‌سان و ده‌روه‌رى، له‌ده‌ستوور عراق فیدراڵییش له‌شوون رمیان بته‌گه‌ى به‌غدا له‌نیسان 3003، مادده‌ى 140 ده‌ستوور دڵخوه‌شییگ بوى ئه‌را ئه‌وه‌ك جه‌سان داوڕیاگیش جویر ناوچه‌یل تر (خانه‌قى و مه‌نه‌لى و سنجار و زممار و شه‌نگاڵ و مه‌خموور)داوڕیاگ له‌خاك هه‌رێم كوردستان بایگه‌وه‌ ئه‌را ژیر ده‌سڵات كوردو گشت خیزانه‌یل كوردمان له‌ى شاره‌ بڕه‌سنه‌ ئومیدو ئاره‌زووه‌یلیان ك تائیسه‌یش چه‌وه‌ڕى كریه‌یگ خوه‌ر له‌كه‌ل بایگه‌ ده‌ر.

 

جه‌ماڵ ئه‌ركه‌وازى