سه‌روه‌خوه‌یى ئه‌را چ ملله‌ت و نه‌ته‌وه‌یگه‌؟

شفق نيوز

یاسایه‌یل وه‌ ده‌وڵه‌تبوین گریده‌یانه‌و ك خود جاڕنامه‌ى هه‌قه‌یل ئاده‌میزاد ئاماژه‌ ئه‌ڕاى كردگه‌ ئه‌گه‌ر بخوازن سه‌ر وه‌خوه‌یان بوون له‌ ئاكام ریفراندۆمیگ سه‌روه‌خوه‌یى.

 

له‌ى بواریشه‌ نه‌ته‌وه‌ى كورد وه‌گشت په‌یمانه‌یگه‌و شایسته‌ى داشتن ده‌وڵه‌ت سه‌روه‌خوه‌یه‌و وه‌بى ئه‌وه‌ك دودڵى و ترس و شه‌رم نیشان بیاد له‌و هه‌قه‌یل ره‌وا، ك له‌وه‌ر خاتر ئه‌و سه‌روه‌خوه‌ییه‌ خه‌بات كردنه‌و قوربانیه‌یل فره‌یگ دانه‌ چ وه‌خوه‌ین یا وه‌ وه‌خت و سه‌عات و له‌ده‌سداین خاك و ئاوه‌گه‌ى وه‌ شیواز داگیركارى و داوڕیان.

 

هه‌ر له‌شوون رمیان بلۆك روسیاى یه‌كگرتگ ، باوه‌ش كریاوه‌ ئه‌را نه‌ته‌وه‌یلیگ ك وه‌بى ئاره‌زوو خوه‌یان چه‌نه‌ها ساڵ له‌ژێر ده‌سڵات رووسه‌یل بوین وه‌بى ئه‌وه‌ك بتویه‌نن گام فراوانخوازى بنه‌ن رووژه‌یل ژیانیان گوزه‌ر كردیان، وه‌لى ئى كاره‌ تا سه‌ر نه‌وى و له‌شوون ساڵه‌یل نه‌وه‌د قه‌واره‌ى جوگرافى و هێز مه‌ردمى روسیا ئه‌را چه‌نه‌ها قه‌واره‌ى جیاخواز به‌شبه‌شه‌و بوى و له‌هه‌مان وه‌خت وه‌ربه‌سه‌یل فره‌یگ شكیا ئه‌را پێكهاوردن ده‌وڵه‌ت سه‌روه‌خوه‌یى و سه‌ره‌تا وه‌ له‌داڵگبوین جۆرجیا ده‌سكرده‌ پى له‌ 26/5/1991 له‌شوون شكه‌ست یه‌كیه‌تى روسیا.

 

خوه‌شبه‌ختانه‌ ئى بواریشه‌ ئه‌را كورد هاته‌ نواو هه‌ر له‌شوون داگیركردن كوه‌یت له‌لایه‌ن سوپاى داگیركه‌ر و بێ به‌زه‌یى ده‌وڵه‌ت ئه‌وساى سه‌دام گووڕ وه‌ گووڕ دژ وه‌ ئنسانیه‌ت و هاتن هێزه‌یل ناوده‌وڵه‌تى و رویوه‌ڕوى بوینه‌وه‌ى وه‌ل فه‌رمانه‌ سه‌ربازیه‌ ناڕه‌واگه‌ى به‌عس ئیچنه‌ كرد هه‌م سوپاى داگیركه‌ر وه‌ مل شكیاگى له‌ كوه‌یت ده‌ربكریه‌ێد و هه‌میش ملله‌ته‌یل عراق وه‌ تایبه‌ت ده‌س بكه‌نه‌ راپه‌ڕین، ك وه‌هار ساڵ 1991یش بویه‌ مایه‌ى سه‌روه‌خوه‌یى ئه‌را باشوور كوردستان و ئه‌وه‌سه‌ ده‌سه‌ڵات كوردى ئه‌را ماوه‌ى زیاتر له‌ 21 ساڵ وه‌رده‌وامه‌ جوور هه‌رێمیگ جیا له‌ ده‌وڵه‌ت ناوه‌ندى كاره‌یلى ئه‌واده‌ ڕێیه‌و.

 

وه‌ به‌راوه‌رد وه‌ل سه‌ده‌یل گوزه‌یشته‌، نه‌ته‌وه‌ى كورد بیجگه‌ ئه‌وه‌ك ئابڵوقه‌یگ سه‌ربازى له‌بانى بوى، وه‌لى ئمڕوو تویه‌نیم بویشیم له‌ بار خاسیگ ژیه‌ێد وه‌و مه‌رجه‌ یه‌كده‌نگ  بوون و باوه‌ڕ وه‌ خوه‌یان داشتوون، چوینكه‌ ئیمه‌یش نه‌ته‌وه‌یگیم بایه‌د جوور ملله‌ته‌یل تر ئاسایش و فه‌رمانڕه‌وایى خوه‌مان داشتویم وه‌بێ هویچ چه‌وبڕینیگ له‌ خاك و ئاو و داهات هویچ وڵاتیگ تر، یه‌یش وه‌و مه‌رجه‌ پایه‌ى وه‌ ده‌وڵه‌تبوین بته‌وتر بكه‌یم.

 

قه‌واره‌و فره‌یى ملله‌ت كورد فره‌ له‌وه‌ گه‌وراتره‌ ك وه‌ شه‌رمه‌و داواى ده‌وڵه‌تبوین ئه‌راى بكریه‌ێد، كورد هه‌ر له‌ زویه‌و بایه‌د سه‌روه‌خوه‌ى بویاتاد نه‌ك دویاى چه‌نه‌ها ساڵ ك ئیسه‌یش وه‌ ئاشكرا ئى باسه‌ ناكریه‌ێد، یه‌یش له‌وه‌ختیگ مه‌ركه‌زه‌یل ناوده‌وڵه‌تى هه‌قه‌یل ئاده‌میزاد خوه‌یان وه‌ گیل و بى ئاگا له‌و تاوانه‌یله‌ زانن ك هاته‌ بان ملله‌ت كورد، هه‌ڵبه‌ته‌ یه‌یش هووكاره‌گه‌ى چووده‌و ئه‌را ئه‌وه‌ك خود كورد نه‌تویه‌نستگه‌ خواسته‌یل خوه‌ى وه‌ سینه‌ى فراوانیگه‌و باس بكاو له‌هه‌مان وه‌خت مه‌ركه‌ز بڕیارده‌ر جه‌هانیش ناتنه‌سه‌ ته‌نگ گرفت و كێشه‌یل كورد.

 

قاسم ئه‌حمه‌د

ج. ا