حوسێن ئه‌را كورده‌یل فه‌یلى ئه‌گیرێ

شفق نيوز

ئیمام حوسێن كوڕ عه‌لى ك له‌ساڵ 61 كووچى رویدا پڕ وه‌دڵ تازه‌وه‌ كه‌ن.

ئه‌وه‌ك له‌لیان له‌ڕووژ عاشورا له‌گشت مانگیگ موحه‌ڕه‌م سه‌ر خوه‌ى خویناوى بكا وه‌ شمشیر ك جوور میراتیگ بویه‌سه‌ باو، ئه‌وه‌ تویه‌نێد زه‌نجیر بیه‌ێد له‌خوه‌ى، ئه‌وه‌كیش نه‌تویه‌نێد ئه‌و زه‌نجیره‌ هه‌ڵگرێد وه‌ده‌سه‌یلى سینه‌ كوتێد، نه‌خوه‌شه‌یلیش وه‌ گیرستن دڵته‌نگى خوه‌یانه‌ نیشانده‌ن.

 

له‌رووژ ده‌یه‌م مانگ موحه‌ڕه‌م له‌و ساڵه‌ 72 كه‌س كوشیا له‌رویداگ كه‌ربه‌لا، ك ئه‌وانه‌یش ئیمام حوسێن و شماره‌یگ له‌كه‌س وكار و لایه‌نگره‌یلى بوین.

 

گیرستن كورده‌یل فه‌یلى ئه‌را حوسێن وه‌ڕاسى مایه‌ى نووڕستنه‌، ئه‌گه‌ر حوسێن تویش كاره‌ساتیگ هاتگه‌، ئه‌وه‌ له‌تاریخ ئى چینه‌ ئه‌وه‌نه‌ مه‌ویسى رویداگه‌ ك وه‌ جووریگ 365 رووژه‌گه‌ى گشت ساڵیگ هه‌ر خه‌م و دڵته‌نگیه‌ له‌لایان.

 

ناوچه‌یلیان له‌ڕوى تاریخیه‌و خاڵ وه‌یه‌كڕه‌سین ناونى هه‌ردوگ ئمپراتۆریه‌ت فارس و عوسمانى بویه‌و بیجگه‌ ئه‌وه‌یش مه‌یدانیگ بویه‌ ئه‌را جه‌نگ و په‌لاماره‌یل یه‌كترى و كاولكردن شوونه‌یلیان و كووچ وه‌پیكردن ك بویه‌سه‌ بایس فه‌وتانن ژیان هه‌زاران له‌لیان له‌ناوڕى سه‌رد جه‌وه‌ڵى.

 

هووزه‌یل فره‌یگ له‌لیان وه‌یه‌كجارى له‌ناو بریان و له‌لیانیش ده‌ركریاو دویره‌و خریا ئه‌را خوراسان و ئه‌نادۆل ك ئیسه‌ له‌لیان مه‌ندگه‌.

 

ئه‌گه‌ر لاپه‌ڕه‌یل تاریخ به‌یمنه‌ یه‌كا، دوینیم هه‌ر له‌سه‌ره‌تاى دامه‌زرانن ده‌وڵه‌ت عراقى ناوچه‌یلیان كه‌فته‌وه‌ر خاك حه‌رام، چوینكه‌ زنجیره‌ شوونه‌یلیگ بوى وه‌ل مه‌رز عراقى ئیرانى و هه‌میشه‌ ده‌سڵات حكوومه‌ت عراقى پاكسازى ره‌گه‌زى له‌و ناوچه‌یلیانه‌ ئه‌نجام دا، تا ئه‌وه‌ بوى ناوچه‌یلیان له‌خه‌ریته‌یش كوشانه‌وه‌، ك هه‌رچه‌نى بڕیگ له‌و شوونه‌یله‌ كه‌لاوه‌ كویه‌نه‌یلیان مه‌ندگه‌.

 

بیجگه‌ تاریخ دویر، ئه‌گه‌ر ته‌ماشاى ئى سه‌رده‌م رژیم به‌عسیش بكه‌یم له‌كووتایى ده‌یه‌یل سه‌ده‌ى وه‌رین، ده‌سڵات به‌عس گه‌وراترین كاره‌سات ئه‌نجامدا، ك زیاتر له‌ یه‌ك ملیۆن كه‌س له‌تى بوینه‌ قوربانى، له‌و خیزانه‌یله‌ ك گشت ماڵ و موڵكه‌یلیان له‌لیان زه‌فت كردو دویاخریش ژن و مناڵ و گه‌وراو بویچگیان وه‌پا خسته‌ پشت مه‌رز.

 

له‌بان ئه‌وه‌یشه‌و ده‌سڵات به‌عس ده‌سكرده‌ گرتن زیاتر له‌12هه‌زار جایه‌ڵ جوان له‌لیان له‌عومر ناونى 18و 28ساڵ و خسته‌یانه‌ زندانه‌یل ئه‌بو غرێب و دویاى ئه‌وه‌یش له‌  تاقیگاى چه‌ك كیمیاوى فه‌وتانه‌یان.

 

گشت ئى كاره‌ساته‌و كه‌سیگیش نیه‌ خه‌میان بخوا له‌هویچ به‌دبه‌ختییگ و كه‌س نیه‌ بنوڕێده‌ مه‌ویسى و مه‌ینه‌تى كورده‌یل فه‌یلى و له‌ئاستیان بیده‌نگن.

 

ئه‌وه‌ك ئیمام حوسێن كوڕ عه‌لى كوشت، خه‌لیفه‌ى ئه‌مه‌وى یه‌زید كوڕ معاویه‌ بوى، ئمجا ئه‌گه‌ر پرسیار له‌ یه‌زید بكه‌ید ك وه‌لاى شیعه‌و گه‌وراترین تاوانباره‌ له‌تاریخ، له‌بان ئه‌و كاره‌ساته‌یله‌ ك حكوومه‌ته‌یل یه‌ك له‌شوون یه‌ك عراق ده‌رهه‌ق وه‌ كورده‌یل فه‌یلى له‌عراق، ئه‌وه‌ بیگومان خه‌جاڵه‌تى كیشا.

 

ئه‌گه‌ریش پرسیار له‌ حوسێن بكه‌ید له‌بان ئه‌و كاره‌ساته‌یله‌ ك سه‌ده‌ها هه‌زار قوربانى له‌لى كه‌فته‌و وه‌دریژایى ساڵه‌یل، ئه‌وه‌ وتیاده‌ پیان ئیوه‌ ئه‌را خوه‌دان بگیرن، چوینكه‌ ئیوه‌ له‌من ئه‌ووه‌رترین، ك خود خوه‌یشى دڵى ته‌نگ بوود وه‌پیان و ئه‌رایان گیرێد.