ماس بخوه‌ن با تام ژيان بكه‌ين

شفق نيوز

ماس سه‌رچه‌وه‌يگ فريه‌ى ده‌وڵه‌مه‌ن كالسيۆم و فسفۆر و فيتامينه‌يل ده‌سه‌ى ب 5، ب6، ب 12و زينكه‌. خاڵيگ گرينگ هه‌س ك بايه‌سه‌ گشتمان بزانيمنه‌ى ئه‌وه‌سه‌ ك بايه‌سه‌ ئه‌و ريژه‌ى كالسيۆمه‌ ك جه‌سه‌ وه‌ريگريد، وه‌ل ريژه‌ى فسفۆر خواست هاوسه‌نگ بدێ، ئى ريژه‌يشه‌ بيجگه‌ له‌ شير دايگ ته‌نيا له‌ ماس وجوود ديريد، يه‌يش ئسپات ئه‌وه‌ ئه‌كا ك ماس ئه‌را گشت عومريگ وه‌كه‌ڵك و نه‌فداره‌.

ته‌ماشاى ديمه‌ن جوان مناڵيگ خرپن بكه‌ له‌وه‌خت ماسخواردن ك چوين ده‌م وپل و گيان خوه‌ى ناسه‌ ماسه‌گه‌و وه‌خواردن هه‌ر كه‌مچگيگ ماس تام ئه‌وه‌خشيده‌ گشت ژيانى.

ژنه‌يل فره‌نسى ئه‌را ئه‌وه‌ك هه‌ميشه‌ وه‌ جوانى بمينن و مقه‌يه‌تى خوه‌يان بكه‌ن له‌ پيرى، وه‌رده‌وام ماس هاوڕى ژيانيانه‌، ئه‌گه‌ريش مێرمناڵيل يا جايه‌ڵ جوانه‌يل و پياگه‌يليش وه‌گووره‌ى خواست شيره‌مه‌نى نه‌خوه‌ن، ئه‌وه‌ له‌ى حاڵه‌ته‌ مه‌ترسى لووچى روخسار ئه‌كه‌فيده‌ جه‌سه‌يان.

قانجازه‌يل ماس فريه‌ فريه‌س، بيجگه‌ له‌ بته‌وكردن و قايمكردن له‌ش، له‌ڕى ئه‌و مايكرۆبه‌يل نه‌فداره‌و ك له‌ گه‌يه‌و ريخووڵه‌ په‌روه‌رده‌يان ئه‌كا رييش له‌ شيرپه‌نجه‌ ئه‌گريد، وه‌ل ئه‌وه‌يشا فسفۆره‌گه‌يشى ئه‌را مه‌ژگ فريه‌ خواسته‌و مقه‌يه‌تى ئاده‌ميزاد له‌ ئه‌لزايمه‌ر ئه‌كا.

له‌ ئه‌مريكاو ئۆرپا، سيف، مۆز، كشمش تيكه‌ڵ وه‌ ماس ئه‌كريه‌يد و ئه‌خوه‌نه‌ى، يه‌يش خراو نيه‌، وه‌لى ريژه‌ى كالسيۆمه‌گه‌ى كه‌متره‌، ئمجا له‌ به‌شه‌يل تر باس له‌ بريگ په‌يمانه‌سازى كرياگه‌ له‌ تيكه‌ڵكردن ماس وه‌ل مادده‌يل تر ك يه‌يش وه‌هه‌مان شيوه‌ نه‌فداره‌ له‌ ژيان ئاده‌ميزاد، ماناى ئه‌وه‌سه‌ ماس له‌ژيان ئاده‌ميزاد نه‌ف ديريد نه‌ك زه‌ره‌د.

پەیوەند ڕەمەزانی

ج . أ