هونه‌ر پرسیاركردن

شفق نيوز

  پرسیار ماناى داواكردن زانیارییگ دیاریكریاگه‌ له‌ كه‌سه‌یل تر ، یا شیه‌وكردن ئه‌و قسه‌و باسه‌ یا هه‌ر چشتیگ تر ك ئاشكرا نیه‌، یه‌یش له‌وه‌ر خاتر دڵنیابوین و یایگرتنیشه‌ له‌هه‌مان وه‌خت.

ئنجا له‌یرا ئه‌خوازیم شیواز و جووره‌یل پرسیاركردن باس بكه‌یم ك چوین بتویه‌نیم جواو خواست وه‌ربگریم له‌ ئاكام ئه‌و پرسیاركردنه‌. ئنجا دویاى ئه‌وه‌ك پرسیاره‌گه‌ له‌ مه‌ژگمان دروس بوود وه‌شیوه‌ى گونجیاگیگ بایه‌سه‌ هه‌وڵ ده‌سكه‌فتن جواو بیه‌یم وه‌ى شیوه‌یله‌:

* پرسیار نه‌كردن له‌باوه‌ت كاروبار كه‌سایه‌تى، وه‌و مانا ك ك پرسیاریگ نه‌ود ك بووده‌ هووكار ئه‌وه‌ك وه‌رانوه‌ره‌گه‌د حه‌ز نه‌كا جواوى بیاده‌و.

* پرسیاریگ مه‌كه‌ ك بووده‌ هووكار له‌كه‌داركردن كه‌سایه‌تى كه‌سه‌یل تر، یا تاوانباركردن و ئه‌و پرسیاره‌یله‌ ك ده‌مه‌قاڵ فریه‌یگ دروس كه‌ن.

* پرسیاره‌یل وه‌شیوه‌یگ دوشمنكارانه‌ نه‌ود، به‌ڵكوو وه‌ جووریگ بوود ك بووده‌ هووكار گفتگوویگ ئارام و نه‌فدار.

* وه‌ شیوه‌یگ پرسیار مه‌كه‌ ك بووده‌ هووكار خود ده‌رخستن و لویتبه‌رزى، به‌ڵكوو پرسیاریگ بكه‌ ك بووده‌ هووكار ئه‌وه‌ك وه‌رانوه‌ره‌گه‌د وه‌ ته‌واوى جواو بیاده‌و.

* پرسیار له‌باوه‌ت هویر و ڕاى مه‌ردم بكه‌ وه‌ شیوه‌ى گونجیاگیگ و له‌ هه‌مان وه‌خت وه‌ شیوه‌یگ گوجیاگیش هویر وڕایان وه‌ربگر.

* داواى چشت بوچگ له‌ مه‌ردم بكه‌، تا ئه‌وه‌ك له‌ تواناى هه‌س ئه‌راد جیوه‌جى بكاو ده‌سمیه‌تد بیه‌ید.

بیگومان ئى چه‌ن خاڵه‌یله‌ ك باسیان كردیم، ئه‌یانه‌ شیواز و چوینیه‌تى پرسیاركردن نیشان ده‌رن، هه‌ر له‌وه‌ر ئه‌وه‌یش بایه‌سه‌ یه‌یش له‌هویرمان نه‌چوود ك له‌هه‌مان وه‌خت ژینگه‌و شوون و وه‌ختیش له‌وه‌رچه‌و بگریم و بزانیم سروشت ئه‌و كه‌سیشه‌ چوینه‌ ك پرسیار له‌لى كه‌یم.

یوسف هه‌ریرى

ج . أ