خه‌و ئاینده‌مان ئه‌را سیستم په‌روه‌رده‌یى

شفق نيوز

 

سیستم په‌روه‌رده‌یى له‌هه‌ر كوومه‌ڵگایگ له‌بان ئه‌و خواست و خه‌وه‌یل دونیادیده‌نى گه‌ورا بنیات نریه‌ید ك شاره‌زایه‌یل و ئه‌كادیمیه‌یل بوار په‌روه‌ده‌یى وه‌ پشت به‌سانن وه‌ سیستم ئه‌زموونكردن جه‌هانى ره‌نگڕیژى ئه‌را كه‌ن. ئى سیستمه‌ له‌هه‌ر كوومه‌ڵگایگ هه‌ڵگر خه‌و ره‌سانن تاكیگ پڕ مایفه‌ته‌ ك رابه‌رایه‌تى زانست و ره‌وت رووشنهویرى ئه‌كا وه‌ خاتر پیشكه‌فتن و هاوچه‌رخكردن هویر و هووش سه‌رجه‌م تاكه‌یل ئه‌و كوومه‌ڵگا.

له‌ى دیده‌و توه‌ینیم بویشیم له‌پشت هه‌ر شه‌كه‌تییگه‌و له‌وه‌ر خاتر خاستركردن سیستم په‌روه‌رده‌یى، دونیایگ ره‌نگاوڕه‌نگ و جوان و پڕ له‌خواست ئاینده‌یى هه‌س، یا تویه‌نیم بویشیم له‌ هویر ئاینده‌یى تاكه‌یله‌و ئه‌را جه‌هان ئه‌و پیشكه‌فتنه‌یله‌ ك له‌ وڵاته‌یل دوینریه‌ید به‌ش ته‌واویگى له‌به‌رهه‌م ئه‌و سیستم په‌روه‌رده‌ییه‌سه‌ ك وه‌شیوه‌یگ خاس و دروس دانریاگه‌.

ئه‌گه‌ر ته‌ماشایگ سیستم په‌روه‌رده‌ له‌ هه‌رێم كوردستان بكه‌یم، بیجگه‌ ئه‌و هه‌وڵه‌یله‌ ك وه‌رده‌وام دریه‌ید له‌ى بواره‌، وه‌لى هیمان سیستم په‌روه‌رده‌یى ئیمه‌ هوه‌جه‌ وه‌ ئاڵشتكارى فیشتر و گه‌وراتر و مۆدێرنكردن ئه‌و سیستمه‌ دیرید ك تا ئیسه‌ كزه‌ له‌ئاست ئه‌و ئاره‌زووه‌یل ئیمه‌ ئه‌را ره‌سانن تاك له‌هه‌ر بورایگ خزمه‌تكردن، دوینیم ساڵانه‌ پرۆتۆكۆڵ گه‌ورا گه‌ورا كریه‌ید له‌بوار خوه‌ندن و فیكاره‌كردن و ساڵانه‌ كتاوه‌یل خوه‌ندن ئاڵشت كریه‌ن و خوه‌ندنگایه‌یل نموونه‌یى واز كریه‌یدو ته‌نانه‌ت خاسترین ده‌رسده‌ریش له‌ ده‌یشت وڵاته‌و تیه‌ریم و له‌بان ئه‌زموون وڵاته‌یل ده‌یشت سیستم خوه‌ندنمان دانه‌یم، ك وه‌گشتى بودجه‌یگ گه‌ورایش له‌ى وڵات ئیمه‌ ئه‌را ئى مه‌رامه‌ خه‌رج كریه‌ید، وه‌لى وه‌ل ئه‌وه‌یشا نوڕید هیمان هه‌ر ره‌خنه‌ى مامۆستاو خوه‌ندكار و لایه‌نه‌یل په‌یوه‌ندیدار له‌ى بواره‌ فیشتره‌و بوود.

مه‌سه‌له‌ى ئاشكرایگه‌ ك ئیمه‌ له‌ كوردستان هه‌وڵ دایمنه‌و هه‌ر وه‌رده‌وام هه‌وڵیش ده‌یم تا خاسترین سیستم په‌روه‌رده‌ى جه‌هانى بخوه‌نیم، ك ته‌نیا ئامانج ئى كۆپیكردنیشه‌ له‌ ژینگه‌یگ ئۆرپیه‌و ئه‌را ژینگه‌یگ خوه‌رهه‌ڵاتى ك كوردستانه‌ ئه‌وه‌سه‌ ك ئیمه‌یش بڕه‌سیممنه‌ ئاست ئه‌و وڵاته‌یله‌و بتویه‌نیم له‌ دید سیستم په‌روه‌رده‌ییمانه‌و شووڕشیگ گه‌وراى زانیارى و رووشنهویرى به‌رپا بكه‌یم، وه‌لى دونید ئیمه‌ كه‌تر گرینگى وه‌پى ده‌یم و ته‌نانه‌ت نه‌تویه‌نستیمه‌ گه‌ورایى راسكانى ئى سیستمه‌ كۆپى بكه‌یم و هیمان ئیمه‌ واقع ئه‌و سیستمه‌ وه‌ته‌واوى نه‌زانستیمه‌ ئه‌را ئه‌وه‌ك له‌ڕى ئى سیستمه‌و خوه‌ندكاریگ چالاك و شاره‌زا باریمنه‌ به‌رهه‌م ك سوو بوونه‌ چراخ هه‌ڵگر ریگه‌ى سه‌ركه‌فتن ئى ملله‌ته‌و ئاینده‌ى ئى وڵاته‌ له‌ده‌س ئه‌و بوود.

ئنجا بیجگگه‌ ئه‌و هه‌مگه‌ شه‌كه‌تى و خه‌مخوه‌رى حكوومه‌ت هه‌رێم و هه‌وڵه‌یلیه‌ له‌ى بواره‌، بایه‌سه‌ فیشتر كار بكه‌یم له‌بان سیستم په‌روه‌رده‌ییمان تا ئیمه‌یش بتویه‌نیم جوور هه‌ر ملله‌ت و حكوومه‌تیگ تر له‌ به‌رهه‌م ئه‌و شه‌كه‌تیه‌ بچنیمنه‌و.

ئازاد ئبراهیم

ج . أ