دیاریكردن وه‌خت ئه‌را مردن

شفق نيوز

  هه‌رچه‌نى وجوود و مردنمان له‌گشت چشتیگ راستره‌و هویچ ئاده‌میزادیگ نیه‌ ك بتویه‌نید خوه‌ى له‌لى قورتار بكا، وه‌لى وه‌ل ئه‌و هه‌مگه‌ خوه‌شى و ناخوه‌شیه‌یل ژیانیشه‌ ئیمه‌ هه‌میشه‌ هه‌وڵ ئه‌وه‌ ئه‌یه‌یم ك وه‌ پیرى بمریم.

تا ئیسه‌ له‌جه‌هان فریه‌جار مه‌سه‌له‌ى مردن وه‌ پیریه‌و په‌یوه‌س كریه‌ید، ك دى هویچ ماوه‌یگ له‌تى نیه‌مینید و مردن نزیكه‌و بویه‌، ئنجا ئایا هس كه‌سیگ گه‌ورا عومر یا پیر چوینه‌ ك له‌و قوناغه‌ نزیكه‌و بویه‌؟

ئیمه‌ وه‌شیوه‌یگ گشتى ئاره‌زوومه‌ندیم وه‌ مردنیگ بى ئازار، هه‌ر له‌وه‌ر ئه‌وه‌یش فریه‌ن ئه‌وانه‌ك وه‌بى ئازار مرن، وه‌ل ئه‌وه‌یشا فره‌جار مردن وه‌ شیوه‌یگ ئه‌یاد ك فریه‌ سته‌مه‌ بڕیار بیه‌یم ك چوین ژیانمان كووتایى وه‌پى بایدو مردن نزیكه‌و بوود.

زوورممان ك پیر بویمن مه‌گه‌ر به‌خت داشتویم ك جووریگ له‌ نه‌خوه‌شى له‌ جه‌سه‌مان نه‌ودو ده‌واو ده‌رمان له‌ماڵ نه‌یاشتویم، ئه‌و كه‌سه‌یلیشه‌ ك نه‌خوه‌شیه‌یلیان سه‌ختتره‌ له‌ مه‌ردمانیگ تر، ئه‌وه‌ بیگومان هه‌وه‌جه‌ى فره‌یگ دیرن وه‌ مقه‌یه‌تیكردن چ چه‌ودیرى پزیشكى یا چه‌ودیرى كوومه‌ڵایه‌تى.

له‌وڵات و كلتووره‌یل فریه‌یگ ئه‌را چه‌ودیریكردن ئه‌و نه‌خوه‌شه‌یله‌ ك له‌ مردن نزیكه‌و بوینه‌ فریه‌جار باس له‌ ده‌رمان كریه‌ید، وه‌تایبه‌ت له‌وه‌خت سه‌ره‌مه‌رگ نه‌خوه‌شیگ . ده‌رمان ژان شكن جوور مۆرفین ئه‌را وه‌خت سه‌ره‌مه‌رگ جارجاریگ ئه‌یه‌رنه‌ كار ئه‌را ئه‌وه‌ك مردنیگ بى ئازار بوود، له‌هه‌مان وه‌ختیش له‌وه‌ر ئه‌وه‌ك قه‌وم خیش نه‌خوه‌شه‌گه‌ ئه‌و نه‌خوه‌شه‌ وه‌و حاڵه‌و نه‌دوینن ك له‌شوون مردنى شوونه‌وار فریه‌یگ له‌ دڵ و ده‌روین دووس و خوه‌شه‌ویسه‌یلى بیلیده‌ جى.

ئنجا فره‌ گرینگه‌ له‌وه‌خت نه‌خوه‌شى یا سه‌ره‌مه‌رگ لایه‌نه‌یل" كه‌سایه‌تى، شیوه‌ى ژیان، حاڵه‌ت ده‌روینى، حاڵه‌ت جه‌سه‌یى و كوومه‌ڵایه‌تى كه‌سه‌گه‌ له‌وه‌رچه‌و بگیریه‌ید جوور له‌وه‌خت ئاسایى.

ئاده‌میزاد هیمان وه‌ته‌واوى نازانید ك كه‌سیگ له‌ سه‌ره‌مه‌رگ یا له‌وه‌خت مردنى قسه‌ى مه‌ردم ژنه‌فید یا هسكردنى چوینه‌. ئیمه‌ ته‌نیا له‌ڕى ئایین و شاره‌زاو مامۆستایه‌یل كتاو ئاسمانیه‌و رینمایى وه‌رگریم، ئیمه‌ وه‌گووره‌ى زانست وه‌ تایبه‌ت له‌ كلتوور خوه‌مان و كلتووره‌یل تر فریه‌یگ غه‌ڵه‌ته‌یل یه‌كجار فریه‌یگ ئه‌كه‌یم وه‌رانوه‌ر نه‌خوه‌ش یا كه‌سیگ له‌ سه‌ره‌مه‌رگ، ته‌نانه‌ت پزیشكه‌یلیش وه‌خت دیارى ئه‌كه‌ن ك نه‌خوه‌شه‌گه‌ كه‌ى مرید!

دیاریكردن وه‌خت له‌ڕوى ده‌روینیه‌و كاریگه‌رى فریه‌ خراویگ دیرید راسه‌وخوۆ له‌بان نه‌خوه‌شه‌گه‌، ئنجا ئه‌وه‌ ده‌ركه‌فتگه‌ ك هه‌ناى پزیشك وه‌خت دیارى ئه‌كا ئه‌را مردن، ئه‌وه‌ له‌و ماوه‌ دوینید نه‌خوه‌شه‌گه‌ رووژه‌یلى هساو ئه‌كاو هس وه‌ نزیكه‌وبوین مردن خوه‌ى ئه‌كاو ئویشیده‌ خوه‌ى ئه‌وه‌نه‌ له‌وه‌خته‌گه‌م مه‌ندگه‌ ئه‌را مردن، ئنجا ئایا چه‌و نه‌خوه‌شه‌ له‌و ماوه‌ى چه‌نیگ ترس له‌لاى په‌یا بوود ك رووژ بشمارید ئه‌را مردن خوه‌ى.

بیگومان ئى جووره‌ دیاریكردن وه‌خته‌یله‌ ساڵه‌یلیگه‌ قه‌یه‌غه‌ كریاگه‌ له‌ زوورم وڵاته‌یل، چوینكه‌ كاریگه‌رى خراو له‌لى كه‌فیده‌وه‌و هس وه‌ چشته‌یل فریه‌یگ ئه‌كا، وه‌ل ئه‌وه‌یشا نه‌خوه‌شه‌یل فریه‌یگیش هه‌ن تویه‌نستنه‌ روى وه‌ڕوى قسه‌ى پزیشكه‌یل بوونه‌وه‌و هانده‌ر گه‌ورایگ داشتنه‌ دڵیان خوه‌شه‌و بكا ئه‌را وه‌رده‌وامبوین له‌ ژیان و ئه‌وانه‌ تویه‌نستنه‌ سه‌ربكه‌فن له‌بان نه‌خوه‌شیه‌یلیان.

عه‌بدوڵڵا ته‌وفیق

ج . أ